Alkitab Mobile SABDA
[VER] : [TORAJA]     [PL]  [PB] 
 <<  Amsal 28 >> 

1Iatu to tang mekaaluk male mallai, moi tae’ tau unnula’i, apa iatu to malambu’ manaman bang nasa’ding susito singa mangura.

2Iake pabali-balii tu pa’tondokan, la buda tu arungna, apa tete dio tau unnampui pakita penaa sia tangnga’ kinaa, nanii marendeng tu atoran malambu’.

3Iatu to kalala’, tu umpakario-rio to bongko, susi bang uran kamban sae ussoloi kande.

4Iatu to umboko’i sukaran aluk, umpudi to tang mekaaluk, apa minda-minda ungkaritutui sukaran aluk napomatana’ tu tau iato.

5Iatu to kadake tae’ natandai tu malolona, apa minda-minda undaka’ PUANG natandai nasang.

6Iatu to kalala’ unnola malolo mandu melo na iatu to kelok lalanna, moi anna sugi’.

7Minda-minda tu ungkaritutui sukaran aluk, iamo misa’ pia muane unnampui tangnga’ kinaa, apa minda-minda tu sisola passolle’, umpakasiri’ ambe’na.

8Minda-minda tu urranganni iananna medenne’ doi’ sia mesaro la’da’, umpangrampunan to uangkamasei tobongko.

9Minda-minda umpasalai talinga sia manoka umperangii sukaran aluk, moi passambayangna megallian duka.

10Minda-minda umpapusa to bulo lollong lako lalan kamandasan, ia kalena la tobang tama patuangna, apa iatu to sallo’ la umpomana’ kamauparan.

11Misa’ to sugi’ ussanga kalena kinaa, apa misa’ to kalala’ tu unnampui tangnga’ kinaa tarru’ natandai tu penaanna.

12Iake sila’tekanni tu to malambu’, iamoto tu kamala’biran kapua, apa iake unnappa’i kuasa tu to tang mekaaluk, membuni nasang tu tau.

13Minda-minda tu ussamboi kapatodo-tintinganna, tae’ nala maupa’, apa minda-minda unnakui sia umboko’i la ungkabu’tui kamaturu-turuan.

14Maupa’ tu to tontong mataku’, apa minda-minda tu umpamakarra’ penaanna, la tobang rokko kamandasan.

15Susi singa umburrung sia susi beruang tangdia’, susi dukamo a’ganna to tu pangulu tang mekaaluk umparenta misa’ bangsa malamma’.

16Iatu misa’ datu tang palambi’ pa’inaanna, umpakario-rio tongan tau, apa minda-minda ungkabiri’ saro bu’tu kadake iamo umpamalambe’ sunga’na.

17Iatu tau untanggungi rarana tau tu napatibollo, la mallai sae lako panglamunan; da nadampai tau.

18Minda-minda tu unnola malolo, la dilendokan, apa iatu to kelok lalanna, tang dikapang-kapang anna tobang.

19Minda-minda tu umbuak padang, la dipedia’i, apa minda-minda tu unnula’ apa tae’ gai’na, la dipedia’i kakalalaran.

20Iatu to manappa’ la sebo kamasakke-sakkeanna, apa minda-minda unnula’ kasugiran, tae’ nasalai tang diukung.

21Iatu umpelindo tau, tae’ namelo; moi anna kande sangsuakan, napobannang duka tau sala.

22Iatu tau meullak matanna, maduang la madomi’ sugi’, sia tae’ natandai, kumua la narampoi kapu’duran.

23Minda-minda tu umpakilala to senga’, manassa la unnappa’ kamasokanan undinna losong na iatu to malute massede.

24Minda-minda tu urrampa apanna ambe’na sia indo’na, anna ma’tangnga’ kumua: tae’ nakasalan, tau iato solana to kadake.

25Iatu tau tontong bang ungkaduangi ianan umpabu’tu kasisalan, apa minda-minda tu umposande’ PUANG, la dipedia’i tongan kameloan.

26Minda-minda tu urrannuan kalena penaanna, iamo tobaga, apa minda-minda unnola lalan kakinaan, la tilendok,

27Minda-minda tu ungkasokanni to bongko, tae’ nala kapu’duran, apa minda-minda tu untampunanni mata, la narua tampak ropu.

28Iake unnappa’i kuasa tu to tang mekaaluk, la membuni tu mai tau, apa iake sabu’i tu tau iato, la kerangngan tu to malambu’.


  Share Facebook  |  Share Twitter

 <<  Amsal 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel