Dual PanelPeada’ dandanan sangka’ napa’pangadaran Agur
1Inde sia tu kadanna Agur, anakna Yake, KadanNa Puang Matua. Ma’kada te tau iate nakua: Mengkabo’yo’mo’, o Puang Matua, sia bonnongmo’.
2Belanna mandu bagana’ na iatu mintu’ tau sia tang unnampuina’ tangnga’ melo susi tolino.
3Sia tae’ duka kupelada’i kakinaan, kuurunganni untandai Puang Masero pindan.
4Mindara tu kendek langan langi’ sia songlo’ sule dao mai, mindara urrampun angin diong pa’ka’panna? Mindara umbungku’ uai diong tamang-kalena, mindara umpamanassai tu mintu’ randan langi’? Mindara tu sanganna sia mindara sanganna tu anakna muane? Manassa mutandai.
5Mintu’ tu kadanNa Puang Matua pura sudimo anna masero tongan; iatu to umpentionganNi Iamo napobalulang.
6Moi misa’ da murangnganni tu kadanNa, dikua da Nata’tanko sia da mudiapparan to buttok.
7Duang rupa tu apa Kupalaku lako Kalemi, da Mipadapanna’ kumane mate:
8Pamambelai dio mai kaleku tu kakelokan sia kada tang tongan, da Mibenna’ kakalalaran sia kasugiran, sangadinna kaduttu’na’ kande, iamotu taa silasangku.
9dikua da kupeonganniKomi, ke kala’biammo’ sia da kuma’kada kumua: Mindara tu PUANG? sia da duka kuboko, kenarampoina’ kabongkoan sia da kutodotinting sanganNa Kapenombangku.
10Da mupa’pekabirisanni tu misa’ to mengkarang lako puangna, anna da nagataiko sia mutanggung kalena tu salana.
11Den tu tau pira unggatai ambe’na sia tae’ napasakke indo’na.
12Iamotu tau, tu ussanga kalena masero dio pentirona, apa tang dibasei tu ruttakna.
13Iamotu pasoloran matanna sia madao pentirona.
14Iamotu to ma’isi susi pa’dang sia to ma’buang susi piso, la unnimbakan mintu’ tobongko, anna mata’pimo lan tondok sia tappumo tu to kalala’ dio lu pa’tondokan.
15Iatu lematik da’dua tu anakna baine, iamotu benni, benni! Inde sia tu tallu tang untandai kadiaran, sia a’pa’ tu tae’ len nama’kada nakua: Silasamo.
16Iamotu lino tomate, na pa’tambukan tamanang, kuli’na padang tu tae’ bang nama’kada nakua: Silasamo.
17Iatu mata untelle-telle ambe’na sia tang umbilang kamengkaolan lako indo’na, la natotokki kaduaya diong biring salu’-salu’ sia la nakande anak langkan maega.
18Inde sia tu tallung uluan kukamangngai, ondongpi patang uluan tu tang kupebuyu’;
19iamotu lalanna langkan maega dao langi’ na lalanna ula’ dao lu buntu batu, lalanna kappala’ lan tangngana tasik na lalanna misa’ muane sisola baine mangura.
20Susimote tu lalanna baine pasandak salu lako rampanan kapa’: Ianna mangka kumande napa’diimi tu pudukna, anna ma’kada, nakua: Tae’ kupogau’ kadake.
21Iatu tallung uluan napotigega’ lino, ondongpi iatu a’pa’, tang naatta pissan:
22Iamotu tete dio misa’ kaunan, ke dadimi datu, na tete dio misa’ to tang kebattuan, ke dipedia’i kande.
23Tete dio baine disayu anna ditantang, ke dipobainei, na tete dio misa’ baine mengkarang tu ussuale puangna baine naia ussondai.
24Inde sia tu a’pa’ bittikna dao kuli’na padang, apa lendu’ ia kinaanna;
25iamotu sirrin misa’ bangsa malamma’, apa naparandan duka tu kinallona ke pealloanni;
26na iatu kalinti to’ batu misa’ bangsa malamma’, apa nagaragai duka tu serangna lan buntu batu;
27iatu batik tae’ datunna, apa ma’balole’ melo, ke tassu’i male;
28na iatu bulilik ma’din nadammak tau, apa lan duka tongkonan layukna datu.
29Inde sia tu tallu melo nasang tengkana, ondongpi iatu a’pa’ melo lingkana:
30Iamotu singa, lalongna mintu’ olo’-olo’, tu tang sorong boko’ dio mai misa’ apa, ba’tu dio mai misa’ tau.
31Na iatu asu pangula’, ba’tu bembe’ laki, sia misa’ datu tu sisola surodadunna.
32Iake umpamadaoko kalemu, anna tae’pa mutangnga’ meloi, ba’tu mangkami mutangnga’ melo, melo tampunni tu pudukmu.
33Belanna iatu pangandu’, ke dilelu’i umpabu’tu bumbungan pa’pamakko, na iatu illong, ke ditumbukki kerara sia iatu kare’dekan ara’ ke dipatiludakki umpabu’tu kasigagan.