Alkitab Mobile SABDA
[VER] : [TORAJA]     [PL]  [PB] 
 <<  Amsal 8 >> 

Uleleanna Kakinaan

1Tae’raka nametamba-tamba tu Kakinaan sia tae’raka napekapuai gamaranna tu Tangnga’ melo?

2Bendanmo dao lu inan madao dio batatta, iamotu kasitammuanna mintu’ lalan,

3dio sa’de babangan, lalan tama kota, tu naninna tau tama kota, nanii metamba, nakua:

4Lako kalemi kunii metamba, e mintu’ muane, sia tassu’mo tu kadangku lako mintu’ ma’rupa tau!

5E kamu, tu tang paissanna, pelada’i tu kamanarangan, sia e kamu, tu baganna, tandai tu iannato lan penaammi.

6Perangiimi, belanna mala’bi’ tu apa la kupokada sia tibungka’ tu pudukku la ussa’bu’ apa malolo.

7Belanna iatu sadangku umpokada kamanapparan, sia iatu katangmekaalukan nakagalli pudukku.

8Mintu’ tu kada sun dio pudukku situang kamaloloan; moi misa’ tu mintu’nato tae’ dibalittua’ sia dileko’.

9Tonganna nasang lako to unnampui tangnga’ kinaa, manappa’ lako to unnappa’ kapaissanan.

10Tarimai tu pangadarangku, da naiatu salaka, sia iatu kapaissanan da naiatu bulaan tasak.

11Belanna iatu kakinaan mandu melo na merdan, sia mintu’ tu muporainna tae’ susinna.

12Akumote tu Kakinaan siayoka kamanarangan sia kuappa’mo tu kapaissanan tete dio pa’timbangan.

13Iatu a’gan ungkataku’ PUANG iamotu ungkabiri’ kakadakean; kukabiri’ tu kamadaoan penaa, kamatampoan, penggauran bulituk sia sadang naponnoi pa’bulang leko’.

14Kuampui tu pa’pakilala melo sia pa’timbangan, akumo tu pakita penaa; kuampui tu kamatotoran.

15Tete diori kaleku anna ma’parenta tu mintu’ datu sia to paa unggaragai atoran malambu’.

16Tete dio dukari kaleku nama’parenta tu mintu’ arung, sia to la’bi’, susi dukato tu mintu’ to ma’paolai salu lan te lino.

17Kukamali’ tu to ungkamali’na’, naminda-minda tu birisan, undaka’na’ manassa la naapparanna’.

18Iatu kasugiran sia kamala’biran kusisolan, ia duka tu ianan matontongan sia kamaloloan.

19Iatu bua kupaden ondong ia mala’bi’na na bulaan, ondongpi na bulaan tasak, iatu buraku mandu melo na salaka massang.

20Umpolalanna’ lalan malolo, dio tangnga batatta kamalamburan,

21kumua la kukamasei ianan dipomana’ tu to ungkamali’na’; iatu bilik pangannanna la kuponnoi.

22Napadadina’ PUANG Napobunga’na mintu’ lalanNa, dolo na iatu mintu’ panggaraganNa tempon dio mai.

23Dikombongmo’ tempon dio mai, randuk dio mai pamulanna, tonna tae’pa te lino.

24Dadimo’ tonna tae’pa tu tasik kalua’, sia iatonna tae’pa mata kalimbuang boba.

25Iatonna tae’pa nadiranduk tu buntu, sia iatonna tae’pa nadipadadi tu tanete, inang dadimo’;

26sia iatonna tae’pa Nakombongi Puang tu lipu daenan sia kapadanganna, sia tiparandukna barra’-barra’.

27IatonNa pasakka’mi tu langi’, sia iatonNa gorri’mi tu lepongan dao tasik kalua’, diomo’ ren,

28sia iatonNa pamanassami tu salebu’ daona lu sia iatonna tikula’dak-la’dak tu kalimbuangna tasik kalua’,

29sia iatonNa pantokki tu mintu’ anggenna tasik, kumua da nalendai uai iato tu pepasanNa, tonNa pamanassai tu mintu’ parandanganna te lino,

30attu iato misa’na’ anak dipakaboro’ dio Kalena, kiallo-kiallo sende paiman tonganna’, sia lan mintu’ attu parannuna’ dio oloNa,

31sia maningo-ningona’ lan linoNa, dao kuli’na padangNa, sia iatu kasendeangku siayoka mintu’ ma’rupa tau.

32Iamote, e mintu’ anakku, perangiina’, belanna la maupa’ tu to ungkaritutui lalanku.

33Perangii tu pa’pakilala, ammu kinaa, da mutang umpalan penaai.

34Maupa’ ia tu mintu’ to umperangiina’, sia kiallo-kiallo ma’kampa dio to’ ba’baku sia ma’kampa dio to’ ampang babangangku.

35Belanna minda-minda tu unnappa’na’, ungkabu’tui katuoan sia unnappa’ kamasokanan dio mai PUANG.

36Apa minda-minda tu tang unnappa’na’, iamo umpamasang kalena; mintu’ tu to ungkabiri’na’ ungkamali’ kamatean.


  Share Facebook  |  Share Twitter

 <<  Amsal 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel