Dual PanelBunga’ kadanna Elifas kumua moi misa’ tau tae’ naruai kamaparrisan, ke tae’i nakasalan
1Attu iato umbungka’mi kada tu Elifas, to Téman, nakua:
2La masussaraka tu penaammu, ke natobai tau umpokada sangbuku kada lako kalemu? Mindara ma’din unnattai tang ma’kada-kada?
3Manassa budamo tau muada’i, sia lima langga’ mupamatoto’.
4Iatu kadammu unnendekammo to tilende’, sia umpabatta’ guntu’ ma’parondona tau.
5Apa totemo narampoimoko tu iannato, anna buyu’ tu penaammu, naruako tu iannato, anna pussak tu penaammu.
6Tangiaraka kamekaalukammu tu mupopentionganan, sia tae’raka murannuanni tu gau’ tang sayuammu?
7Mengkilala meloko, kumua mindamora tu disabu’i, ke tae’i nasala, sia umbamora nanii sanggang tu to malolo?
8Iatu mangkanna kutiro: Minda-minda tu untengko kakadakean, sia unnambo’ kamasussan lako to senga’, iamo la umpeparei.
9Tete dio penaanNa Puang Matua anna sanggang tu tau iato, sia tete dio pamurru’ illongNa anNa sabu’i.
10Umburrung tu mai singa sia ma’ngaung-ngaung – iatu isi singa mangura direbong.
11Iatu singa tua la mate belanna tae’mo kandena, sia iatu anak singa birang tisambo’-sambo’.
12Sangbuku kada membuni urampoina’, sia tialling tama talingangku tu pa’bisikna,
13tongku mangka untiroi tu pentiro mendeata tonna bongi, angku ma’tangnga’-tangnga’, tonna kaleppeng-leppenganna tau.
14Narampoimo’ katirambanan sia kama’parondoan, anna popa’parondoi tu mintu’ bukungku.
15Misa’ penaa sumayang ullendu’ina’ sia umpaka’ba’ mintu’ bulungku.
16Torro bendan, apa tae’ kukanassai tu pa’kaleanna. Misa’ a’gan pa’kalean bendan dio pentiroku, sia kurangi tu gamara ma’bisik, nakua:
17Umba la nakua dadi misa’ ma’rupa tau malambu’ dio oloNa Puang Matua, ba’tu misa’ tau masero dio oloNa Tokumombongna?
18Manassa iatu mai taunNa tae’ Nakatappa’i sia iatu mai malaeka’Na Naapparan tu kapusanna;
19ondongpi iatu to untorroi banua litak, tu diparandanganni barra’-barra’, tu to dirimpi’ susi busung anna mate.
20Tau iato mai dinisak-nisak lan pangallaranna masiang na bongi, tu sanggang sae lakona anna tae’ naissanni tau.
21Tang dilendokanraka tu ulang tendana? Mate tu tau iato mai, natae’ kakinaanna.