Dual Panel1Metamba bangmoko – denraka tau la umpebaliiko? Sia mindara tu to masero la mupennoloi?
2Tonganna iatu kamapa’diran penaa umpamate to baga sia kapangimburuan umpamatei tu to tang paissan.
3Kutiro kalenamo, umba nakua tu to baga mennuaka’ melo, apa simpolo kutampakki ropu tu inan katorroanna.
4Iatu mai anakna muane sisayuran pa’tunduan, dipopellesean lan to’ babangan, natae’ tau urrampananni.
5Iatu to karorian napurai nakande tu pegandungna, sia moi lan to’ duri naala duka, sia to ma’rang ungkailui tu apanna.
6Belanna tae’ nabu’tu dio mai to’barra’-barra’ tu kamandasan, sia iatu kamaparrisan tae’ natuo dio mai padang.
7Apa iatu tolino dadi la unnappa’ kamasussan, susi lelatu sipettia’-tiaran kendek langngan.
Siumpu’na bunga’ kadanna Elifas, kumua dipamasakke tu to puramo diada’
8Apa iake aku, la umpekutananna’ Puang Matua, sia lako Puang Matua la kunii umpennoloanni tu a’gangku.
9Umpogau’mo penggauran kapua, tu tang dilambi’na, sia apa memangngan tu tang dikemba’ diia’.
10Umpasae uran dao kuli’na padang, sia umbolloan uai dao kapadanganna.
11Umpamatande to madiongan, anna iatu to rosso penaanna unnappa’ pa’tunduan matoto’.
12Ia umpatangdadi tangnga’na to pakira-kira, anna tang danun tu mai pengkaranganna.
13Ia umpoya to matarru’ lan pa’pakenanna, anna didampa tu tanan penaanna to pakira-kira.
14Iake masiangi sumpumo lan kamalillinan, sia iake tangngai allo, sumalappa susi ke bongi.
15Apa Ia urrampananni tu to madiongan dio mai pa’dang pudukna tau iato mai, sia to makario-rio lan mai limanna to mawatang.
16Iake susito den kapa’rannuananna to bitti’ sia kakadakean untutu’ pudukna.
17Manassa maupa’ tu to Napa’dikki Puang Matua, iamoto da musayu peada’na To umpoissan angge maritik.
18Belanna Ia ma’pamapa’dik sia Ia ma’pamole, Ia ma’bamba sia limanNa ma’pamondo.
19Pennannanko lan kapussakan, anna Ia urrampananko, sia pempitu tae’ nanii urruako kakadakean.
20Lan kamangeloan Ia ullendokangko dio mai kamatean, sia lan kapararian Nalendokangko dio mai kuasanna pa’dang.
21Karerungangko dio mai lila mataran sia tae’ mula ungkataku’ kasanggangan.
22La mupetaai tu kasanggangan sia karorian sia tae’ mula ungkataku’i tu olo’-olo’ masuru.
23Belanna la siallu’ko tu mai batu dio lu padang, sia sikaeloko olo’-olo’ dio lu kapadanganna.
24La untiroko kamarampasanna tendamu, sia iake mutiroi tu tarampakmu, moi misa’ apa tae’ pa’de.
25La untiroko kamemba’karanna tarukmu sia bati’mu susito riu dio lu padang.
26La banu’ karurungangko tama batu dilobang, susito sanguyun gandung diala ke attunnami.
27Manassa iatu iannate kiparessamo, tongannamo susito; perangiimi sia palanni penaa tu iannato.