Dual PanelAyub umpamadiong kalena dio oloNa Puang Matua
1(39-34) Ma’kadaomi tu PUANG lako Ayub, Nakua:
2(39-35) Moraiparaka tu to pasayu la site’ge’ To umpoissan angge maritik? Iatu to umpasala Puang Matua la umpebalii tu iannato!
3(39-36) Mebalimi tu Ayub lako PUANG, nakua:
4(39-37) Manassa iate aku te tarru’ madiongna’, umba la kukua mebali lako Kalemi? Kutampun tu pudukku.
5(39-38) Pissanmo’ ma’kada, apa tae’mo kula untolei; ondongpi penduan, apa tae’mo kula umpatarru’i.
Pebali ma’penduanNa PUANG lako Ayub, kumua la napa’petiroan Ayub tu kuasanna
6(40-1) Attu iato napebaliimi PUANG tu Ayub lan mai angin bara’, Nakua:
7(40-2) Ma’tambeke’ko susito misa’ muane, la Kukutanaiko, ammu pakilalaNa’.
8(40-3) Morai dukarokoka untaeran kamalamburangKu, sia umpasalaNa’ la untonganan kalemu?
9(40-4) Susiraka takia’Na Puang Matua tu takia’mu, sia ma’dinraka tu gamarammu gumaluntu’ susi gamaranNa Puang?
10(40-5) Beloimi kamala’biran sia kamatandean tu kalemu, pakeimi kadipangkeran sia kakapuan tu kalemu;
11(40-6) barrakanni tu kasengkean maparrangmu, sia tiroi tu mintu’ matampona, ammu pemparrakanni;
12(40-7) tiroi tu mintu’ matampona, ammu patundukki sia ta’pa lungganakki tu to tang mekaaluk.
13(40-8) Buni sola nasangi tu tau iato lan to’ barra’-barra’, pattangi lan to’ kabunianna.
14(40-9) Iake susito Aku duka la umpudiko, belanna iatu lima kananmu umpapataloko.
Siumpu’na pebali ma’penduanNa PUANG lako Ayub, iamotu umpokada a’ganna darang Nil
15(40-10) Tiroi tu darang Nil, tu mangka Kupadadi susi iko. Ungkande riu susito sapi.
16(40-11) Tiroi tu kamawatanganna lan to’ aakna, sia kamabukuanna lan to’ ura’ tambukna!
17(40-12) Nae’te’ tu ikko’na susito kayu arasi’, iatu ura’ pupunna susito ulang dipasiulang.
18(40-13) Iatu bukunna susito suling tambaga, iatu lesokanna susito batang bassi.
19(40-14) Iamo dioren, tonna pamulai tu panggaraganNa Puang Matua, iamotu pa’padadi Napapa’dangi Puang;
20(40-15) ondongpi iatu mintu’ buntu umpabu’tuanni la nakandena, tu nanii maningo mintu’ olo’-olo’ dao kapadanganna.
21(40-16) Umbambangan kalena diong garonto’ seroda, tu inan narerung tallang-tallang sia mabuka.
22(40-17) Iatu seroda unnonganni, sia natikui ra’de’ dio to’ randan salu’-salu’.
23(40-18) Tiromi, moi anna mandirri’ tongan tu salu, tae’ natipodang len; manaman nasa’ding, moi anna uai tikula’dak-la’dak mongo’ susi salu Yordan umpatu sadangna.
24(40-19) Denraka misa’ tau barani undammakki tu ulunna sia untossokki tu illongna?