Dual PanelKadipandasanna to Israel dio Mesir
1Inde sia tu sanganna Israel tu male lako Mesir sola Yakub; rampomi lako tu tau iato mai pantan umbaa repokna, iamotu:
2Ruben, Simeon, Lewi na Yehuda.
3Isakhar, Zebulon na Benyamin.
4Dan na Naftali, Gad na Asyer.
5Iatu mintu’ bati’na Yakub den pitungpulo, apa iatu Yusuf diomo ia Mesir.
6Iatonna matemo tu Yusuf sola mintu’ siulu’na sia mintu’ to dadi attu iato,
7marapuammi tu to Israel sia satumale’-male’na sia memba’ka’ kalle-kallean sia sakerangngan-rangnganna, naurunganni nasitutu’imo tu tondok.
8Ta’kala denmi misa’ datu ba’ru umparenta Mesir, tang untandaimo Yusuf.
9Nakuami tu datu iato lako taunna: Iatu bangsa to Israel sabuda-budannamo sia mandu mawatang na kita.
10Melo tapatamanni tangnga’, tu tau iato mai, da nasakerangngan-rangnganna sia da duka nasama turu’ ualinta urrariiki’, ke parariki’, anna tassu’ lan mai tondok iate.
11Naangka’mi ba’tu pira-pira tu kapala bandoro’ la umpabokkokki pa’diaman tu tau iato mai; napabendanammi Firaun tau iato mai tu kota pa’palumpunan, iamotu Pitom na Raamses.
12Apa sanapakario-riona to Mesir tu tau iato mai, sakerangngan-rangnganna sia samemba’ka’-ba’ka’na, naurunganni nakagiang to Mesir tu to Israel.
13Napandasa tongan to Mesir nasua mengkarang tu to Israel.
14Napemaparri’i tu katuoanna tau iato mai nasua mengkarang magasa, iamotu unggaraga pi’da’ litak sia batu tela sia lakoan padang; mintu’ pengkarangan iato nasua ungkarangi napandasa tongan.
15Sia nakuapa datu Mesir lako to ma’pakianakna to Ibrani, misa’ disanga Sifra na misa’ disanga Pua:
16Iammi pakianak baine to Ibrani, tiro meloi ke kianakmi: iake pia muane tu anakna la mipatei, apa iake pia baine, da’ito natuo.
17Apa mataku’ tu to ma’pakianak iato lako Puang Matua sia tae’ naturu’i tu kadanna datu Mesir, sangadinna napatuo tu mintu’ pia muane.
18Napopetambaimi datu Mesir tu to ma’pakianak iato, nama’kada lako nakua: Ma’apai mima’gau’ susito, ammi patuoi tu mintu’ pia muane?
19Ma’kadami tu to ma’pakianak lako Firaun, nakua: Iatu baine Ibrani tae’ nasusi baine Mesir, matoto’ ia tu tau iato mai; tae’pa narampo lako tu to ma’pakianak na inang kianakmo.
20Iamoto Napogau’i Puang Matua tu kameloan lako to ma’pakianak iato; sakerangngan-rangngannami tu bangsa iato sia memba’ka’ kalle-kallean.
21Belanna nakataku’ to ma’pakianak iato tu Puang Matua, iamoto Napamasakke-sakkei tu tananan dapo’na.
22Mesuami tu Firaun lako mintu’ taunna, nakua: Mintu’ tu pia muane la dadi, tae’ mitang la umpembuanganni rokko salu Nil, apa iatu mintu’ pia baine patuoi.