Dual PanelKamandasan ma’pessangpulona dipa’peissanan
1Mangkamo tu PUANG ma’kada lako Musa, Nakua: Misa’mora tu kamandasan la Kuparampo lako Firaun sia lako tondok Mesir, namane unnelorangkomi sola nasang male; iake naelorammokomi male la naparukumokomi mallai madomi’.
2Totemo pokadanni to buda, kumua: Simisa’-misa’ muane sia baine la umpalakui lako sangbanuanna tu parea salaka sia bulaan.
3Tete dio pa’poraianNa PUANG anna kasokanni to Mesir tu to Israel, ondongpi iatu Musa to paa lan tondok Mesir, nakasiri’ mintu’ to mase’ponna Firaun sia mintu’ to Mesir.
4Sia nakuapa Musa: Nakua kadanNa PUANG: Agi-agi ma’tangnga bongi, angKu salongi te tondok Mesir.
5Mintu’ anak pa’bunga’ lan tondok Mesir la mate, randuk dio mai anak pa’bunga’na Firaun tu la unnisung dao isungan kapayunganna sae lako anak pa’bunga’na kaunan baine dio boko’na pa’ta’pungan sia anak bunga’na mintu’ patuoan.
6La sianglean tu tau lan lili’na mintu’ tondok Mesir, tu tae’pa nadadi len sia tae’mo na la dadi len.
7Apa dio lu to Israel, moi misa’ asu tae’ pandiu umburoroi sia la ungkeke’i tu to lino ba’tu patuoan, dikua ammi issanni, kumua iatu PUANG umpasilaenan to Mesir na to Israel.
8Attu iato mintu’ te to mase’ponmi la mengkalao anna rampo umpellambi’ina’ sia tukku dio tingayoku, nakua: Malemokomi sola tu mai to unturu’ bate lalanmi; attu iamoto angku male. Soro’mi tu Musa dio mai olona Firaun, nakabu’ liu kasengkeanna.
9Ma’kadami tu PUANG lako Musa, Nakua: Iatu Firaun tae’ naturu’i tu kadammi, dikua anna iatu mintu’ tanda kalle-kalleangKu dipabuda lan tondok Mesir.
10Mintu’ tanda kalle-kallean iate napogau’ Musa sia Harun dio olona Firaun. Apa iatu penaanna Firaun Napamakarra’ PUANG, naurungan tang naeloran tu to Israel tassu’ lan mai tondokna.