Dual PanelKadipondokanna Pa’pasa
1Ma’kadami tu PUANG lako Musa sia Harun dio tondok Mesir, Nakua:
2Bulan iamote tu la mipobulan pamulanna mintu’ bulan, iamo la mipobunga’na mintu’ bulan lan sangtaun.
3Pokadami lako mintu’ kasirampunan to Israel susite: Iake allo ma’pessangpulonami bulan iate, pantankomi la unnalan kalemi misa’ anak domba sitinaya rapummi, iamotu misa’ anak domba, ke sangdapo’oi.
4Iake makurangi tu pangala banua ke sangdapo’oi la naalan kalena misa’ domba, melo ke sisolai sangbanuanna, tu nasiruranan unturu’ bilanganna pangala banua; la miagian sia la mipasipatuan kalemi tu anak domba iato.
5La muala tu misa’ anak domba laki tang tattan, tu sangtaunnamo; iamotu dio lu mintu’ domba ba’tu bembe’ la minii unnalai.
6La miparandanmo sae lako allo ma’ pessangpulo a’pa’na bulan iate, anna mintu’ kasirampunan, iamotu kombonganna to Israel pantan la urrere’i ke makaroenmi.
7Iatu rarana la naala, anna todingi tu da’dua patongkon ba’ba sia ampang daona lu ba’ba banua, tu inan nanii tau ungkandei.
8Bongi ia dukamoto, anna kandei tau iato mai tu duku’na, tu dirarangna sia roti tang diragii, anna pasikandei utan mapai’.
9Da mikande mamatai ba’tu iake ditollo’i, sangadipi ke dirarangi sola tu mai ulunna, pupunna sia tambuk barinni’na.
10Sia da mipatorroi tu misesanna sae lako masiangna; ianna denpa misesanna sae lako melambi’, la mitunu pu’pu’.
11Susimo a’gannato la minii ungkandei, la ma’tambeke’komi, sia la massepatukomi, ammi toe tekken; ammi sarra’i ungkandei; iamoto tu Pa’pasa dipakarayan PUANG.
12Bongi ia dukamote angKu la ussalongi tondok Mesir sia la umpata’pai lima tu mintu’ anak pa’bunga’ lan Mesir, la to lino sia olo’-olo’; sia la Kupaolai salunna tu mintu’ deatanna to Mesir, tonganna Akumo tu PUANG.
13Iatu rara iamo la dadi misa’ tanda lako kalemi dio lu banua minii; iangKu tiromi tu rara iato la Kulendu’imokomi, naurungan tae’ kamandasan mesanggangan dio lu kalemi, ke Kupata’paimi lima tu tondok Mesir.
14Allo iate la dadi misa’ allo kapengkilalaiammi; allo iato la mipakaraya iamo pa’gauran dinii umpakala’bi’ PUANG; ammi siosso’i umpakarayai butung aluk matontongan.
15La ungkandekomi roti tang diragii pitung allo, apa ia bangsiamo tu allo bunga’na la minii untibei tu mintu’ ragi lan mai banuammi, belanna minda-minda ungkande apa-apa diragii randuk allo tipamulanna sae lako allo ma’pempitu, la disabu’i lan mai to Israel.
16Iato allo tipamulanna na allo ma’pempitunna la den kasirampunan masallo’, allo iato tae’ nama’din tau mengkarang, sangadinna ia manna tu la mikandena simisa’-misa’ ma’din mipasakka’.
17Karitutuimi tu aluk ungkande roti tang diragii, belanna allo ia dukamote Kusolangkomi tassu’ lan mai tondok Mesir. Iamoto karitutui te allo iate misiosso’i umpoaluk matontonganni.
18Lan to bulan pamulanna, allo ma’pessangpulo a’pa’na, makaroen la mikande tu roti tang diragii sae lako allo ma’penduangpulona mmisa bulan iato, ke makaroenmi.
19Lan to pitung allo, tae’ mila unnanna ragi lan banuammi, belanna minda-minda ungkande apa diragii, iamo la disabu’i lan mai kasirampunanna to Israel la to sae la pa’tondokan.
20Moi misa’ tae’ mima’din ungkandei tu apa diragii, sangadinna mintu’komi la ungkande roti tang diragii lan tondokmi.
21Natambaimi Musa tu mintu’ to matua-tua to Israel la sirampun, anna kuanni: Malemokomi ammi alanni anak domba tu mintu rapummi, ammi rere’i tu Pa’pasa.
22Alami tu supa sangpori, otonni tama to’ rara lan pindan, tedokki tu rara iato lan mai pindan lako ampang daona lu sia lako to da’dua patongkon ba’ba, na iatu kamunna, moi misa’ da mitassu’ len lan mai ba’ba banuammi sae lako masiangna.
23Iake sumalongmi tu PUANG lan tondok la umpata’pai lima to Mesir, Natiroi tu rara iato dio ampang ba’ba daona lu sia dio to da’dua patongkon ba’ba, la Nalendu’i PUANG tu ba’ba iato, tae’ Naeloranni tu to pasanggang la tama banuammi la ma’kasolang-solang.
24Karitutuimi te pepasan iate; padadii aluk tipondok matontongan lako kalemi sia lako mintu’ tarukmi.
25Ke tamakomi tondok tu la Nakamaseangkomi PUANG, susitu Napokadanna, la mikaritutui te kamenomban iate.
26Sia iake nakutanaikomi anakmi, kumua: Kamenomban apara tu mipogau’?
27La mikua mebali: Iamote tu pemala’ Pa’pasa dipemalaran lako PUANG, tu lendu’ mana’pa dio mintu’ banuanna to Israel dio tondok Mesir tonna dipata’pai lima tu to Mesir, Nakatirinnai tu mintu’ banuanta. Sangtukkuammi tu to buda, anna menomba:
28Malemi tu to Israel umpogau’i susitu Napasanna PUANG lako Musa sia Harun, susimo napogau’ to.
Kamandasan ma’pessangpulona, iamotu kamateanna anak pa’bunga’na to Mesir; Na katassuranna to Israel lan mai tondok Mesir
29Iatonna ma’tangngamo bongi Napata’paimi lima PUANG tu mintu’ anak pa’bunga’ lan tondok Mesir randuk dio mai anak pa’bunga’na Firaun, tu la unnisung dao isungan kapayunganna sae lako anak pa’bunga’na to dipattang lan pa’tarungkuan sia anak patuoan.
30Bongi ia dukato millikmi tu Firaun sola mintu’ to mase’ponna sia mintu’ to Mesir, siangleammi tu tau lan tondok Mesir, belanna misa’oi banua tae’ tang nanii tau mate lan.
31Bongi ia dukato natambaimi Firaun tu Musa sola Harun, nakuanni: Ke’de’mokomi, tassu’mokomi lan mai mintu’ taungku, la kamu la to Israel; malemokomi ammi menomba lako PUANG, susitu kadammi.
32Sia mintu’ dombami sia bembe’mi sia sapimmi la mibaa duka, susitu mipokada. Malemokomi ammi palakuan dukana’ kasalamaran.
33Naparuku-rukumi to Mesir tu to Israel, anna madomi’ tassu’ lan mai tondokna, belanna nakua: mate nasangkan manii!
34Naangka’mi tau iato mai tu ta’pung panglemongna, tu tang diragiipa, sola palungan roti napasibungku’i pakeanna, napadaoi palempengna.
35Napogau’mi to Israel susitu napepasanan Musa, napalakui lako to Mesir tu parea salaka sia bulaan sia pakean.
36Tete dio pa’poraianNa PUANG anna kasokanni to Mesir tu to Israel, naurungan unturu’i tu palakunna. Susimoto nanii unnalai tu ianan to Mesir.
37Ke’de’mi tu to Israel, dio mai Raamses lako Sukot, agi-agi annan ratu’ sa’bunna muane, senga’pi tu mintu’ pia.
38Sia buda tau dio mai ma’rupa-rupa bangsa male sola tau iato mai, sia bembe’ sia domba sia sapi lendu’ budanna patuoan.
39Iatu ta’pung panglemong tu nabaa dio mai tondok Mesir, natunu pa’ranggina tang diragii, belanna tae’pa nadiragii, apa dipasassa’ lan mai tondok Mesir, naurungan tang pakala ma’parandan sia umpasakkaran kinallo kalena.
40Iatu to Israel a’pa’ratu’ ntallungpulo taun masainna torro dio tondok Mesir.
41Iatonna ma’katampakannamo a’pa’ratu’ ntallungpulo taunna, allo ia duka bangsiamoto, natassu’ tu kaponanna taunNa PUANG lan mai tondok Mesir.
42Bongi iato Nanii PUANG ma’kampa, la umpatassu’ tau iato mai lan mai tondok Mesir. Bongi iato iamo bongi nanii ma’kampa umpakaraya PUANG, tu sipatu napakala’bi’ tongan la nasiosso’i mintu’ to Israel.
Ba’tu pira-pirapa atoran diona Pa’pasa
43Ma’kadami PUANG lako Musa sia Harun, Nakua: Inde sia tu apa dipondok diona Pa’pasa: iatu to sae moi misa’ duka da nakandei.
44Apa iatu mintu’ ruranammu, tu mualli doi’, ke mangkami musunna’i ma’dinmo ungkandei.
45Apa iatu to tama sae ba’tu to sumaro, da nakandei.
46Manassa la dikande lan misa’ri banua. Da mubaai tu duku’ iato sun lan mai sia moi misa’ bukunna da mile’toi.
47Mintu’ kombongan to Israel la umpogau’i to.
48Iake denni misa’ to sae musolan torro, anna la umpogau’i tu Pa’pasa umpakaraya PUANG, manassa mintu’ taunna muane la disunna’ dolo, namane ma’din sae mentireke’ la umpogau’i, anna dipapada pa’tondokan, apa iatu tang disunna’na, inang tae’ nama’din la ungkandei.
49Misa’ri atoranna tu pa’tondokan sia to sae.
50Napogau’mi mintu’ to Israel susitu kadanNa PUANG lako Musa sia lako Harun, susi dukamo napogau’.
51Iatonna allo ia bangsiamoto Nasolanni PUANG tu mintu’ to Israel lan mai tondok Mesir unturu’ mintu’ kaponanna.