Dual PanelIatu mintu’ pa’bunga’ la dipamarimbangan lako PUANG
1Ma’kadami PUANG lako Musa Nakua:
2Pamarimbanganni lako Kaleku tu mintu’ pa’bunga’, tu bunga’na urrubak pa’tambukan dio lu to Israel la to lino la patuoan; Aku tu Puangna.
3Ma’kadami Musa lako tu to buda, nakua: Kilalai te allo iate, iamotu allo katassurammi lan mai tondok Mesir, lan mai banua minii dipokaunan, belanna tete dio lima mawatang anNa solangkomi PUANG tassu’ indete. Iamo bannangna to na iatu keraginna tae’ mima’din ungkandei.
4Allo ia duka te ammi tassu’, iamotu bulan Abib.
5Iake Nasolammoko PUANG tama tondokna to Kanaan sia Het sia Amori sia Hewi na Yebus, tu Naalluran nene’ to dolomu umpalao sumpa, la Nakamaseangko, iamotu misa’ tondok sebo pangandu’ sia tani’ enoan, manassa la mukaritutui te atoran kamenomban lan bulan iate.
6Pitung allo munii ungkande roti tang diragii, na iatu allo ma’pempitu la dadi misa’ allo kapua dipakarayan PUANG.
7Lan to pitung allo roti tang diragii manna la dikande, da nakaanan lako kalemu tu keraginna, ondongpi, da nakaanan tu ragi dio lu kalemu lan mintu’ lili’na tondokmu.
8Attu iato la mupokadan mintu’ anakmu, kumua: Iamote tu bannangna apa Napogau’ PUANG lako kaleku, tongku tassu’ lan mai tondok Mesir.
9Iate iannate la butung misa’ tanda dio limammu sia misa’ kapengkilalan dio kasitammuan matammu, kumua na iatu atoranNa PUANG dio randan pudukmu, belanna Nasolammoko PUANG tassu’ lan mai tondok Mesir tete dio lima mawatang.
10Toe manda’i te aluk tipondok iate lan attu dipamanassa, ke taunnoi.
11Sia iake Nasolammoko PUANG tama tondokna to Kanaan, susitu mangka umpalao sumpa unnallu’i lako nene’ to dolomu, sia ke Nakamaseangko tu tondok iato,
12manassa la mupamarimbangan lako PUANG tu mintu’ pia pa’bunga’ urrubak pa’tambukan sia anak pa’bunga’na mintu’ patuoan tu dio kalemu, tu lakinna iamo apanNa PUANG.
13Apa mintu’ anak bunga’na keledai la mula’bak misa’ domba ba’tu bembe’, na iake tae’i mula’bakki manassa la mutoto sokkongna, apa mintu’ tu anak pa’bunga’na tolino, iamotu mai anakmu muane la mula’bak.
14Iake nakutanaiko anakmu muane undinna, kumua: Apara te?, la mukua lako: Nasolammokan PUANG tete dio lima mawatang sun lan mai tondok Mesir, lan mai banua dinii umpokaunankan.
15Belanna iatonna pamakarra’i Firaun tu penaanna, tae’ naelorangkan male, Napatei PUANG tu mintu’ anak pa’bunga’ lan tondok Mesir, randuk dio mai pa’bunga’na tolino sae lako anak bunga’na patuoan, iamo bannangna to angku pemalaranni lako PUANG tu mintu’ lakinna, tu bunga’na urrubak pa’tambukan, apa iatu mintu’ anakku muane tu pa’bunga’ kula’bak.
16Iate iannate la butung misa’ tanda dio limammu sia misa’ toding pa’patudu dio kasitammuan matammu, belanna Nasolammokan PUANG tassu’ lan mai tondok Mesir tete dio lima mawatang.
To Israel ullamban tasik Teberau
17Iatonna elorammi Firaun tu to buda male, Nasolan Puang Matua tu tau iato mai tae’ naturu’i tu lalan ma’palulako tondok Filistin moi anna mandappi’, belanna Nakua Puang Matua: Menassan manii tu to buda ke untiroi rari, anna sule lako Mesir.
18Sangadinna Napasepang Puang Matua, tu tau iato mai, unnola lalan ma’palulako padang pangallaran tasik Teberau. Ke’de’mi tu to Israel tassu’ lan mai tondok Mesir, sakka’ pa’bunona.
19Nabaami Musa tu mintu’ bukunna Yusuf, belanna napa’pakare’nan Yusuf lako to Israel, napalaoi sumpa kapua, nakua: Inang la Nato’longikomi Puang Matua, na attu iato la mibaa nasang male tu mintu’ bukungku indete.
20Ke’de’mi tu tau iato mai dio mai Sukot anna ma’tenda dio Etam, dio biring padang pangallaran.
21Malemi tu PUANG undoloanni, iake masiang lan misa’ lentong gaun, la unnanta’i tu tau iato mai dio lu lalan, na iake bonginna lan lentong api, la unnarrangi tu tau iato mai, kumua anna ma’din lumingka la masiangna, la bonginna.
22Tae’ natoyang dio mai tau iato mai tu lentong gaun, ke masiangnai sia iatu lentong api, ke bonginnai.