Dual Panel1E kemmi susiora tu anak muaneku, tu dipasusu dio indo’ku! Iake sitammuki’ dio lu salian, manassa kuudungkomi, anna moi misa’ tau tae’ ussayuna’ tu diona to.
2Manassa kusolangkomi sia kuanta’komi lako banuanna indo’ku, tu umpalobo’na’; manassa la kupairu’komi uai anggoro’ dipasito’bo’ rampa-rampa busarungngu’, sia uai dalima mangura.
3Iatu lima kairinna ussare ulungku sia iatu lima kananna urraka’na’.
4Umpalaona’ sumpa umpokadangkomi, e anak dara Yerusalem, kumua: Ma’apai ammi popengkilalai sia mitundan tu kamamaliran, ke tae’pi nasae kamoraianna?
Pa’pudi-pudian diona kamamaliran
5Mindara iatu sae lan mai padang aak anna mennambe lako andi’ pa’kaboro’na? – Diong garonto’ lemo datu kuni umpamillikko, inde to dio nanii indo’mu umpanguriasangko, inde to dio nanii umpanguriasangko tu to undadiangko.
6– Toke’na’ dio ara’mi susi misa’ sissin peca’, sia susi misa’ peca’ dio takia’mi. Belanna iatu kamatotoranna kamamaliran susi kamawatanganna kamatean, tang disaka’ tu tukka’na kamamaliran susi pattalo’-talo’na lino tomate, iatu mellepa’na susi mellepa’na api, api ma’lulu-luluNa PUANG.
7Moi anna iatu uai buda tae’ nakullei umpa’dei tu kamamaliran sia mintu’ salu tae’ nakullei untu’ba’i male. Moi namintu’ iananna tau nabutungananni, kumua nalolongan pa’kaboro’, manassa la ditumpu sia kasirisan.
Iatu baine dirampanni kapa’ na anak muanena
8– Den misa’ adinta baine, tu anak dara’-dara’pa. La tapatumbai tu adinta, ke attunnamo la napotumai tau?
9Iake susii benteng tembo’, la tabangun dao tu menara salaka dipopassora-sora lolokna; apa iake susii ba’ba, la tasalli’ papan kayu arasi’.
10– Iatu aku butung benteng tembo’ na iatu susungku sangtinti menara. Attu iato butungna’ to mengkanorong dio pentirona.
Mandu sugi’ ia tu baine dirampananni kapa’ na Salomo
11Iatu Salomo unnampui misa’ pa’lak anggoro’ dio Baal-Hamon. Iatu pa’lak anggoro’ iato naben mintu’ to ma’kampa; morai tau la umbaya’i tu burana sangsa’bu sikele’ salaka.
12Iatu pa’lak anggoro’ku, iamoto tu apangku, lan limangku; iatu sangsa’bu sikele’ kupopa’elo’namo lako kalemi, e Salomo, na iatu duaratu’ sikele’ la lu lako to ungkampai burana.
To diparampo sia baine narampanni kapa’ sitamban
13– E iko tu untorroi pa’lak bunga iatu mintu’ sangmane la umperangii gamarammu, pa’perangiammi to lako kaleku.
14– Madoi’komi, e andi’ pa’kaboro’ku, sia susikomi kijang ba’tu susi anak donga dao lu buntu nasitutu’i oto’ pebangki’.