Alkitab Mobile SABDA
[VER] : [TORAJA]     [PL]  [PB] 
 <<  Mazmur 32 >> 

Rongko’ napabu’tu pengkatobaran

1Pa’pudianna Daud. Gelong bangunan ada’. Maupa’ tu to dipa’deimo tu kapatodo-tintinganna, sia disamboimo tu kasalanna!

2Maupa’ tu to tang Nareken PUANG tu kakadakeanna, sia to tae’ kalando-pa’duan lan ba’tengna.

3Iatongku tang mangaku kumba’pa, salangga’-langga’na tu bukungku, napobua’ sarro budangku kiallo-kiallo.

4Belanna keallo kebongi mabanda’ tu limamMi unta’paina’, iatu utak buku lampaku silelemo marangke sangtinti ke pealloanni. Sela

5Angku tuarasan kasalangku mati’ Kalemi, sia tae’ angku buni kakadakeangku; kukuami ma’kada: La unnakuna’ kapatodo-tintingangku lako PUANG. Sela AmMi pa’deimi tu kakadakeangku sia kasalangku.

6Iamoto mintu’ to mengkaola la massambayang lako Kalemi su’ding dilambi’pi tu pa’kamaseamMi; moi anna tu’ba’ tu uai saba’, manassa tang la nalambi’ tu tau iato mai.

7Kamumo tu inan pentilindungangku, sia Mirinding pala’na’ dio mai kamaparrisan, mipaepunnina’ sengo la’tek makarimman.

8La Kupakilalako sia la Kupatuduko tu lalan sipatu la muola; la Kupokadangko tangnga’ sia la Kutuntun matako.

9Da mususi darang ba’tu bagala’ tu tae’ paissanna, tu disanga’ sia diulangi la direnden, iake tae’i nasusito, manassa tae’ namorai urreke’ko.

10Iatu to tang mekaaluk, buda kamaparrisan urrampoi, apa iatu to umposande’ PUANG, la Natikui kamasokanan.

11E to malambu’ poparannu-rannukomi PUANG, sia sende paimankomi, sia sila’tekangkomi, e mintu’ to ma’bulo lollong.


  Share Facebook  |  Share Twitter

 <<  Mazmur 32 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran