Dual PanelPassambayang ke nareke’ki’ kasanggangan la ungka’tu sunga’
1Lu lakona pangala sengo; dipasiala oni katapi. Diala madiong. Pa’pudianna Daud. (6-2) O PUANG, da Miukungna’ kasengkeamMi, sia da Mipa’di’ina’ kamare’dekamMi!
2(6-3) Katuru-turuina’, o PUANG, belanna longsena’; pamatanana’, o PUANG, belanna mintu’ bukungku paruninin!
3(6-4) Lendu’ tirambanna tu penaangku, iatu Kamunna, o PUANG, sangapapaKomi?
4(6-5) SuleKomi, o PUANG, rampananni tu deatangku, karimmannina’ tete dio kamasokanamMi!
5(6-6) Belanna lan kamatean tae’mo kapengkilalan lako Kalemi, sia lan lino to mate mindapa la umpudiKomi?
6(6-7) Mata’ka’ tonganmo’ sumarro; bongi-bongi umpennampa’na’ uai matangku; umpotilan tangi’ tang marangaku.
7(6-8) Malanmo tu matangku napobua’ karosso-inaan, sia tang tibida’ natumang mintu’ ualingku.
8(6-9) Mallaikomi dio mai kaleku, e mintu’ to umpogau’ kakadakean, belanna Naperangiimo PUANG tu tangi’ku.
9(6-10) Naperangiimo PUANG tu pa’palakungku, sia la Natarima tu pasambayangku.
10(6-11) Mintu’na ualingku la masiri’, sia lendu’ tirambanna; tau iato mai ta’pa la sule leko’ situang kamasirisan.