Dual PanelPa’tendeng-tendengan menimang kurre sumanga’ langngan Puang Matua, belanna mintu’ penggauran kalle-kalleanNa
1Lu lakona pangala sengo. Misa’ nanian pa’pudian. Sende paimankomi lako Puang Matua, e mintu’ banne lino,
2Pakendekanni pa’pudian tu kamala’biranna sanganNa, pakala’bi’ tu kadipudianNa.
3La ma’kadakomi lako Puang Matua, kumua: Lendu’ metakuranna tu mintu’ penggauramMi, mintu’ duka ualimMi pudukna bangri mengkanorong Mati’ belanna kuasa kapuamMi.
4Sielle’ tu mintu’ banne lino umpenombaiKomi, sia umpakendek pa’pudian Mati’, sia umpakendek pa’pudian umpakala’bi’ sangamMi. Sela
5Maikomi untiro penggauranNa Puang Matua; metakuran tu penggauranNa lako mintu’ ma’rupa tau.
6Napopengkarangkean tu tasik, sia lumingka tu tau ullamban salu, inde to tanii umpoparannu Puang Matua.
7Ia ma’parenta tontong sae lakona tete dio kamatotoranNa, sia matanNa umpenunu mintu’ bangsa, da naumpamatampo kalena tu to pabali-bali. Sela
8E mintu’ bangsa, pudimi tu Kapenombanta, sia pemandui tu gamara umpa’perangian kadipudi-pudianNa.
9Tu umpapaya deatanta, sia tang unneloran lentekta tilende’.
10Belanna Kamumo, o Puang Matua, mangka ussandakkan, sia Misudimokanni butung to ussudi salaka.
11Mipatamamokan tama bunde, sia Mipapassannimokan pamaan untondon tongankan.
12Sia Mipopa’elo’na tu tau umpessompoi ulungki, tamamokan to’ api sia to’ uai, apa mangkamokan Mibaa lako sanda malona’na.
13La tamana’ banuamMi umpennoloan pemala’ ditunu pu’pu’, la umpalesso’ pangallonangku mati’ Kalemi:
14Tu napaombo’ randan dipudukku sia nasa’bu’ dara’ lengko lilaku, tongku lan kamaparrisan.
15La Kupemalaran mati’ Kalemi tu ba’tu pira-pira pemala’ ditunu pu’pu’, iamotu patuoan malompo, sia bau rambunna domba laki; la kupennoloan ba’tu pira-pira sapi sola bembe’ laki. Sela
16E kamu sola nasang tu ungkataku’na Puang Matua, maikomi umperangii, la kuulelean tu apa Napogau’ lako tondon to batangku.
17Sunmo dio pudukku meongli’ lako Kalena, natiba’tik tu lilaku umpudi-pudi Puang.
18Iake susinnai la lu lakoi kakadakean tu penaangku, manassa inang tang natanding talingana’ Puang.
19Apa inang Natanding talingana’ Puang Matua, sia Naparinaa tu pengkamoyaku.
20Mintu’na kadipudian lu lako Puang Matua tu tang untumpu pa’palakungku sia tang umpasitoyanganna’ kamasokananNa.