Dual PanelBungkaran kada
1Kada Napa’petanggungan Puang Matua diona Niniwe. Sura’ patiro mendeatanna Nahum, to Elkosh.
Peada’ sia pa’pakatana
2Iatu PUANG iamo Kapenomban noka ditimba oloNa sia ma’pabala’i, iatu PUANG iamo To ma’pabala’i sia nakabu’ kare’dekan ara’; iatu PUANG To ma’pabala’i lako to unneaI, sia tontong tu kasengkeanNa lako ualinNa.
3Iatu PUANG kalando pesuka’, moi anna kapua kamatotoranNa, tae’ duka Ia na la tang mangukung. Lumingka naturu’ talimpuru’ sia angin bara’, sia salebu’ butung barra’-barra’ diong to’ lette’Na.
4Nagarrak tu tasik sia Napamarangke sia mintu’ salu Napaba’ta’. Iatu Basan sola Karmel tang me’dukmo, sia mintu’ daun-daun dao Libanon malayumo.
5Tigega’ tu mintu’ buntu dio oloNa sia mintu’ tanete tuan; sia tiseno-seno tu kuli’na padang dio oloNa, ondongpi tu lino sola mintu’ issinna.
6Minda la unnattai bendan dio olo katorrong-torronganNa? Mindara la umpatananni tu kasengkean ma’lana-lananNa? Iatu kare’dekan ara’Na tibarrak susi api sia iatu mai buntu batu tesse-tesse dio oloNa.
7Iatu PUANG masokan sia misa’ pentirerungan lan attu kapussakan; Natandai duka Ia tu mintu’ to umpentirerungI.
8Apa tete dio uai saba’ Nasabu’i Puang tu inanna, sia Naula’i tu ualinNa tama kapittukan.
9Moi apa tu mitangnga’ la unnea PUANG, Nasanggangi duka, tae’ napenduanni bu’tu tu kadipapussakan.
10Belanna, moi sibintan susi duri, sia malango susito kabiasanna malango –, inang la dimangsanni tarru’ tu tau iato mai susi dalame marangke.
11Dio mai kalemu tassu’mo misa’ tau untannun kadake unnea PUANG, tu misa’ tau untangnga’ kabulitukan.
12Inde sia tu kadanNa PUANG: Moi anna tepu tu kamatotoranna sia moi tarru’ buda, manassa la susi dukato tu tau iato mai la disasa’, naurunganni tappu. Moi angKu mangka unti’tinko, manassa tae’mo Kula untolei unti’tinko.
13Belanna totemo la Kualai sia Kutesse tu ayoka, tu napadao palempengmu, sia la Kuka’tuan tu mintu’ pepungomu.
14Apa diona tu apa la urrampoiko Napokada PUANG susite, Nakua: Iatu sangammu tae’mo nala dipatale’: lan mai banua deatammu la Kupisanni tu mintu’ rapang-rapang dipodeata dipa’ sia mintu’ rapang-rapang dipodeata dipati’no’. La Kuparandan tu lamunammu, belanna Kuangga’ maringanko.
15Tiromi dao buntu tu lette’na to umpa’pekareban kaparannuan, tu umpatumale’ kasalamaran. Pakarayai, e Yehuda, tu pa’gaurammu, pasundunni tu mintu’ pangallonammu! Belanna iatu to bulituk tae’mo nala lendu’ dio tondokmu, saba’ mangka nasangmo disabu’i.