Dual PanelRinding tembo’ sia babangan Yerusalem dipabendan sule
1Ta’kala ke’de’mi tu Elyasib, tominaa kapua, sola mintu’ siulu’na, iamotu mintu’ to minaa, anna bangunni tau iato mai sule tu babangan Domba. Napamaindanmi sia napalakoi ba’bana, napamaindanmi tau iato mai sisola duka tu menara Mea na menara Hananeel.
2Dio sa’dena ma’bangun tu to Yerikho na dio pole’o sa’dena ma’bangun tu Zakur, anakna Imri.
3Iatu babangan Bale nabangun bati’na Senaa sule; narattiangi sia naba’bai sia napalakoi salli’na sia gontingna.
4Dio sa’dena tau iato mai ma’pemeloi tu Meremot, anakna Uria, anakna Hakos. Na diona pole’o sa’dena ma’pemeloi tu Mesulam, anakna Berekhya, anakna Mesezabeel. Dio sa’dena ma’pemeloi tu Zadok, anakna Baana.
5Dio sa’dena tau iato mai ma’pemeloi tu mintu’ to Tekoa, apa iatu to mala’bi’na tau iato mai noka umpopa’passan palempengna lan pengkaranganna puangna.
6Iatu babangan Dolo napemeloi Yoyada, anakna Paseah, sia Mesulam, anakna Besoja. Narattiangi sia naba’bai sia napalakoi salli’na sia gontingna.
7Dio sa’dena tau iato mai ma’pemeloi tu Melaca, to Gibeon, sia Yadon, to Meronot, sia to Gibeon sia to Mizpa, tu naparenta to maraa lompo dio lili’ sambalinna lu Salu.
8Dio sa’dena ma’pemeloi tu Uziel, anakna Harhaya, misa’i pande bulaan; dio sa’dena pole’o ma’pemeloi tu Hananya, misa’ to ma’bangki’. Iatu tau iato mai tae’mo namanggi’ mengkarang dio Yerusalem dio to’ rinding tembo’ makamban.
9Dio sa’dena tau iato mai ma’pemeloi tu Refaya, anakna Hur, kapala sesena lembang Yerusalem.
10Dio sa’dena tau iato mai ma’pemeloi tu Yedaya, anakna Harumaf, iamotu sitingoan banuanna. Dio sa’dena tau iato ma’pemeloi tu Hatus, anakna Hasabneya.
11Iatu ruang ma’penduanna napemeloi Malkia, anakna Harim sia Hasub, anakna Pahat-Moab; napemeloi duka tu menara Panglallangan.
12Dio sa’dena ma’pemeloi tu Salum, anakna Halohesh, kapala sesena lembang Yerusalem, la ia la mintu’ anakna baine.
13Iatu babangan Lombok napemeloi Hanun sia pa’tondokan Zanoah; nabangun tau iato mai sule sia naba’bai sia napalakoi salli’na sia gontingna; ondongpi (nabangun tau iato mai sule) sangsa’bu siku tu rinding tembo’ sae lako babangan Au.
14Iatu babangan Au napemeloi Malkia, anakna Rekhab, kapala lembang Bet-Kerem. Nabangun sule, sia naba’bai, anna palakoi salli’na sia gontingna.
15Iatu babangan Kalimbuang napemeloi Salum, anakna Kolhoze, kapala lembang Mizpa; anna bangunni sule sia napapa-sapei sia naba’bai anna palakoi salli’na sia gontingna, ondongpi (nabangun sule) tu rinding tembo’ limbong tu nanii uai saruran tama, sikandappi’ pa’lakna datu sae lako eran tu solo’ dao mai kotana Daud.
16Iatu tarru’na male ma’pemeloi dio tu Nehemia, anakna Azbuk, kapala sesena lembang Bet-Zur sae lako sitingoan liangna Daud sia tarru’ lako limbong panggaraga natarru’ lako banua to lalong.
17Sia iatu tarru’na male ma’pemeloi dio tu to Lewi, iamotu Rehum, anakna Bani. Dio sa’dena ma’pemeloi tu Hasabya, kapala sesena lembang Kehila, boronganna lembangna.
18Sia iatu tarru’na male ma’pemeloi dio tu siulu’na, iamotu Binui, anakna Henadad, kapala sesena lembang Kehila.
19Dio sa’dena tu Ezer, anakna Yesua, kapala lembang Mizpa, umpemeloi tu siumpu’na, sitingoan lalan tuka’ langngan inan pangnannan pa’buno tu dio to’ katetuk.
20Sia iatu tarru’na male birisan tongan tu Barukh, anakna Zabai umpemeloi tu siumpu’na randuk dio mai to’ katetuk sae lako babangan banuanna, tominaa kapua Elyasib.
21Sia iatu tarru’na male napemeloi Meremot, anakna Uria, anakna Hakos, iamotu siumpu’na randuk dio mai babangan banuanna Elyasib sae lako tampak banuanna Elyasib.
22Sia iatu tarru’na male ma’pemeloi dio tu to minaa, iamotu to torro dio lu Padang.
23Sia iatu tarru’na male ma’pemeloi dio lu Benyamin sia Hasub sitingoan banuanna. Tarru’na male napemeloi Azarya, anakna Maaseya, anakna Ananya, dio sa’de banuanna.
24Sia iatu tarru’na male napemeloi Binui, anakna Henadad, tu siumpu’na, randuk dio mai banuanna Azarya sae lako Tampakna sia sae lako tetukna.
25Sia iatu tarru’na male ma’pemeloi dio tu Palal, anakna Uzai, sipatu tampak sia menara malangka’, tu tarangso lako salian dio mai banuanna datu, sikandappi’ tarampak pa’tarungkuan. Sia iatu tarru’na male ma’pemeloi dio tu Pedaya, anakna Paros,
26– iatu mintu’ to pabalian lan Banua Kabusungan torro dio Ofel – sae lako babangan Uai dio rampe matallona sia sae lako menara tarangso lako salian.
27Sia iatu tarru’na male napemeloi to Tekoa tu siumpu’na randuk dio mai sikandappi’ menara kapua tarangso lako salian sae lako rinding tembo’ Ofel.
28Randuk dio mai babangan Darang ma’pemeloi tu mai to minaa, tu pantan sitingoanna banuanna.
29Sia iatu tarru’na male ma’pemeloi dio tu Zadok, anakna Imer, sitingoan banuanna. Tarru’na pole’o male ma’pemeloi dio tu Semaya, anakna Sekhanya, to ma’kampa babangan Rampe matallo.
30Sia iatu tarru’na male napemeloi Hananya, anakna Selemya, sia Hanun, anak ma’pennannanna Zalaf, tu siumpu’na. Sia iatu tarru’na male ma’pemeloi dio tu Mesulam, anakna Berekhya, tu sitingoan bilikna.
31Sia iatu tarru’na male ma’pemeloi dio tu Malkia, pande bulaan, sae lako banua to pabalian lan Banua Kabusungan sia banua to ma’baluk-baluk sipatu babangan Pa’kampan sia tarru’ langngan bilik mengkadaoan dio to’ katetuk.
32Iatu kasiallaranna bilik mengkadaoan dio tetuk na babangan Domba ma’pemeloi dio tu mintu’ pande bulaan sia to ma’baluk-baluk.