Alkitab Mobile SABDA
[VER] : [TORAJA]     [PL]  [PB] 
 <<  Pengkhotbah 10 >> 

1Iatu ba’tu pira-pira kasisi’ mate umpabosi sia umpare’de salapna to unggaragai salap; susi dukato tu kabagan sidi’, matoto’ unnala penaanna tau na kakinaan sia kamala’biran.

2Iatu penaanna to kinaa ma’palulako kanan, apa iatu penaanna te baga ma’palulako ia kairi.

3Umba-umba naola tu tobaga, tae’ tu tangnga’ melona sia iatu kadanna umpamanassai lako mintu’ tau, kumua tobaga ia.

Iatu kabagan umpasae kamandasan

4Iake re’dekki ara’na tu misa’ to ma’parenta lako kalemu, da mutampei tu inanmu, belanna kama’tanan penaa ma’din undampa sala kapua.

5Den tu misa’ kakadakean kutiro lan naarrang matanna allo, iamotu misa’ kapusan bu’tu dio mai to paa:

6iatu tobaga diangka’ unnii pangka’ ma’iringanna, apa iatu tomala’bi’ sia tosugi’ torro bang diong pangka’ madiongan.

7Kutiromo tu kaunan ussakei darang na iatu mai datu lumingka susi pa’dua’.

8Minda-minda umbo’bok patuang, iamo la tobang rokko, sia minda-minda ullo’po’ rinding tembo’, iamo la natotokki ula’.

9Minda-minda urrondon batu, la nabangkei sia minda-minda umpiak kayu, la nasanggangi.

10Iake pumpumi tu bassi sia tae’ nadiasa tu matanna, manassa la diea kamawatangan, apa iatu kakinaan iamo lalan mandu melo lako kamauparan.

11Ianna ma’totokki dolo tu ula’, namane dipokada tu pa’basa-basa, tae’mo gai’na tu to ussa’bu’ pa’basa-basa iato.

12Iatu kada tassu’ dio mai pudukna to kinaa iamo umpabu’tuanni kamasokanan, apa iatu lilana tobaga unnampello’ kalena tu tobaga iato.

13Iatu kada bunga’ sun dio randan pudukna iamo katangpaissanan, anna ma’katampakanna iamotu kabagan pasanggangan.

14Sia ia duka tu tobaga umpabuda kadanna – apa iatu tolino tae’ natandai tu apa la dadi, anna iatu apa la dadi undinna, mindara la umpaissanni?

15Iatu kamara’takanna tobaga umpamata’ka’ tonganni, belanna tae’ natandai tu lalan ma’palutama kota.

Den datu kinaa, den datu baga

16Upu’ allona tu tondok, ke piapi tu datunna sia iatu mai arungna, ke melambi’pi narandukmo kumande sia mangiru’.

17Maupa’ tu tondok, ke bati’ to la’bi’ tu datunna sia iatu arungna kumande sia mangiru’ lan attunna, (tu ussau’ kamoraianna) susi muane sia tae’ nasusi to pa’malangoan.

18Belanna diona kamatukkunan, anna marapo tu pa’kayuan sia diona lima tangbirisan, anna lo’po’ tu banua.

19Napogau’mo tau tu pa’maruasan, anna poparannui penaanna, sia iatu uai anggoro’ umpamarua’ katuoanna tau, sia iatu doi’ umpadenni tu mintu’nato.

20Da mugatai tu datu, moi nalan pa’tangngarammu, sia da mugatai tu tosugi’ lan bilik kamammarammu, nabaa manii manuk-manuk dao langi’ tu gamarammu sia napa’peissanan manii dassi tu apa mupokadanna.


  Share Facebook  |  Share Twitter

 <<  Pengkhotbah 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran