Alkitab Mobile SABDA
[VER] : [TORAJA]     [PL]  [PB] 
 <<  Rut 1 >> 

Rut sule dio mai Moab lako Betlehem

1Iatonna linona mintu’ to parengnge’ ma’parenta, denmi misa’ karorian lan tondok. Attu iato ke’de’mi misa’ muane dio mai Betlehem, lili’na Yehuda, sola bainena sia anakna muane da’dua la torro to sae dio padang marantena Moab.

2Iatu tau iato disanga Elimelekh, na iatu bainena disanga Naomi, na iatu anakna muane sola duai, disanga Mahlon na Kilyon, to Efrata dio mai Betlehem, lili’na Yehuda; rampomi tu tau iato mai lako padang marantena Moab, anna torro dio.

3Matemi tu Elimelekh, muanena Naomi, anna torro te baine iate sola anakna muane da’dua.

4Unnalami baine to Moab sola duai anna pobainei: misa’ disanga Orpa na iatu misa’ disanga Rut; torromi tu tau iato inde to dio agi-agi sangpulo taunna.

5Attu iato mate dukami tu anakna sola duai, iamotu Mahlon sola Kilyon, naurungan torro bangmi tu baine iato sisayuran anakna da’dua sia muanena.

6Mangkato ke’de’mi sola tu minintunna baine da’dua anna sule dio mai padang marantena Moab, belanna denmo kareba narangi dio padang marantena Moab, kumua Nakilalaimo PUANG tu taunNa, anNa benni kande.

7Iamoto tassu’mi lan mai inan, nanii mempue sola tu minintunna baine da’dua. Iatonna ma’tangnga lalanmo la sule lako tondok Yehuda,

8ma’kadami Naomi lako minintunna sola duai nakua: Malemokomi, mipantan sule lako banuanna indo’mi; na PUANGmora umpakitaikomi kamamasean, susitu mangka mipa’pekitanan lako tu mai to matemo sia lako kaleku.

9Napantan ungkamaseimorokomi PUANG kamanamanan lan lu banuanna muanemi. Naudungmi sola duai, apa unnurruk-urruk tumangi’,

10sia ma’kada lako, nakua: Manassa inang la suleki’ sola lako bangsami.

11Apa ma’kada tu Naomi nakua: Sulemokomi, e anakku, ma’apai mila male urrundu’na’? Denparaka pia muane lan pa’tambukangku tu ma’din la mipomuane?

12Sulemokomi, e anakku, malemokomi, belanna tarru’ matuamo’ tae’mo kula kemuane. Iakengku tangnga’i kumua la den siapa rannungku, ondongpi na bongi iate kukemuane, angku la undadian duka pia muane,

13bua’raka mila ungkampai sae lako kapuana? Bua’raka nala undampakomi tang kemuane? Da misusi to, e anakku, belanna lendu’ ia masussanna to lako kaleku, na lako kalemi, belanna tiangka’mo tu limanNa PUANG umpata’paina’.

14Unnurruk-urruk pole’omi tumangi’ tu tau iato mai, anna udungi Orpa tu matussanna, apa iatu Rut mella’ka’ bang ia lako.

15Ma’kadami tu Naomi nakua: Tiromi iatu sanglalanmu sulemo lako bangsana sia lako deatanna; sulemoko unturu’i tu sanglalanmu.

16Apa mebali tu Rut nakua: Da miparukuna’ la untampekomi sia la tibalik dio mai kalemi; belanna umba-umba tu la minii male, ia duka la kunii male, sia umba-umba tu la minii ma’bongi, ia duka la kunii ma’bongi’, iatu bangsami iamo bangsaku sia iatu Kapenombammi iamo Kapenombangku.

17Umba-umba minii mate, ia duka la kunii mate sia inde to dio la dinii ullamunna’. Nasanggangimora’ Puang Matua sia Narangnganni pole’pa, ke tang kamatean mannari tu la umpasisarakki’.

18Iatonna tiromi Naomi kumua mantirri’ tu penaanna la male sola, natorroimi ma’kada-kada lako kalena.

19Tarru’mi lumingka sola duai sae lako Betlehem. Iatonna rampomo tama Betlehem, tirambanmi tu mintu’ tau lan kota diona Naomi sia ma’kada tu baine iato mai nakua: Iamoraka Naomi tu?

20Apa ma’kada tu Naomi lako tu tau iato mai nakua: Da misangaina’ Naomi; sangaimo’ Mara, belanna mangkamo’ Naparampoi kamapairan To umpoissan angge maritik.

21Ganna’na’ tongku male, apa Napalo’bangmo’ PUANG sule. Ma’apai ammi la ussangaina’ Naomi, na PUANG tu titanan sa’bi unneana’ sia To umpoissan angge maritik tu umparampoina’ kamandasan.

22Susimoto tu Naomi sule sola Rut, to Moab, iamo tu minintunna, tu nasolan sae dio mai padang marantena Moab. Iatu tau iato rampo lako Betlehem tonna parandukmi tau medalle sisikan.


  Share Facebook  |  Share Twitter

 <<  Rut 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran