Dual PanelKamalimbangunanna Israel sule
1Ta’kala Naremme’na’ PUANG, anna tiakka’ tu penaangku, Nasolanna’ PUANG lako salian, anNa patorrona’ diong misa’ lombok, ponno buku to mate.
2Nasolammo’ ullilingi tiku lao, a’a titale’ tongammo diong lombok, sia tiromi, sirangkean bangmo.
3Ma’kadami lako kaleku, Nakua: E ma’rupa tau, ma’dinraka te buku iate mai tuo sule? Mebalimo’ kukua: O Puangta PUANG, Kamu unnissanni tu iannato.
4Ma’kadami lako kaleku Nakua: Ma’nubua’ko diona te buku iate sia kuanni kumua: E buku rangke, perangii tu kadanNa PUANG.
5Inde sia tu kadanNa Puangta PUANG lako mintu’ buku iate, Nakua: Manassa la Kupatamaikomi penaa, ammi tuo sule;
6sia Kupalakoikomi ura’, la Kupale’ke’ikomi duku’, la Kupaputu’ikomi kuli’, angKu patamaikomi penaa, miurunganni tuo sule; ammi tandai, kumua Akumo tu PUANG.
7Ma’nubua’mo’ susitu mangka dipasananna’, apa mane ma’nubua’na’, ta’pa denmi misa’ garese, pakalan denmi misa’ kapanggegasan, anna male sikande tu mintu’ buku, susi kasikandeanna siamo.
8Kutiromi tu mai ura’ ta’pa lako sia iatu duku’ le’ke’ lako, anna putu’i kuli’, apa tae’pa penaa lan.
9Ta’kala ma’kadaMi lako kaleku, Nakua: Ma’nubua’ko lako penaa iato, ma’nubua’ko e ma’rupa tau, ammu ma’kada lako penaa iato, mukua: Inde sia tu kadanNa Puangta PUANG: E penaa, saeko dio mai tetuk a’pa’na mata angin, ammu pamurru’i te to mate iate, anna tuo sule.
10Ma’nubua’mo susitu Napasananna’; tamami tau iato mai tu penaa, anna tuo sule sia bendan: iamotu misa’ tuntunan surodadu lendu’ tongan kapuana.
11Ma’kadaMi lako kaleku, Nakua: E ma’rupa tau, iate mintu’ buku iate, iamo mintu’ to Israel. Tonganna ma’kada tu tau iato mai nakua: Iatu mai bukungki marangkemo sia ka’tumo tu rannungki, upu’mo alloki.
12Iamoto, ma’nubua’ko ammu ma’kada lako tau iato mai kumua: Inde sia tu kadanNa Puangta PUANG, Nakua: Manassa la Kubungka’ tu mintu’ panglamunammi sia la Kupakendekkomi lan mai panglamunammi, e taungKu, angKu solangkomi lako tondok Israel.
13Maneri mitandai, kumua Akumo tu PUANG, ke Kubungka’mi tu panglamunammi, sia ke Kupakendekkomi lan mai panglamunammi, e taungKu.
14Sia la Kupatamaikomi Penaangku, ammi tuo sule, sia la Kupatorrokomi dao padangmi, ammi tandai, kumua Akumo, tu PUANG, mangkamo umpokadai tu iannato sia umpogau’i, kadanNa PUANG.
Kasiumpuranna Israel sola Yehuda
15Rampomi tu kadanNa PUANG lako kaleku, Nakua:
16E ma’rupa tau, alako kayu sangpolo, ammu sura’i dio, kumua: iate kayu iate kayunna Yehuda sia to Israel, tu naala lili’na; ammu ala kayu senga’ pole’ sangpolo, ammu sura’i dao kumua: Iate kayu iate kayunna Yusuf – iamotu kayunna Efraim – sia mintu’ to Israel, tu naala lili’na.
17Ammu pasikandei sola duai, anna dadi misa’ kayu, naurunganni misa’ kayu lan limammu.
18Iake nakutanaiko bangsamu, kumua: La Mipokadanrakannika kumua apara misanga to?
19Ammu ma’kada lako kumua: Inde sia tu kadanNa Puangta PUANG, Nakua: Manassa la Kuala tu kayunna Yusuf – iamotu kayunna Efraim – sia suku Israel tu naala lili’na, sia Kupasikandei sangpolo kayunna Yehuda, angKu padadii naurunganni misa’ kayu lan limangKu.
20Melo ke iatu kayu duang le’to, tu musura’i dio, lan limammu dio pentirona tau iato mai,
21ammu ma’kada lako mukua: Inde sia tu kadanNa Puangta PUANG, Nakua: Manassa la Kuala tu to Israel dio mai mintu’ bangsa tu nanii male: sia la Kupasipulung dio mai mintu’ inan, angKu solanni lako tondokna.
22La Kupamisa’mora bangsa tu tau iato mai lan tondok, dao buntunna Israel, sia misa’mora datu la undatui sola nasangi; tae’mo nala da’dua bangsa sia tae’mo nala dipada’dua kadatuan.
23Tae’mo anna ruttakki rapang-rapang dipodeatanna tu kalena sia apa megallianna sia mintu’ kapatodo-tintinganna, sangadinna la Kurampanan tu tau iato mai dio mai kamembokoranna, tu napobannang kasalan, sia la Kupamasero, naurunganni iatu tau iato mai Kupotau na Aku napoKapenomban.
24Na Daud, taungKu, tu la undatui sia misa’mora to mangkambi’ tu la ungkambi’i sola nasangi. Anna turu’i tu apa Kupondok sia la nakaritutui sia la napogau’ tu atorangKu.
25Anna torro lan tondok Kukamasean Yakub, taungKu, tu mangka nanii torro nene’ to dolona; manassa la torro lan, la tau iato mai la anakna la mintu’ lanto mimi’na sae lakona, na Daud, taungKu, la napoarung sae lakona.
26La untananNa’ misa’ basse kasikaeloan sola tau iato mai, anna dadi misa’ basse tontong sae lakona; sia la Kukamasean misa’ inan sia la Kupopemba’ka’ na iatu inan maindanKu la Kupatontong bendan lan lu tangngana sae lakona.
27Iatu inanKu la dio tau iato mai; la napoKapenombanNa’ tu tau iato mai sia la Kupotau.
28Anna tandai mintu’ bangsa, kumua Akumo tu PUANG, tu umpamarimbangan to Israel, belanna iatu inan maindanKu bendan dio lu tangngana tontong sae lakona.