Dual Panel1Mangkato nabaamo’ tama bilik kapua, anna suka’i tu rinding tembo’ annan siku tu babana indena mai, na annan suku tu babana diona lu, iamoto tu baba tenda.
2Iatu babana lalan tama sangpulo siku, na iatu sa’dena patomali silimang sikuan. Nasuka’ duka tu lambe’na bilik kapua: patangpulo siku, sia babana: duangpulo siku.
3Malemi tama bilik lanna lu, nasuka’i tu rinding tembo’ lalan tama: duang siku kambanna, sia iatu lalan tama: annan siku babana na iatu baba dio sa’de lalan tama: pitung siku.
4Mangkato nasuka’mi tu lambe’na bilik lanna lu: duangpulo siku na babana duangpulo siku, siunduk sa’de bilik kapua; anna ma’kada lako kaleku nakua: Iamote tu inan tarru’ maindan.
5Nasuka’mi tu rinding tembo’ Banua iato: annan siku kambanna na iatu baba bilik dipasikande Banua patangsiku, untikui Banua male.
6Iatu bilik dipasikande banua tallung kalada’ langngan sitodo’, tallungpulo bilik. Ke sangtibangoi; iatu rinding tembo’ Banua tiku lao dipakurang, nanii balok bilik dipasikande banua kumua naden inan dinii umpale’ke’i tu balok, belanna tae’ nadilo’poran tama tu rinding tembo’ Banua.
7Iatu bilik dipasikande Banua untikui banua male salangngan-langnganna sakalua’-lua’na; iatu bilik dipasikande Banua sitodo’-todo’ langngan untikui banua male; susimoto tu Banua iato salangngan-langnganna sakalua’-lua’na; ma’din tu tau kendek diong mai kalada’ diongna lu unnola kalada’ tangnga sae langngan kalada’ daona lu.
8Kutiro den kalada’ dio Banua tiku lao, tu napoparandangan bilik dipasikande Banua; iatu langka’na ganna’ misa’ tekken pesuka’: annan siku sae lako pa’pasitammuan.
9Iatu kambanna rinding tembo’, salian bilik dipasikande Banua limang siku, susi dukato tu baba kalada’ torronapa. Dio alla’na bilik dipasikande Banua.
10Sia bilik to mentoe duangpulo siku tu babana, tiku lao Banua.
11Iatu lalan tama bilik dipasikande Banua tassu’ lako kalada’ torronapa; iatu misa’ lalan ma’palurekke na misa’ lalan ma’palusau’; iatu baba kalada’ torronapa tiku lao limang siku.
12Iatu mai Banua dipabendan siupu’ tana lapang dio rampe matampu’ pitungpulo siku babana na iatu rinding tembo’na tiku lao limang siku kambanna; na iatu lambe’na kasera pulona siku.
13Nasuka’mi tu Banua, iatu lambe’na saratu’ siku; ia duka tu tana lapang sola Banua sola rinding tembo’na saratu’ siku lambe’na.
14Na iatu tingayo Banua sia tana lapang dio rampe matallo saratu’ duka siku babana.
15Nasuka’ duka lambe’na tu Banua siupu’ tana lapang, dio boko’na, sia mintu’ sarambi daoanna patomali: saratu’ siku. Anna suka’i tu Banua Kabusungan lanna lu sia sarambi tarampak;
16iatu ampang sia pentiroan, tu ditaralii, sia sarambi daoan untikui tallui tu inan iato – sitingoan tu ampang tiku lao dilapik kayu –, iatu sali sae lako pentiroan, ditutu’i,
17sia iatu inan daona lu lalan tama sae lako bilik lanna lu, sia dio salian dio mintu’ rinding tembo’ tiku lao, tu lanna lu sia iatu salianna.
18Den karubion sia koroma dipalakoanni, dipasialla’, misa’ koroma na da’dua karubion; iake misa’oi karubion da’dua tu lindona:
19iatu ma’rupa lindo tolino mentingo lako koroma indena mai na iatu ma’rupa lindo singa mentingo lako koroma diona lu. Iatu panggaraga iato dipadio nasang Banua iato tiku lao.
20Randuk diong mai sali sae lako daona lu lalan tama dipalakoi mintu’ karubion sola koroma, iamotu dio rinding tembo’ Banua Kabusungan.
21Iatu Banua Kabusungan ma’kalada’ a’pa’ tu mai ampangna. Iatu tingayo inan maindan susi duka rupanna to.
22Iatu inan pemalaran kayu digaraga, tallung siku langka’na na duang siku lambe’na; iatu tetukna sia lette’na sia rindingna kayu nasang. Ma’kadami lako kaleku nakua: Iamote tu meda tu bendan dio oloNa PUANG.
23Iatu Banua Kabusungan na inan maindan den ba’bana da’dua.
24Iatu ba’ba iato den tu tutu’na da’dua tu ma’din tigirik, da’dua tutu’na tu misa’ ba’ba na da’dua tu misa’nao.
25Dio duka, iamotu dio ba’ba Banua Kabusungan, dipalakoi karubion sia koroma, susi dukato tu rinding tembo’ dipalakoi. Den papa sape kayu dio salian dio tingayo sarambi.
26Sia den pentiroan ditaralii sia koroma dio sa’de sarambi patomali, dio bilik dipasikande Banua sia dio papa sape.