Dual PanelBabangan sia tarampakna Banua Kabusungan ba’ru
1Iatonna taun ma’penduangpulo llima kadipalirangki, tonna pamulanna taun iato, allo ma’pessangpulona bulan iato, iamo tonna taun ma’pessangpulo a’pa’na kamangkanna sanggang tu kota, allo ia bangsiato nata’paina’ limanNa PUANG, anNa solanna’ inde to lako:
2Lan patiro mendeata, tu Napaombo’ Puang Matua, Nasolammo’ lako tondok Israel, anNa patorrona’ dao buntu tarru’ malangka’, tu nanii bendan misa’ apa susi kota, rampe lo’na lu.
3Iatonna mangkamo ussolanna’ inde to lako, kutiromi inde to dio tu misa’ muane, susi tambaga rupanna, naden ulang lenang sia tekken pesuka’ lan limanna; bendan lan babangan.
4Ma’kadami tu muane iato lako kaleku nakua: e ma’rupa tau, pata’pai matammu sia tananni talingammu sia paninaai tu mintu’na la Kupatiroangko; belanna la dipatiroangko tu iannato, iamoto mudibaa sae indete. Pa’peissananni tu mintu’ apa la mutiro lako to Israel.
5Manassa iatu dio lu saliananna mintu’ banua iato nalilingi misa’ rinding tembo’ tiku lao. Iatu tekken pesuka’ natoe muane iato, pennannan siku – iake sangsikuoi dipamanassa sangsiku ssangpala’ –; nasuka’mi tu kambanna rinding tembo’ iato: iamotu misa’ tekken pesuka’ sia langka’na misa’ tekken pesuka’.
6Rampomi lako to’babangan, tu mentingo lako rampe matallo, anna kendek langngan eranna, nasuka’i tu ampang babangan, den misa’ tekken pesuka’ sangka’na sia ia duka tu ampang senga’na, den misa’ tekken pesuka’ sangka’na.
7Iatu mintu’ bilik misa’ tekken pesuka’ landona sia misa’ tekken pesuka’ sangka’na, na iatu alla’na lima siku; iatu ampang babangan siupu’ sarambi babangan lanna lu misa’ tekken pesuka’.
8Mangkato nasuka’mi tu sarambi babangan lanna lu, den misa’ tekken pesuka’.
9Nasuka’mi tu sarambi babangan den karua siku sia rinding tembo’na, den duang siku kambanna; na iatu tarampak babangan rampe tamanna banua.
10Iatu mai bilik babangan, tu mentingo lako rampe matallo tallu rampe indena mai, tallu rampe lakona, pada nasangi suka’na tu tallu; na iatu rinding tembo’ rampe indena mai sia iatu rampe lakona, pada nasangi suka’na.
11Nasuka’mi tu baba babangan, den sangpulo siku; iatu lando babangan, den sangpulo tallu siku.
12Dio tingayo bilik iato den tu sapa’, sisangsiku, na misa’ siku tu sapa’ rampe lakona, na iatu mintu’ bilik annan siku tu lambe’na sia babana.
13Nasuka’mi tu babangan, dio mai to’ pato’doan bilik misa’ sae lako to’ pato’doan bilik sangbalinna unturu’ ba’ba sitingoan, den duangpulo llima siku babana.
14Nasuka’ susi dukato tu lentong, annan pulona siku, sia dio to’ lentong nanii tu tarampak untikui tu babangan.
15Randuk dio mai tingo babangan, dio mai lalan tama sae lako tingo sarambi babangan lanna lu, den limangpulo siku.
16Iatu mai bilik sia rinding tembo’ den pentiroanna, titutu’ bang ditaralii, tu ma’palutama, dio babangan tiku lao; susi dukato dio lu mintu’ sarambi; iatu pentiroan ma’palutama tiku lao, na dio to’rinding tembo’ den koroma.
17Attu iato nabaamo’ lako tarampak dio salian, kutiromi dio den bilik, sia den sali batu digaragai dio, tiku lao mintu’ tarampak; den tallungpulo bilik dao sali iato.
18Iatu sali iato dio sa’de babangan, situru’ landona babangan iato mai; iamotu sali diongna lu.
19Mangkato nasuka’mi tu alla’na tingayo babangan diongna lu sae lako tingayo tarampak lanna lu rampe salianna, den saratu’ siku, dio rampe matallo sia dio rampe daanna lu.
20Ia duka tu babangan, ma’palurekkena, dio tarampak dio salian, nasuka’ tu lambe’na sia sangka’na.
21Iatu bilikna tallu tu indena mai sia tallu tu lu lakona, rinding tembo’na sia sarambinna pada suka’na tu babangan bunga’na, limangpulo siku tu lambe’na na duangpulo llima siku tu babana.
22Ia duka tu pentiroanna sia sarambinna sia koromana pada suka’na tu babangan ma’palulako rampe matallo; iake kendekki tu tau langngan pitu pellesean diolai, na iatu sarambi dio tingayona.
23Den duka babangan dio tarampak lanna lu sitingoan babangan ma’palurekke, susi dio babangan, ma’palulako rampe matallo; nasuka’mi dio mai to’ babangan lako babangan misa’ saratu’ siku.
24Nasolanna’ ma’palusau’, kutiromi inde to dio den misa’ babangan ma’palusau’. Nasuka’mi tu rinding tembo’na sia sarambinna, pada suka’na tu dolona.
25Den pentiroanna tiku lao, susi duka dio sarambinna, pada bang tu pentiroan ina’; limangpulo siku tu lambe’na sia duangpulo llima siku tu babana.
26Iake kendekki tu tau langngan pitu pellesean diolai; na iatu sarambi dio tingayona sia dio to’rinding tembo’ den koroma.
27Sia den duka misa’ babangan dio tarampak lanna lu rampe lo’na lu; nasuka’mi dio mai to’ babangan lako babangan misa’ saratu’ siku.
28Mangkato nabaana’ tama tarampak lanna lu; unnola babangan rampe sau’na, sia nasuka’ tu babangan rampe sau’na, pada suka’na, tu ina’na.
29Ia duka tu bilikna sia rinding tembo’na sia sarambinna pada suka’na tu ina’na; den pentiroanna tiku lao, susi duka dio tarampakna, limangpulo siku tu lambe’na sia duangpulo llima siku tu babana.
30Sia den duka sarambi tiku lao, lambe’na duangpulo llima siku na babana lima siku,
31na iatu sarambinna mentingo lako tarampak dio salian sia den tu koroma dio to’ rinding tembo’na sia karua pellesean dio ampangna langngan.
32Nabaamo’ tama tarampak lanna lu dio rampe matallo, anna suka’i tu babangan, pada suka’na tu ina’na;
33sia iatu mai bilikna sia rinding tembo’na sia sarambinna pada suka’na tu ina’na. Den pentiroanna tiku lao, susi duka dio sarambinna; limangpulo siku tu lambe’na sia duangpulo llima siku tu babana.
34Na iatu sarambinna dio rampe tarampak dio salian; sia den tu koroma dio to’rinding tembo’na patomali, sia karua pellesean dio ampangna langngan.
35Nabaamo’ lako babangan rampe daanna lu, anna suka’i, pada suka’na tu ina’na,
36sia iatu mai bilikna sia rinding tembo’na sia sarambinna; den pentiroanna tiku lao; limangpulo siku tu lambe’na sia duangpulo llima siku tu babana.
37Na iatu sarambinna dio rampe tarampak dio salian; sia den tu koroma dio to’rinding tembo’na patomali, sia karua pellesean dio ampangna langngan.
38Den misa’ bilik, iatu ba’bana dao to’rinding tembo’; inde to nanii tau umbasei tu pemala’ ditunu pu’pu’.
39Nalan sarambi babangan nanii bendan da’dua meda, misa’ indena mai namisa’ diona lu, tu nanii tau untunu pemala’ ditunu pu’pu sia suru’ pengkalossoran sia suru’ pangakuan sala.
40Na dio sa’dena, dio salian, tu nanii tau kendek langngan lalan tama babangan dio rampe daanna lu, den meda da’dua, na dio sa’de senga’na sarambi babangan den duka da’dua meda.
41Den meda sia’paran dio sa’dena patomali tu babangan iato; karua meda, nanii tau mantunu dao.
42Iatu a’pa’ meda dinii untunu pemala’ ditunu pu’pu’, batu dipa’ digaragai, lambe’na sangsiku ssangtangnga, babana sangsiku ssangtangnga, na langka’na sangsiku; dao meda iato nanii tau umpatorro pareanan, tu napake untunu pemala’ ditunu pu’pu’ sia pemala’ pangrere’.
43Iatu pekadang sangpala’ sangka’na dipala’ka’ lako banua tiku lao; iatu duku’ pemala’ dipatorro dao meda.
44Na dio rampe salianna babangan lanna lu den da’dua bilik dio tarampak lanna lu, misa’ dio sa’dena babangan rampe daanna lu, mentingo sau’, na misa’ dio sa’dena babangan rampe lo’na lu, mentingo rekke.
45Ma’kadami lako kaleku, Nakua: Iate bilik mentingo sau’ la nanii mintu’ to minaa, tu untoe pentoean lan Banua Kabusungan.
46Na iatu bilik mentingo rekke la nanii mintu’ to minaa, tu untoe pentoean dio to’ inan pemalaran; iamotu bati’na Zadok, ia manna bati’na Lewi tu ma’din umpengkareke’i PUANG la umpengkaolai.
47Mangkato nasuka’mi tu tarampak; iatu lambe’na saratu’ siku na babana saratu’ siku, pada sappa; na iatu inan pemalaran iato bendan dio tingo Banua.
Banua Kabusungan ba’ru
48Mangkato nabaamo’ tama sarambi Banua, anna suka’i tu rinding tembo’ sarambi, limang siku indena mai na limang siku diona lu, sia babana sitallung sikuan patomali.
49Iatu lambe’na sarambi iato duangpulo siku na babana sangpulo misa siku, ke disuka’i dio to’ pellesean, tu nanii tau kendek langngan. Na dio to’ rinding tembo’ patomali nanii bendan lentong.