Dual Panel1Attu iato saemi tu mintu’ pa’barani, iamotu Yohanan, anakna Kareah, sia Azarya, anakna Hosaya, sia mintu’ to buda, la to bitti’ la to kapua,
2anna ma’kada tu tau iato mai lako nabi Yeremia, nakua: Iake nakalo’i penaammi tu pengkamoyaki, ammi passambayangkan lako PUANG, Kapenombammi sola te mintu’ tau, tu torronapa, belanna sidi’morakan torro dio mai tu mintu’ to buda, susite mitiro totemo.
3Kumua anna PUANG, Kapenombammi, umpokadangkan lalan umba tu sipatu la kiola sia apa tu sipatu la kipogau’.
4Mebalimi nabi Yeremia lako tau iato mai, nakua: Kuturu’mo tu palakummi; manassa la massambayangna’ lako PUANG, Kapenombammi, susitu kadammi, sia iatu mintu’ kada tu Napebalian PUANG lako kalemi, la Kupokadangkomi; moi sangbuku kada tae’ angku la umbuniangkomi.
5Nakuami tu tau iato mai lako Yeremia: Na PUANG mora tu sa’bi tonganki sia maruru’, ke tae’i kipogau’i tu mintu’ kada, tu Nasuangkomi PUANG, Kapenombammi, la umparampoi lako kaleki.
6Moi namelo ba’tu kadake la kituru’ duka tu kadanNa PUANG, Kapenombanta, tu kinii ussuakomi totemo; kumua angki makarimman ke kituru’i tu kadanNa PUANG, Kapenombanta.
7Iatonna sangpulomo allona saemi kadanNa PUANG lako Yeremia.
8Natambaimi Yeremia tu Yohanan, anakna Kareah sia iatu mintu’ pa’barani nasolan sia iatu mintu’ to buda la to bitti’ la to kapua.
9Sia nakua lako tau iato mai: Nakua kadanNa PUANG, Kapenombanna to Israel, tu minii ussuana’ umpennoloan passambayangmi dio oloNa.
10Iake mareso’komi torro lan padang iate, la Kubangunkomi sia tae’ Kula urro’pokkomi, sia la Kutanan sia tae’ Kula undu’dukkikomi, belanna Kupenassannimo tu kakadakean mangka Kupogau’ lako kalemi.
11Da mimataku’ lako datu Babel, tu mikataku’, da mikataku’i, kadanNa PUANG, belanna Aku urrondongkomi la urrande pala’komi sia la urrampanangkomi lan mai limanna.
12Sia la Kukaturu-turuikomi, anna maturu-turu lako kalemi, anna patorrokomi lan padangmi.
13Apa iake mikuai: Manokakanni torro lan tondok iate, miurunganni manoka unturu’ kadanNa PUANG, Kapenombammi,
14sia ma’tangnga’komi mikua: Tae’, la malekanni lako tondok Mesir, tu tang kinii untiro rari ba’tu urrangi oni napiri tanduk, sia tae’ kitangdia’ ungkaduangi roti sia diomo la kinii torro,
15iamoto perangiimi totemo tu kadanNa PUANG, e kamu tu torronapa dio mai to Yehuda, kadanNa PUANGna mintu’ ma’dandan maritik, Kapenombanna to Israel, kumua: Iake mipalulakoi Mesir tu lindomi sia la male lako la mentiruran dio,
16manassa iatu pa’dang mikataku’, la nalambi’komi sia karorian tu mikataku’, la unnula’komi sia la mate dukakomi dio Mesir.
17Manassa iatu mintu’ to la male umpatu tondok Mesir, la torro mempue dio, la mate nakande pa’dang sia karorian sia ra’ba biang, na moi misa’ tae’ len tilendok ba’tu lappa’ dio mai kamandasan tu la Kuparampoanni.
18Belanna nakua kadanNa PUANGna mintu’ ma’dandan maritik, Kapenombanna to Israel: Susitu kasengkeangKu sia kare’dekanna ara’Ku tibarrakmo lako to lan Yerusalem, susi dukamoto tu kare’dekanna ara’Ku la tibarrak lako kalemi, ke malekomi lako Mesir, ammi dadi tampakan ropu sia to metakuran sia sapuan pala’ sia kaditattan sia tang la mitiromo te inan iate.
19Ma’kadamo tu PUANG lako kalemi, e kamu mintu’ to Yehuda tu torronapa: Da mimale lako Mesir! La miissan melo kumua kupakilala tongankomi.
20Belanna umpakenakomi kalemi miurungan sisayuran katuoammi tommi suana’ lako PUANG, Kapenombammi ammi ma’kada kumua: Passambayangangkan langngan PUANG, Kapenombanta, sia mintu’ tu kadanNa PUANG, Kapenombanta, la mipokadangkan, manassa la kituru’.
21Belanna kupokadangkomi totemo, apa manokakomi umperangii tu kadanNa PUANG, Kapenombammi, iamotu mintu’ apa Nasuanna’, umparampoangkomi.
22Iamoto la miissan tongan, kumua la matekomi nakande pa’dang sia karorian sia ra’ba biang dio to’ inan miporai minii male mentiruran dio.