Dual PanelNaparandukomo to Yehuda umpenombai datu baine dao langi’
1Iatu kada urrampoi Yeremia la dipokadan mintu’ to Yehuda, tu torro dio tana Mesir, iamotu dio lu Migdol, dio Tahpanhes, dio Memfis sia dio lu lili’na Patros, nakua:
2Inde sia tu kadanNa PUANGna mintu’ ma’dandan maritik, Kapenombanna to Israel, Nakua: Mitiromo tu mintu’ kamandasan tu Kuparampoan Yerusalem sia mintu’ kota Yehuda – manassa allo iate daun lauammo sia moi misa’ tau tae’ torro las-
3natumang kakadakeanna tau iato mai, tu napogau’ la umpa’dikki penaangKu, belanna male memala’ sia mengkaola lako kapenomban senga’, tu tae’ lenpa natandai, iamotu tau iato mai, la kamu la nene’ to dolomi.
4Moi Kusuamo lako tau iato mai tu mintu’ taungKu, iamotu mai nabi, ke makale’ sia ke karoen umpokadanni kumua: Da mipogau’i te apa megallian iate, tu Kukagi’gi’!
5Apa tang naperangii tu tau iato mai sia tae’ natananni talinga, kumua anna mengkatoba’ dio mai kakadakeanna sia da namemala’ lako Kapenomban senga’.
6Iamoto anna tibarrakmo kare’dekanna ara’Ku sia kasengkeangKu, sia ma’lana-lana lan lu mintu’ kota Yehuda sia dio lu batatta Yerusalem, naurungan daun lauan nasangmo, sia mempadang lo’bangmo susite allo iate.
7Iamoto nakua kadanNa PUANGna mintu’ ma’dandan maritik, Kapenombanna to Israel: Ma’apari mikadakei tonganri tu katuoammi, ammi mangsananra kalemi la muane la baine la pia la pia’-pia’ ma’susu dio lu to Yehuda, naurungan tae’mo torrona mitampean kalemi?
8Sia mipa’dikki tu penaangKu diona mintu’ panggaraga limammi, belanna memala’komi lako kapenomban senga’ dio tana Mesir, tu miniimo male la mentiruan, ammi dadimo tampak ropu sia kaditattan dio lu mintu’ bangsa dao kuli’na padang.
9Tae’moraka mikilalai tu kakadakeanna mintu’ nene’ to dolomi sia mintu’ datu to Yehuda sia arungna sia kakadakeammi sia bainemi, tu napogau’mo dio tana Yehuda sia lan lu mintu’ batatta Yerusalem.
10Sae lako allo ia duka te tae’ namagiang tu penaanna tau iato mai sia tae’ namataku’ sia tae’ naturu’ Sukaran alukKu sia apa Kupondok, tu mangka Kupa’kamasean dio tingayomi sia dio tingayona nene’ to dolomi.
11Iamoto, kadanNa PUANGna mintu’ ma’dandan maritik, Kapenombanna to Israel: Tonganna la Kupatingoikomi lindoKu, la umparampoikomi tu kadakena, iamoto angKu pisanni tu mintu’ to Yehuda.
12La Kupisanni tu mintu’ to Yehuda torronapa tu mentingo la male lako tondok Mesir la mentiruran dio, sia la sanggang nasang dio tondok Mesir; iatu tau iato mai la tibambang nakande pa’dang sia nasanggang karorian; la to bitti’ la kapua la mate nakande pa’dang sia la dadi misa’ tampakan ropu sia apa metakuran sia sapuan pala’ sia kaditattan.
13Manassa la Kuukung tu tau iato mai tu torro lan tondok Mesir, susitu Yerusalem mangkamo Kuparampoi kandean pa’dang, karorian sia ra’ba biang.
14Sia iatu mintu’ to Yehuda torrona, tu malemo lako tondok Mesir, la mempue dio, moi misa’ tae’ tu la lappa’ ba’tu tilendok, kumua anna sule lako tondok Yehuda, tu nakamali’ la nanii torro, apa tae’ nala sule lako, sangadinna ia manna tu ba’tu pira-pira tau tu lussu’mo male.
15Attu iato mebalimi tu mintu’ muane unnissanni, kumua iatu bainena memala’ lako kapenomban senga’ sia mintu’ baine tu bendan inde to dio, iamo misa’ kasirampunan kapua, iamotu mintu’ tau tu torro dio Patros, lan tondok Mesir, ma’kada lako Yeremia nakua:
16Iatu kada mipokada lako kaleki tete dio sanganNa PUANG, tae’ kila umperangii.
17Sangadinna inang la kipogau’ bangmo kami tu mintu’ apa kipokada, iamotu memala’ lako datu baine dao langi’ sia umpennoloan pemala’ pantedok, susitu mangka kipogau’, la kami sia nene’ to doloki, la mintu’ datungki sia mintu’ arungki lan mintu’ kota Yehuda sia dio lu batattana Yerusalem; attu iato ungkandekan roti sadia’ki sia manamanmokan sia tang untirokan kasanggangan.
18Apa iatongki torroimi memala’ sia umpennoloan pemala’ pantedok lako datu baine dao langi’, kapu’duran dukakan tu mintu’ apa sia napisanni dukakan kandean pa’dang sia karorian.
19Sia iake memala’kan sia umpennoloan pemala’ pentedok lako datu baine dao langi’, tae’raka naissanni muaneki to, ke kigaraganni pa’ranggina susi rupanna sia umpennoloanni pemala’ pantedok?
20Ma’kadami Yeremia lako mintu’ tau iato mai, iamotu lako mintu’ muane sia baine sia mintu’ tau iato tu umpebalii susito ina’, nakua:
21Iatu mintu’ pemala’ mipogau’ lan lu tondok Yehuda sia dio lu batattana Yerusalem, la kamu la nene’ to dolomi sia mintu’ datummi sia iatu mai arungmi na mintu’ pa’tondokan, tang Nakilalairaka PUANG sia tang Napokarianganraka?
22Naurungan tang Naattamo PUANG untiroi tu iannato belanna kakadakeanna mintu’ penggaurammi sia belanna mintu’ penggauran megalliammi; iamoto na iatu tondokmi daun laurammo sia metakuran sia tampakan ropu, naurungan moi misa’ tau tae’mo umpa’tondokki, susite allo iate.
23Belanna memala’komi sia umpogau’komi kasalan lako PUANG sia tae’ mituru’i tu kadanNa PUANG sia tae’ mipeolai tu Sukaran alukNa sia tu mai apa Napondok sia iatu mintu’ kasa’bianNa, iamo bannangnato namintu’ kakadakean iate urrampoikomi, susite allo iate.
24Sia nakuapa Yeremia lako mintu’ tau iato mai sia lako mintu’ baine iato: Perangiimi tu kadanNa PUANG, e kamu mintu’ to Yehuda tu dio lu Mesir.
25Nakua kadanNa PUANGna mintu’ ma’dandan maritik, Kapenombanna to Israel, kumua: Iatu kamu sola bainemi, nasa’bu’mo randan pudukmi sia mipogau’mo tu apa mipokada, kumua: Manassa la kibuai tu mintu’ pangallonan mangka kiallu’, iamotu memala’ sia umpennoloan pemala’ pantedok lako datu baine dao langi’. Buai bangmi tu pangallonammi sia pogau’mi susitu pangallonammi.
26Iamoto perangiimi tu kadanNa PUANG, e mintu’ to Yehuda, tu torro dio tondok Mesir: Tonganna umposumpaNa’ sangangKu, tu mandu pasareongan, kadanNa PUANG kumua: Moi misa’ to Yehuda tae’mo nasa’bu’i randan pudukna tu sangangKu, nakua: La lelukraka tuoNa Puangta PUANG!
27Tonganna Kutiro tu tau iato mai narampoi kadake, tangia melona, naurungan sabu’ tu mintu’ to Yehuda dio lu Mesir nakande pa’dang sia karorian sae lako mangsan nasang tu tau iato.
28Iatu tau la tilendok dio mai kandean pa’dang sia la sule dio mai tondok Mesir lako tondok Yehuda, la sidi’ri bilanganna; namintu’ to Yehuda torronapa, tu saemo lako Mesir la mentiruran dio, iamo la untandai umba tu la dadi, kadangKuraka ba’tu kadannaraka tu tau iato mai.
29Iamote la dadi misa’ tanda lako kalemi, kadanNa PUANG, umpamanassai kumua la Kuukungkomi dio inan iato, ammi issanni, kumua iatu mintu’ kadangKu inang la dadi ammi posanggangi.
30Nakua kadanNa PUANG: Manassa la Kusorong tu Firaun Hofra, datu Mesir, tama limanna mintu’ ualinna sia tama limanna mintu’ to undaka’ lalan la umpatei, susi Zedekia, datu to Yehuda Kusorong tama limanna Nebukadnezar, datu Babel, ualinna, tu undaka’ lalan la umpatei.