Alkitab Mobile SABDA
[VER] : [TORAJA]     [PL]  [PB] 
 <<  Yesaya 11 >> 

Iatu parentana Messias sumpu marampa’

1La mentaruk tu garempongna Isai sia mellolo namembua tu taruk uaka’na.

2Ia la Nanii ta’pa PenaanNa PUANG, iamotu Penaa kakinaan sia tangnga’ kinaa, Penaa pa’timbangan sia kamatotoran, Penaa kapaissanan sia kamatakuran lako PUANG.

3Iamo pa’poraianna tu ungkataku’ PUANG. Tae’ anna la ma’paolai salu unturu’ pentirona sia tae’ anna la mangra’ta’ unturu’ paranginna.

4Sangadinna iatu to bitti’ la napaolai malolo salunna sia nasanda tonganni situang kamalamburan tu to umpamadiong penaanna; apa tete dio pebamba tongka’ dililana la napa’dikan lino, sia penaa sun dipudukna la napateanni tu to tang mekaaluk.

5La umpopa’bakkan kamaloloan sia la umpotambeke’ kamarurusan.

6Attu iato guruk la sikananaran anak domba, sia iatu arimau buluh sanglengaran bembe’ laki’-laki’, na iatu anak sapi sia anak singa sia sapi passoma la sangbala sia pia’-pia’ la umpasangkambiranni.

7Attu iato beruang birang sola sapi la sibaa ungkande riu sia iatu mai anakna sibaa unno’ko’, sia iatu singa la ungkande dalame susi sapi.

8Attu iato iatu pia sumusupa la maningo dio to’ baba to’tok ula’ rame sia iatu pia mane sarak susu unnulu limanna tama lo’ko’ ula’ keipo.

9Tae’mo tau la umpogau’ kakadakean ba’tu la umpabu’tu mesangganginna dao lili’na buntu maindanKu. Belanna la naponnoi kapaissanan diona PUANG tu mintu’ lino susi uai buda ussamboi salinna tasik.

10Allo ia dukato anna iatu taruk uaka’na Isai la tulangdan napobate-bate mintu’ bangsa sia la napengkaa’i mintu’ to sangpetayanan; sia iatu inan nanii mari’pi la mala’bi’.

To Israel mala’bi’ sule

11Allo ia dukato la dadi kumua Puang la unnete’ pole limanNa la ulla’bakki sule tu taunNa tu mai torronapa, tu mai torronapa dio Asyur, dio Mesir, dio Patros, dio Etiopia, dio Elam, dio Sinear, dio Hamat na dio lu tondok ma’randan tasik.

12La Naangkaran bate-bate tu mintu’ bangsa sia la Napasipulung sae tu mintu’ to Israel mangka diula’i male, sia la Napopa’misa sule dio mai tetuk a’pa’na lino tu mintu’ baine to Yehuda mangka dipatisambo’-sambo’.

13Attu iato la pa’de kamagallianna Efraim sia iatu to ussussai Yehuda la diroto’i; tae’mo anna la ungkagalli Efraim tu Yehuda sia tae’mo anna la ussussai Yehuda tu Efraim.

14Sangadinna la sanginaa sola duai la ma’palulako matampu’ undammak palempengna to Filistin, anna pangrampai tu to rampe matallo; iatu limanna la ussabak to Edom sola to Moab sia mintu’ to Amon la mengkanorong lako kalena.

15La Nagatai PUANG tu tasik mengkokona Mesir sia la Naaak lima tu Salu iato anna marangke napobua’ anginNa, sia la Napopempitu tu salu iato, sia Napalingkai tau ma’sepatu.

16Attu iato la den tu batatta naola taunNa tu torrona siapa, iamotu torrona siapa dio Asyur, susito pirambongi’ dipadenan to Israel tonna tassu’ lan mai tondok Mesir.


  Share Facebook  |  Share Twitter

 <<  Yesaya 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran