Dual PanelPa’nubua’ diona Etiopia
1A’a dikka’ tu tondok naba’bakki kasisi’, tu nabala salu Etiopia,
2tu ussua sumbungan puduk ullamban tasik, ma’lembang tallang unnola salu. Malekomi, e lentek maringan lako misa’ bangsa kalando sia pandillak, lako bangsa masarrang sia patengko lullu’, sia iatu padangna naruak tangnga salu.
3E kamu mintu’ issinna lino sia mintu’ to untorroi kuli’na padang, iake naosokki tau tu bandera dao ma’buntunna, sipatu la mitiro, sia iake dipannonii tu napiri tanduk, sipatu la miperangii.
4Belanna nakua tu kadanNa PUANG lako kaleku: La mari’piNa’, angKu ma’penunu lan mai inanKu, susi ke mapana’i sarrang allo, sia susi rambu roya ke mapana’i allo lan attu peparean.
5Belanna iake tae’pi anna pebuanna, ke rondon nasangmi tu ta’binna bua anggoro’ mamata, attu iato la Natarotoi piso Puang tu mintu’ tangke membuanna sia Nata’takki anNa tibei tu mintu’ ongi’na.
6Mintu’na tau iato mai dipatorroan manuk-manuk pa’duku’ dao lu buntu sia olo’-olo’ lan kuli’na padang, anna torro dao tu manuk-manuk pa’duku’, ke pealloanni sia mintu’ olo’-olo’ lan kuli’na padang torro dao, ke attu kamadinginan.
7Attu iato la umpennoloan ba’tu pira-pira pamengan lako PUANGna mintu’ ma’dandan maritik tu bangsa kalando sia pandillak, misa’ bangsa dikataku’ tiku lao, misa’ bangsa masarrang sia patengko lullu’ sia iatu padangna naruak tangnga salu-napennoloan lako to’ inan nanii sanganNa PUANGna ma’dandan maritik, iamotu buntu Sion.