Dual PanelDiona parenta marampa’ la bu’tu undinna
1Inde sia tu kada, tu ombo’ lako Yesaya, anakna Amos, tu diona Yehuda sola Yerusalem.
2La dadi undinna, kumua iatu buntu nanii banuanNa PUANG, la bantang ten to buntu malangka’ untongloi mintu’ buntu, anna mintu’ bangsa lolong lako.
3Buda bangsa la ke’de’ male anna ma’kada nakua: Maikomi, anta male langngan buntunNa PUANG, langngan banuanNa Kapenombanna Yakub, anNa ada’iki’ tu diona mintu’ lalanNa, sia anta olai tu mai lalanNa, belanna lan mai Sion la nanii bu’tu sukaran aluk sia kadanna PUANG lan mai Yerusalem.
4Sia Ia la umpaolai salunna tu mai mintu’ bangsa sia urra’ta’ kara-karana mintu’ bangsa kapua; tau iato mai la’bo’na nagaraga tengko bassi, sia iatu dokena nagaraga sae’; iatu mai bangsa tang la umbua’mo la’bo’na la unnea bangsa senga’ sia tae’mo anna la melada’ tu tau parari.
5Maikomi, e bati’na Yakub, la lolang lanki’ arrangNa PUANG.
Mintu’ to matampo narampoi allo maparri’Na PUANG
6Apa Mitampemo tu taumMi, tu bati’na Yakub, belanna ponnomo aluk to rampe matallo sia umpogau’ balik mata susito Filistin sia sikadamak to salian lembang.
7Ponno salaka sia bulaan tu tondokna sia tang dipura tu mai iananna, sia ponno darang tu tondokna sia tang dikemba’ tu mai karetana.
8Sia ponno rapang-rapang dipodeata tu tondokna. Tau iato mai umpenombai panggaraga limanna sia panampa rangka’na.
9Susimoto nanii tu tau umpamatuna kalena sia iato mai muane umpamadiongan kalena, iamoto da Mipa’dei tu kasalanna tau iato mai.
10Mallaiko tama sapak batu, sia mallaiko rokko garuang umpembunian kametakuranNa PUANG sia kamala’biran kapayunganNa.
11Mintu’ patiro solo’na tau la dipamadiongan, sia kamatampoanna to mala’bi’ la dipampa lu rokko, anna allo iato PUANG manna tu la layuk misa.
12Belanna mangkamo Napamanassa PUANGna mintu’ ma’dandan maritik tu allo la urrampoi mintu’ to umpamadao penaanna sia to matampo sia mintu’ to ussattuan kalena, kumua anna dipampa lu rokko.
13Sia urrampoi mintu’ kayu arasi’ dio Libanon tu layuk sia malangka’, sia sininna kayu jati dio Basan.
14Sia urrampoi mintu’ malangka’na buntu sia layukna tanete.
15Sia urrampoi mintu’ menara malangka’ sia benteng tang dilambi’.
16Sia urrampoi mintu’ kappala’ Tarsis sia mintu’ ianan ballo.
17Allo iato la dipatunduk tu mintu’ kamasuangganna tolino sia la dipampa lu rokko tu mintu’ kamatampoanna pia muane, PUANG manna tu layuk misa.
18Mintu’ dipa’deatainna la pa’de nasang.
19Allo iato iatu mai tau la mallai tama lo’ko’ batu sia rokko garuang tu belanna kametakuranna kamala’biranna kapaanNa, ke ke’de’I umpatiramban mintu’ issinna lino.
20Allo ia dukato iatu mai tau la untibe mintu’ rapang-rapang dipodeata salaka sia bulaan tu nagaraga la napenombai, nabuangan balao sola ledo.
21Anna mallai tama lo’ko’ buntu batu sia sapak batu, tu belanna metakuranNa PUANG sia belanna kamala’biran kapayunganNa, ke ke’de’I umpatiramban mintu’ issinna lino.
22Dadi da’mo ammi sande’ lako tolino, tu den penaa lan illongna, belanna apara la dinii unnangga’i?