Dual PanelPa’nubua’ diona Mesir sola Etiopia
1Iatonna taun nasaean kamandang lompo lako Asdod, nasua Sargon, datu Asyur lao ullaoi anna taloi.
2Attu iato ma’kadami tu PUANG nalopian Yesaya, anakna Amos, Nakua: Maleko, lossokanni tu bayu lamba’ lan mai aakmu sia alai tu sepatummu. Napogau’mi susito anna male tang ma’bayu sia tang ma’sepatu.
3Ma’kadami tu PUANG, Nakua: Susitu taungKu Yesaya lolang tang ma’bayu sia tang ma’sepatu lan tallung taun tu napotanda sia napotoding la urrampoi Mesir sia Etiopia.
4Ten dukamoto tu Asyur la nasole’ male tu to Mesir dirampa sia tu to Etiopia diali’, to mangura to matua, tang ma’bayu sia tang ma’sepatu sia kakitanan tu palongko’na, tu napomasiri’na to Mesir.
5Attu iato la rosso tu tau iato mai sia la masiri’ untiro to Etiopia, pa’rannuananna, sia to Mesir, passattuananna.
6Sia iatu mintu’ pa’tondokan biring tasik allo iato la ma’kada nakua: Tiromi, susimoto te to tarannuan sia lako duka tanii mallai umpalaku pa’tunduan la dirampanan dio mai datu Asyur, umbara la takua tilendok te?