Dual PanelIatu kasibasseanna to Israel na to Mesir umbali pa’poraianNa PUANG
1Upu’ allona tu mai pia pabali-bali, kadanNa PUANG, belanna tau iato mai untampa kasiturusan, apa tang bu’tu lu dio mai Kaleku, sia untanan basse unnea apa bu’tu lan PenaangKu, la untompokki kasalan tu kasalan.
2Tu male rokko Mesir, apa tang umpekutanan kadangKu, la morai umpentilindungi Firaun sia la umpentionganni Mesir.
3Apa iatu paongananna Firaun la umpakasiri’komi sia iatu umpentionganni Mesir la mipokatellean.
4Iatonna saemo lako Zoan tu mai datunna sia mintu’ pesuanna rampomo lako Hanes,
5mintu’i la kasirisan nasang natumang misa’ bangsa tu tang umpabu’tuanni rongko’, sia tu tang umpabu’tuanni pa’tunduan ba’tu apa kebattuanna lako kalena, sangadinna siri’ manna sola kadibe’sean.
6Inde sia tu kada Napa’petang-gungan Puang Matua diona tu olo’-olo’ lo’ Pollo’na uai. Iatu padang nanii ponno kamaparrisan sia kamegiangan tu nanii singa birang sia singa laki sia ula’ rame sia naga mettia’; indemoto sau’ tu nanii umbaai nateke’ keledai tu eananna sia napadao palasa unta tu mai barang apanna, naban bangsa umpabu’tu apa tae’ gai’na.
7Iatu pa’tunduanna to Mesir, tae’ bua’na sia tae’ gai’na, iamoto angku gente’i: Rahab tu mari’pi bang unno’ko’.
8Maiko totemo, surasanni dio tingayona tau iato mai lako misa’ papan batu sia sura’i te lan misa’ luntara’ anna tontong sae lakona.
9Belanna iamote tu misa’ bangsa pabali-bali, pia kamorang-morang, pia tang umperangii Sukaran alukNa PUANG.
10Nakua lako mintu’ to pakita-kita: Da mipakita; sia lako mintu’ to patanda-tandan: Da mipatandangkanni tu tonganna, pokadangkanni tu apa kiporai sia pakitangkanni tu apa unnaran-narankan.
11Mallaikomi dio mai lalan, sepangkomi dio mai batatta; patoyangi tu To maserona to Israel dio mai tingayoki.
12Iamoto, nakua kadanNa To maserona to Israel: Belanna mitibe te kada iate sia mirannuan tu pa’pakario-rio sia pa’bulang leko’ sia sissarekomi lako,
13iamoto, iatu kasalan iate la dadi kasanggangan lako kalemi susitu ba’tu pira-pira batu la tuan dao mai rinding tembo’ malangka’, tu re’ba, tu tang dikapang anna ta’pa tuan.
14Sia tu ditesse susito unnisak-nisak balubu situang katangmamasean, na dio mai tu mintu’ tessena moi sangti’pek bibang tae’ dukamo la dipangalai roya api lan mai dapo’ ba’tu dipa’timban uai diong mai limbong.
15Belanna nakua kadanNa Puangta PUANG, tu To maserona to Israel: Tete dio pengkatobaran sia karapasan penaa mima’din dikarimmanni, iake mari’pikomi sia ussedan rannummi, iamo mipomatoto’, apa mengkailingkomi.
16Sangadinna mikua: Tangia, apa tete dio makkanarang angki la matira’; iamo tola mallai dukakomi; mikua: La ussakeikan darang malinta’; iamoto namintu’ tu to unnula’komi la malinta’ duka.
17Sangsa’bu tau la mallai belanna pa’pakarrangna misa’ tau sia tete dio pa’pakarrangna lima tau la mallaikomi, miurunganni torro butung to misa’ tanda dao bottona buntu sia susi misa’ tombi dao tanete.
Pangallu’ kasalamaran lako Sion
18Iamoto ma’tayan-tayan duka tu PUANG la ungkamaseikomi sia la bendan duka, anNa karimmannikomi, belanna PUANG iamo Puang Matua tu umpogau’ kamalamburan, maupa’ tu mintu’ to untayannI!
19E bangsa Sion, tu torro dio Yerusalem, tae’mo mila tontong tumangi’, manassa Ia la ungkamaseikomi, ke Narangii tu peongli’mi, ianNa rangii manassa Napebaliikomi.
20Moi anNa benkomi Puang tu roti kapussakan sia uai kamaparrisan, apa tae’mo anna la umbuni kalena tu mintu’ gurummu, sangadinna matammu duka la untiroi tu mintu’ gurummu.
21Iake la sepangkomi lako kairi ba’tu lako kanan, la murangi tu kada dipokada dio boko’mu, nakua: Iamote tu lalanna, la miolaimo.
22Attu iato la mubilang masareppak tu salaka sapu’na mintu’ rapang-rapang dipodeatammu tu dipa’ sia bulaan sapu’na mintu’ rapang-rapang dipodeatammu tu dipati’no’, sia la mutibean susito sampin marota’, ammu ma’kada: mallaiko.
23Puang la umpasaeanni uran tu banne muambo’ dio lu bela’mu, sia umpa’bengan roti bu’tu dio mai bura padangmu la mammi’ dikande sia ma’pamatoto’ sia allo iato mintu’ patuoammu la undaka’ kande dio lu padang malona’.
24Mintu’ sapi sia keledai tu dipa’tengkoan la ungkande apa mapi’da, tu mangkamo dita’pii barang sia diseno senoan.
25Sia dao lu mintu’ buntu malangka’ sia dao lu mintu’ tanete madao, la nanii duka salu’-salu’ sia uai kapua, ke allo kasaburan kapua, ke ro’pokmi tu mintu’ menara.
26Attu iato arrang bulan masero la susi arrang mata allo mapannang sia arrang mata allo la pempitu parrangna pada to arrang allo pitung allo, iamoto ke allo Nanii PUANG umbimbinni tu bangkena taunNa sia umpamondo mintu’ kama’la’poan lalan pa’bambaNa.
UkunganNa Puang Matua la urrampoi Asyur
27Iatu sanganNa PUANG sae mambela, – iatu kasengkeanNa ma’lana-lana naturu’ gaun makamban, iatu pudukNa naponnoi kamagi’giran sia iatu lilaNa susito api ma’kande pu’pu’.
28Iatu penaanNa susito salu luang, angge baroko tu uainna, la usseno mintu’ bangsa diong senoan kasanggangan sia la ussanga’ mintu’ bangsa tu la umpapusa tau iato mai.
29Apa dio kalemi den pa’pudi-pudian butung to bongi dinii umpakaraya pa’gauran sia iatu kasendean penaa susito ma’lengkoan unturu’ oni suling, la lu lako buntunNa PUANG, lako Buntu batunna to Israel.
30Attu iato la umpa’perangian gamara mandu mala’bi’Na tu PUANG sia umpa’pekitanan takia’Na tu songlo’ situang kasengkean ma’lulu-lulunNa, sia dukku api ma’kande pu’pu’, sola uai saba’ sia angin bara’ sia uran batu.
31Belanna tete dio gamaranNa PUANG natiramban dako’ tu Asyur, iake Nabambai tekken Puang.
32Mintu’ pa’bamban Naayakan PUANG lako Asyur naturu’ oni ganda’-ganda’ sola katapi, sia Naayakan tu takia’Na la urrarii.
33Belanna masaimo tiparandan tu inan pantunuan lako tau iato mai sia lako duka datunna; maluangan sia mandalan tu Nagaragai dapo’, na kapua tu api sia ma’toppo’-toppo’ tu kayu; iatu penaanNa PUANG lolong susi solo’ la umballai.