Dual PanelDiona kadatuanna Messias
1Tonganna misa’ datu la ma’parenta unnallonni kamaloloan sia mintu’ arung la untoe parenta, tang pakayun bimbang.
2Tau iato la susi pentirerungan dio mai angin bara’ sia pentilindungan dio mai uai luang sia butung to salu’-salu’ dio padang ba’ta’ sia susi bayo-bayo buntu batu kapua dio padang karangkean.
3Attu iato iatu matanna to pakita tae’mo apa ussiloi, sia iatu talinganna to parangi la ma’perangi;
4sia penaa to tang mengkilala la untandai kapaissanan sia lila tang ra’pa’ ma’kada la matira’ ma’kada sia maleso.
5Iatu to baga tae’mo nala disanga to la’bi’ sia to lando pa’du tae’mo nala disanga to kapua.
6Belanna iatu to baga ma’kada baga sia iatu penaanna umpabu’tu kakelokan: la umpogau’ katangmekaalukan sia umpatale’ kasorong-bokosan dio mai PUANG sia tang ussaile to tangdia’ sia tae’ napairu’i tu to ma’rang.
7Iatu to pa’pakenan, kadake tu mintu’ tangnga’na: kabulitukan manna natangnga’, ma’kada tang tongan la ussanggangi to bongko, moi anna tuntun salunna tu to bongko.
8Apa iatu to la’bi’ untangnga’ penggauran mala’bi’ sia bantang umpangeai tu apa mala’bi’.
Karapasan tang marendeng sia karapasan marendeng
9Millikmokomi, e mintu’ baine tang magiang: perangiimi tu gamarangku, e mintu’ anak dara mangin-mangin; tananni talinga tu kadangku.
10Sangtaunpi sia ba’tu pirang-pirang allopi ammi ma’paganggang, e kamu to mangin-mangin, belanna puramo tu peanggorosan sia tae’mo nala den tu kama’pupuan kapua.
11Ma’rundedekomi, e baine tang magiang, ma’paganggangkomi, e kamu to mangin-mangin! Lendokanni tu pakeammi, sia ma’kale-kalekomi, ammi ma’dodo karoro’.
12La ussa’pa-sa’pakomi ara’mi, belan-na mintu’ pa’lak malunak sia belanna mintu’ garonto’ anggoro’ tarri’ bu-anna;
13sia belanna pa’lakna taungKu tu natuoi duri sia a’da’ sia belanna mintu’ banua nanii pa’maruasan lan tondok sode-sodena.
14Belanna iatu tambakuku mendadimo kota talo ditampe, iatu kamaruasanna kota membalimo biung-biungan. Sia iatu Ofel sia Menara pa’kampan mendadi lo’ko’mo tontong sae lakona, napoparannu keledai lampung sia nanii baanan sapi sola domba siga’luan undaka’ kande.
15Sae lako attu ditua’na lako kaleta tu Penaa dao mai inan madaona. Attu iato padang rangke la membali pa’lak lunak sia iatu pa’lak lunak la susi pangala’.
16Attu iato la unnisung tu katonganan lan padang pangallaran sia la tongkon tu kamaloloan lan pa’lak ballo.
17Iatu buanna kamaloloan iamotu kasikaeloan sia iatu poleanna kamaloloan iamo kasode-sodean sia karapasan tontong sae lakona.
18Iatu taungKu la torro lan inan kamarampasan sia lan banua nanii kasode-sodean, lan inan karapasan tu tang narandan kamasussan.
19La sae tu uran batu naurungan songka tu kayu lan lu pangala’ sia la lamma’ tu kota rokko inan mandalan.
20Maupa’komi tu to mangambo’ dio randanna mintu’ uai sia tu umpopassangka penaammi ullamba’ sapi sia keledaimmi lako mintu’ inan.