Alkitab Mobile SABDA
[VER] : [TORAJA]     [PL]  [PB] 
 <<  Yesaya 59 >> 

Tae’ kadirampanan, ke tae’i pengkatobaran

1Iatu limanNa PUANG tae’ nakondi’ la merampanan, sia tae’ natang maleso tu pa’peranginNa.

2Apa mintu’ kekelokammi umpasisarakkomi Kapenombammi sia belanna mintu’ kasalammi anNa buniangkomi lindoNa, Naurunganni tang umperangiikomi.

3Belanna iatu limammi sitombang rara sia iatu tarunomi ponno kakelokan; ma’kada mo’rang bangkomi sia iatu pudukmi ma’nemu-nemu bang ussa’bu’ tang malolona.

4Tae’ misa’ to ma’parapa’ situang kamalamburan sia tae’ misa’ to mangra’ta’ situru’ katonganan; urrannuan kada tang kebattuan sia ma’kada tang tongan, untambuk kamandasan sia untibussanan kasanggangan.

5Tau iato mai unnarranni tallo’ ula’ balu sia untannun banua laa-laa. Minda-minda ungkandei tu tallo’na, manassa la mate; iake ditessei tu tallo’ iato, tassu’mi lan mai tu misa’ ula’ rame.

6Iatu bannang laa-laa natannun, tae’ gai’na dipotamangkale, na iatu panggaraganna tae’ nakullei umpopakei; iatu penggauranna penggauran kakadakean sia iatu pa’pakario-rio lan limanna.

7Iatu lentekna matira’ la umpogau’ kakadakean sia madomi’ umpatibollo rarana to tang sala; mintu’ karangan inaanna, tangnga’ kabulitukan manna sia dio lalanna kasanggangan manna sia kamatilakan.

8Iatu lalan kamarampasan tae’ natandai, sia tae’ katonganan dio lu lalanna; lalan kelok bang naolai; tae’i misa’ tu to unnolai, untandai kamarampasan.

9Iamoto anna torro mambela tu katonganan dio mai kaleta sia tae’ anna lambi’ki kamaloloan. Umpeagiki’ kamasiangan, apa narampoiki’ kamalillinan; umpeagiki’ arrang masero, apa lolangoriki’ lan kapi’tukan.

10Kasapu-sapuki’ susito buta lako to’ rinding sia sumalappaki’ susito tang kemata. Tangnga allo anta titodo susi ke kasisalan taumi bongi, moi anta mane matangnga tau, apa butungmoki’ to mate.

11Umburrung nasangki’ susito beruang sia ma’seppukuki’ susito bu’ku; umpeagiki’ katonganan, apa tae’; untayanki’ katilendokan, apa mambela dio mai kaleta.

12Belanna tang dikemba’mo tu kapatodo-tintingangki dio oloMi sia iatu kasalangki titanan sa’bimo umbalikan; belanna kisa’dingmo tu salaki sia kitandaimo tu kakelokangki;

13palutu tombangmoki’ sia umpeongannimiki’ PUANG sia sepangmoki’ dio mai Kapenombanta, umpokadamoki’ diona pa’pakario-rio sia sorong boko’ untannun sia umpasun kada mo’rang.

14Dipasorong boko’ tu katonganan sia iatu kamaloloan torro mambela, belanna iatu tonganna titodo dio lu tana lapang, sia tang narandan kabulo-lollongan.

15Iatu tonganna tang dipebayo lindomo sia minda-minda untoyangan kalena dio mai kakadakean dirampamo. Mintu’nate Natiromo PUANG, nakadake tongan Natiro, belanna tae’mo katonganan.

16Natiro kumua tae’ bangmo tau misa’, bangngomi ara’Na, belanna tae’mo misa’ tau umpangeai katonganan. LimanNa kalena umbenni pa’tunduan sia kamaloloanNa ussande’I.

17Umpotamangkale kamaloloan butung bayu rante sia umposongko’ songko’ bassi kasalamaran; umpotamangkale pepakkan butung bayu sia umpolullung kamakaritutuan butung bayu lamba’.

18La Napapakkanni sitinaya penggauranna: iamotu kamare’dekan lako to umbali-balii, sia pepakkan lako ualinNa; iatu mai ma’biring tasikna la Napabala’i.

19Attu iato la nakataku’ tau tu sanganNa PUANG diong lu kabotoan allo sia la nakabangnga’ tau tu kamala’biranNa lan kabu’tuan kulla’, belanna la sae susito uai saba’ natu’ba’ penaanNa PUANG.

20Apa la sae tu Puang susi misa’ Pela’bak lako Sion sia lako mintu’ bati’na Yakub tu untobaran salana, kadanNa PUANG.

21Iatu Aku, inde sia tu basseKu sola tau iato mai, kadanNa PUANG, Nakua: Iatu penaangKu tu dio kalemu sia iatu kadangKu tu Kupadiomo pudukmu, tae’mo anna lessu’ dio mai pudukmu, ba’tu dio mai pudukna bati’mu, ba’tu dio mai pudukna tarukna bati’mu, kadanNa PUANG, randuk totemo tontong sae lakona.


  Share Facebook  |  Share Twitter

 <<  Yesaya 59 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran