Dual PanelPenombana to tang mekaaluk Natumpu PUANG
1Nakua kadanNa PUANG: Iatu langi’ iamo isungan kapayungangKu, na iatu lino iamo pelleseangKu; umbamira tu banua la migaraganNa’, ba’tu umbamira tu inan kapelayoangKu?
2Mintu’nate apa iate inang panggaraga limangKu, susimoto anna dadi tu mintu’ ma’dandan maritik, kadanNa PUANG; apa iatu tau iato Kutiro lumbang, iamotu to umpamadiongan penaanna sia to bonnong penaanna sia ungkataku’ kadangKu.
3Minda-minda urrere’ misa’ sapi, samanna umpatei tau; minda-minda umpemalaran anak domba, samanna to ulle’to pasallo asu; minda-minda umpennoloan kande dipemalaran, samanna to umpemalaran rara bai; minda-minda untunu dupa napopemala’ kapengkilalan, samanna umpudi dipa’deatainna. Susitu tau iato mai unturu’ lalan pa’poraianna, sia umposende penggauran megi’giranna,
4susi dukamoto naalai penaangKu, ke sanggangi tu tau iato sia iatu nakataku’na la Kuparampo lako kalena, belanna tae’ bangmi misa’ mebali, tongKu metamba, sia tae’ bangi umperangii tongKu ma’kada, sangadinna napogau’ tu apa kadake dio pentiroKu sia naporai tu apa tang naala penaangKu.
Pa’paolaian salu ma’katampakanna
5Tananni talinga tu kadanNa PUANG, e kamu tu ma’parondona belanna kadanNa: Iatu mintu’ siulu’mi, tu ungkabiri’komi sia ussisarakangkomi belanna sangangKu ma’kada nakua: Melo ke umpaombo’i kamala’biranNa tu PUANG, angki tiroi tu kasendeammi. Apa ia kalena la kasirisan tu tau iato mai.
6Perangii, den ramba kapua lan mai kota! Tu lu lan mai Banua Kabusungan! Iamotu gamaranNa PUANG tu umpabala’i penggauranna mintu’ ualinNa.
7Tae’ bangsia namapa’di’, nakianakmo; tae’ bangsia namangurria’ nadadiammo misa’ pia muane.
8Mindamora urrangi tu susinnato, mindamora untiroi tu sangtintinna to? Ma’dinraka tu misa’ tondok dipadadi lan sangallo, ma’dinraka tu misa’ bangsa sattu’ri tibussan? Apa iatu Sion mane ra’pa’ mangurria’, anna dadiammi tu mai anakna.
9La Kubungka’raka tu inan taunna tau, anna tae’ Kupakianakki? kadanNa PUANG. Ba’tu Akuraka misa’ To umben kakianakan tau, angKu tutu’ pole’i?, kadanna Kapenombammu.
10Parannu-rannukomi sola Yerusalem sia pokumalasii, e kamu mintu’ tu ungkamali’i. Posendei, e kamu mintu’ to umporosso inaai,
11kumua ammi mimmi’i sadia’mi tu susu pa’pakatananna, sia miiru’i sanabossami tu susu masekkaranna.
12Belanna nakua kadanNa PUANG, Nakua: La Kupalolongi kamarampasan butung salu sia kamala’biranna mintu’ bangsa susi salu’-salu’ lempan. Attu iato la ma’mimmi’komi sia la dikepak sia dikayun dipamo’le’.
13Susi misa’ tau napakatana indo’na ten dukato tu Aku la umpakatanakomi, ondongpi lan Yerusalem dinii umpakatanakomi.
14Iatommi tiromi to, la sende tu penaammi sia mintu’ bukummi la mawatang sule susi tananan maluna; sia iatu limanNa PUANG la Napapayan lako mintu’ taunNa sia kasengkeanNa lako mintu’ ualinNa.
15Belanna manassa la sae tu PUANG susi api na mintu’ karetaNa sangtinti talimpuru’, la umpapayan kasengkean ma’lulu-lulunNa sia pa’garrak ma’lana-lananNa.
16Belanna api sia pa’dangna la Napaolanni PUANG salunna tu mintu’ ma’rupa tolino, sia la buda liu tu tau Napatei PUANG.
17Iamotu to umpamarimbangan sia usseroi kalena, la male tama pa’lak urrundu’i tu misa’ tau lan tangngana, tu to ungkande duku’ bai sia iatu mai apa maruttak sia balao; tau iato mai pada la dipisanni, kadanNa PUANG.
18Belanna Ku(tandaimo) tu penggauranna sia tangnga’na tu tau iato mai; la rampo (tu attu) dinii umpasipulungi tu mintu’ bangsa sia mintu’ basa; anna tiroi tau iato mai tu kamala’birangKu.
19La Kupaden misa’ tanda dio lu tau iato mai sia mintu’ tu to tilendokmo la Kusua lako mintu’ bangsa – iamotu lako Tarsis, Pul sia Lud, to ma’pana, lako Tubal sia Yawan, sia lako mintu’ randan tasik mambela, tu tae’ lenpa narangi karebangKu sia tae’pa natiro kamala’birangKu –, anna tau iato mai umpatale’i tu kamala’birangKu dio lu mintu’ bangsa.
20Anna tau iato mai ussolanni dio mai mintu’ bangsa tu mintu’ siulu’mi butung to pemala’ lako PUANG; tau iato mai la ma’darang sia ma’kareta sia dibulle dao kadera; sia ma’bagala’ sia ma’unta malinta’ rampo lako buntu maindanKu, iamo Yerusalem, kadanNa PUANG, sangtinti to Israel umpennoloan pemala’ lan pa’pannian maindan tama banuanNa PUANG.
21Sia la Kuangka’ duka ba’tu pira-pira tu tau iato mai la mendadi to minaa, iamotu to Lewi, kadanNa PUANG.
22Belanna susitu langi’ ba’ru sia lino ba’ru tu la Kupadadi, la tontong dio oloKu, kadanNa PUANG, la susi dukato tu bati’mi sia sangammi la tontong sae lakona.
23La dadi kumua, iake bulan ba’ruoi sia ke allo katorroanoi, mintu’ ma’rupa tolino la sae menomba dio oloKu, kadanNa PUANG.
24La sun tu tau iato mai sia la natiro tu batang rabukna mintu’ to sorong boko’mo dio mai Kaleku; belanna iatu ulli’na tae’ nala mate sia iatu apinna tang la pa’de, sia la dadi misa’ apa napomataku’ mintu’ ma’rupa tolino.