Dual Panel1Iatonna mangkamo tu mintu’ bangsa ullamban Yordan, ma’kadami PUANG lako Yosua, Nakua:
2La miala tu sangpulo dua muane dio mai mintu’ suku Israel, simisa’ muane, ke misa’oi suku.
3Sia suai tu tau iato, kumua: Alakomi batu sangpulo dua indete tangngana Yordan, dio mai tu inan nanii lette’ to minaa bendan bantang, ammi baai lamban lian, sia patorroi lan pa’bongian tu la minii ma’bongi te bongi iate.
4Natambaimi Yosua tu muane sangpulo dua tu napamanassa dio mai to Israel, simisa’ muane, ke misa’oi suku,
5anna ma’kada lako tau iato mai, nakua: Lambanmokomi sule tama tangnga Yordan dio tingayo pattinNa PUANG, Kapenombammi, sia pantan umpassankomi batu simisa’ dao palempengmi situru’ bilanganna mintu’ suku to Israel,
6kumua anna iate dadi misa’ tanda lako kalemi. Iake mekutanai tu mai anakmi undinna nakua: Apara battuananna te batu iate lako kalemi?
7La mibali tu tau iato mai, mikua: Iatu uainna Yordan tipa’dua dio tingayo patti basseNa PUANG; iatonna lamban Yordan, tipa’dua tu uainna Yordan; iamoto iate batu iate dadi misa’ tanda kapengkilalan lako to Israel tontong sae lakona.
8Napogau’mi to Israel susitu napa’parentan Yosua. Naangka’mi tau iato mai tu batu sangpulo dua lan mai tangnga Yordan, susitu mangka Napokada PUANG lako Yosua situru’ bilanganna mintu’ suku to Israel, anna baai tau iato mai lako pa’bongian napatorroi dio.
9Sia napabendan duka Yosua tu batu sangpulo dua lan tangnga Yordan, dao inan nanii mellese to minaa, tu umbulle patti basse; iatu batu iato tontong dio sae lako allo iate.
10Iatu mintu’ to minaa, tu umbulle patti, torro bendan lan tangnga Yordan sae lako sundunna tu mintu’ apa Napa’parentan PUANG lako Yosua la umparampoi lako bangsa iato, susitu mintu’ apa napasan Musa lako Yosua. Tikara-karami lamban tu bangsa iato.
11Iatonna tappumo tu bangsa iato lamban, lamban dukami tu pattinNa PUANG sola mintu’ to minaa dio pentirona tu bangsa iato.
12Lamban dukami tu to Ruben sia to Gad sia sesena rapu Manasye sakka’ la parari undoloan mintu’ to Israel, susitu mangka napokada Musa lako tau iato mai.
13Agi-agi patangpulo sa’bu tu tau sakka’ pa’bunona; lambanmi dio oloNa PUANG tu tau iato mai la parari lako padang Yerikho.
14Allo iato Napatarompo’mi PUANG tu Yosua dio pentirona mintu’ to Israel, naurunganni mataku’ tu tau iato mai lako kalena susi kamatakuranna lako Musa lan mintu’ allo katuoanna.
15Sia ma’kada tu PUANG lako Yosua, Nakua:
16Suai tu mintu’ to minaa tu umbulle patti kasa’bian kendek diong mai Yordan.
17Nasuami Yosua tu mai to minaa, nakua: Kendekkomi diong mai Yordan.
18Iatonna kendekmo diong mai tangnga Yordan tu mintu’ to minaa umbulle patti basseNa PUANG sia iatonna mane tiangka’ tu lette’na diong mai ullese karangkeanna, pakalan sulemi tu uai Yordan lako inanna sia lolong susito dolona unturu’ mintu’ biringna.
19Iatu bangsa iato kendek diong mai Yordan tonna allo ma’pessangpulo bulan bunga’na, anna ma’tenda dio Gilgal rampe matallo lili’na Yerikho.
20Iatu batu sangpulo dua tu naangka’ tau diong mai Yordan, napabendan Yosua dio Gilgal.
21Sia ma’kada lako to Israel, nakua: Iake mekutanai tu anakmi lako ambe’na undinna kumua: Apara battuananna te batu iate?
22La mipaissanan anakmi kumua: Indete dio to’ karangkeanna nanii to Israel ullamban Yordan.
23Belanna Napamarangke PUANG, Kapenombammi, tu uai Yordan dio tingayomi sae lako tappummi lamban, susitu mangka Napogau’ PUANG, Kapenombammi, lako tasik Teberau, tu Napamarangke dio tingayota sae lako tappunta lamban,
24kumua anna issanni mintu’ bangsa dao kuli’na padang tumbai mawatangna tu limanNa PUANG, anna kataku’i tau iato mai tu PUANG, Kapenombammi, lan mintu’ allo.