Alkitab Mobile SABDA
[VER] : [GULLAH]     [PL]  [PB] 
 <<  1 Timotius 2 >> 

How fa Woshup een Choch

1Fus off, A da beg ya dat dem wa blongst ta Christ mus pray ta God fa all people, da aks um fa hab mussy pon um an da tell um tankya fa e blessin ta we all.

2Mus pray fa king dem an all wa hab tority, so dat we kin lib quiet an peaceable an lib sponsible, da waak close ta God an dohn do nottin dat gwine mek we shame.

3Dat de way we oughta pray, cause dat pray, e good an mek God, we Sabior, heppy.

4God wahn fa sabe all people an e wahn um fa know de trute.

5Cause dey ain bot one God, an dey jes one wa da lead people ta God. E de middleman tweeen God an people fa bring um togeda. Dat de man Christ Jedus.

6E done sacrifice e life fa set all people free fom sin. An dat sacrifice show all people, at de right time, dat God wahn fa sabe um all.

7An dat hoccome God pick me an sen me fa be e preacha an postle, fa laan dem wa ain Jew how fa bleebe pon Christ an fa tell um de true way. A da tell ya de trute. A ain da tell no lie.

8A wahn man wa lib ebryweh fa pray. Dey mus be people wa done gii God dey life an an wa lib fa um. An wen dey hice op dey han fa pray, dey mus dohn be bex wid nobody an mus dohn wahn fa aagy.

9A ain wahn de ooman dem fa call tention ta deysef by de fancy way dey dress. Dey mus dress sensible an decent. Dey mus dohn weah dey hair fancy. An dey mus dohn weah fine gole o pearl dem o fine dress wa cost tommoch.

10Steada dat, dey oughta call tention ta deysef by dey good deed dat ooman wa woshup God oughta do.

11Ooman dem mus tie op dey mout an pay mind fa true ta dem wa laan um.

12A ain leh no ooman teach, needa hab no tority oba de man dem. Ooman dem mus tie op dey mout.

13Cause fus God done mek Adam, fo e mek Eve.

14An de Debil ain ceebe Adam. Eve de one e ceebe. An Eve de one wa fall eenta sin ginst God.

15Bot ooman gwine be safe wen e da bon chile, ef e keep on da trus een Christ, an da lob people an da pit God fus een e life, an ef e keep on da lib decent an ain call tention ta esef.



 <<  1 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran