Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 15 >> 

De Meetin een Jerusalem

1Some man dem come down fom Judea ta Antioch. Dey staat fa laan de Christian bredren, say, “God ain gwine sabe oona ef oona ain circumcise same like de law dat God gii Moses say.”

2Paul an Barnabas ain gree wid wa dem man dem beena laan de Antioch bredren, so dey aagy scrong an spute wid um bout dat. De choch bredren cide fa hab Paul an Barnabas an some oda choch bredren een Antioch trabel ta Jerusalem fa taak bout dat ta de postle dem dey, an de leada dem wa dey call elda.

3De choch people sen um out. An wiles dey beena pass shru Phoenicia an Samaria, Paul an Barnabas tell de Christian bredren how de people dat ain Jew done change dey life an bleebe pon Jedus. Dis nyews mek all dem bredren heppy fa true.

4Wen Paul an Barnabas git ta Jerusalem, de choch people, de postle dem an de choch elda dem welcome um. Paul an Barnabas tell um all bout wa God hep um fa do.

5Den some dem bredren dat blongst ta de Pharisee group say, “De people wa ain Jew haffa git circumcise an we haffa chaage um fa do dem ting dat Moses Law say dey haffa do.”

6De postle dem an de choch elda dem meet fa taak bout dat.

7Wen dey done taak a long time, Peter stan op fa taak. E say, “Bredren, oona know dat some time go, God done pick me fom mongst oona fa tell de people dat ain Jew de Good Nyews so dat dey could yeh um an bleebe pon Jedus.

8An God wa know all people haat, show dat e wahn um fa ton ta um, wen e gim de Holy Sperit, same like e been gii we.

9God ain mek no diffunce tween we Jew an dem dat ain Jew. We all haffa bleebe de same way. An cause dey bleebe, e tek way dey sin outta dey haat.

10So den, hoccome oona da try fa do dis ting dat God done show we dat we ain oughta do. Oona da try fa see ef dat gwine bex God? Hoccome we da come an pit a load pon dem bleeba, dat same load dat we ole people ain been able fa tote an dat load wa wesef ain able fa tote needa?

11Mus dohn do dat! We bleebe dat we Lawd Jedus hab mussy pon we an sabe we. Same way dey too bleebe dat de Lawd Jedus hab mussy an sabe dem.”

12Nobody een de meetin ain say one wod wen dey yeh Barnabas an Paul tell bout all de wondaful wok an de miracle God done shru um mongst dem people dat ain Jew.

13Wen Barnabas an Paul done taak, James say, “Bredren, listen ta me!

14Simon jes tell we bout how God fus done show e cyah bout de people dat ain Jew wen e call some ob um fa be e own people.

15De wod ob de prophet dem gree fa true wid dis. Dem prophet write een God Book say,

16‘Atta dat ting happen A gwine come back an build David house dat done faddown. Eben dough dat been all ruint, A gwine build um gin an raise um op.

17So dat all de oda people kin seek de Lawd, all de people dat ain Jew dat A done call fa be me own. Dat wa de Lawd say, de Lawd wa da do all dem ting.

18Fom de fus, God beena mek we know wa e da do.’”

19James gone on say, “So den, A tink we ain outta mek ting haad fa dem people dat ain Jew wa da ton ta God.

20Stead ob dat, we oughta write um a letta, tell um dey mus dohn nyam no food dat people done sacrifice ta dey idol. Dey mus dohn hab no oda man o ooman cep jes dey own husban o wife. An dey mus dohn nyam no animal dat still hab e blood een um cause e been strangle. Dey mus dohn nyam no blood.

21Cause fa a long long time, dey beena read de Law dat God gii Moses een de Jew meetin house ebry Woshup Day. Dey beena tell Moses wod ta de peopleeen ebry city.”

De Letta ta de Bleeba Dem wa Ain Jew

22De postle dem an de choch elda dem an all de choch people cide fa pick some dey own man fom de choch an sen um wid Paul an Barnabas ta de Antioch choch. Dey pick Judas, wa dey call Barsabbas, an Silas fa sen. Dem two man been leada mongst de Christian bredren.

23Dey gii a letta fa tek ta Antioch. Een dat letta dey write say, “We de postle dem an choch elda dem, oona bredren. We da greet oona, all de bredren dat ain Jew an dat bleebe pon Jedus, all oona wa lib een Antioch, Syria, an Cilicia.

24We yeh dat some man dem dat gone out fom we own people yah done mek ting haad fa oona an opsot oona wid dem ting dey tell oona. We ain neba chaage um fa tell oona dem ting.

25So we all yah done gree fa sen some we own man dem fa go ta oona, long wid Paul an Barnabas, we own deah fren.

26Wen some people wahn fa kill um, Paul an Barnabas been ready fa dead, da wok fa we Lawd Jedus Christ.

27So den, we da sen Judas an Silas fa tell oona de same ting we done write oona een dis letta.

28De Holy Sperit ain wahn we fa pit no mo haada load pon oona, an we ain wahn fa do dat needa. Cep we chaage oona fa keep dese rule yah.

29Oona mus dohn nyam no food dat people done sacrifice ta dey idol. Mus dohn nyam no blood. Mus dohn nyam no animal dat still hab e blood een um cause e been strangle. An mus dohn hab no oda man o ooman, cep jes ya own husban o wife. Oona gwine do de right ting ef oona ain do none ob dem ting yah dat we done write bout ta oona. Bye now.”

30De Jerusalem choch people sen de man dem ta Antioch. Dey gone dey an geda all de choch people dey togeda an gim de letta.

31Wen de choch people een Antioch read de letta, dey real heppy fa dat message dat courage um.

32Judas an Silas been prophet too. So dey taak a lot ta de bredren dey fa courage um an hep um bleebe mo betta.

33Dey been stay dey some time een Antioch. De Antioch bredren bless Judas an Silas fo dey lef um, da aks God fa hep um hab a good journey as dey gone back ta dem dat done sen um.

34[Bot den Silas cide e oughta stay dey een Antioch.]

35Paul an Barnabas stay on een Antioch. Dey an plenty oda Christian bredren beena laan de people, da tell um de wod ob de Lawd.

Paul an Barnabas Each Go E Own Way

36Atta some time, Paul tell Barnabas say, “Leh we go back fa see de bredren een all de city weh we beena tell de Lawd wod, fo. Leh we see how dey da do.”

37Barnabas wahn fa tek John, wa dey call Mark, wid um.

38Bot Paul tink e ain good fa tek Mark wid um. Cause fo wen dey done been een Pamphylia, Mark lef um. E ain keep on da go wid um fa hep um finish op de wok.

39Paul an Barnabas beena aagy tommuch bout dat til dey cide fa lef one noda an go each one e own way. Barnabas gone wid Mark an ketch a boat an sail ta Cyprus.

40Paul pick Silas fa go wid um. Fo e gone, de Antioch bredren aks de Lawd fa bless um an tek cyah ob um.

41Paul gone all oba Syria an Cilicia. E beena courage an hep de choch people dey.



 <<  Kisah Para Rasul 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran