Alkitab Mobile SABDA
[VER] : [GULLAH]     [PL]  [PB] 
 <<  Lukas 20 >> 

Dey Aks Jedus Weh E Git E Tority

1One day, Jedus beena laan de people an preach um de Good Nyews. An de leada ob de Jew priest dem, de Jew Law teacha dem an de oda Jew leada dem come ta Jedus.

2Dey aks um say, “Tell we, wa gii ya de right fa do dese ting yah? Who dat gii ya de tority?”

3Jedus ansa um say, “Leh me aks oona one queshon too. Oona tell me.

4Wen John wa beena Bactize people, come yah, who dat gim right fa bactize. Tell me, God gim de tority, o de people gim de tority?”

5Dey staat fa aagy mongst deysef say, “Wa we gwine ansa um? Ef we say ‘God gii John de tority fa bactize people,’ e gwine say, ‘Well den, hoccome oona ain bleebe um?’

6Bot ef we say ‘People gii John dat tority,’ all dese people yah gwine shrow stone pon we, cause dey bleebe fa true dat John beena man wa taak fa God.”

7So dey ansa Jedus, say dey ain know who dat gii John de tority fa bactize people.

8Jedus tell um say, “Well den, A ain needa gwine tell oona who dat gii me de tority fa do dese ting yah.”

De Paable Bout de Wicked Wokman Dem

9Jedus tell de people one paable say, “One time one man plant some grapewine on e faam. E rent out e faam ta some wokman fa tek cyah ob dat faam. An e mek greement fa share de grape haabis wid um. Den e gone way ta noda country way off. An e stay dey a long time.

10Wen de time come fa de grape haabis, de owna sen one e wokman ta e faam fa fetch e share ob de haabis. Bot de wokman dem wa cyah fa e faam beat dat man wa de owna sen. Dey sen um back dout nottin.

11De owna sen noda wokman fa fetch e share. Dey beat dat man too an treat um shameful. Den dey sen um back wid nottin.

12De owna sen still noda man fa fetch e share. Dis been de shree man wa gone fa um. Dem wa cyah fa de faam beat dat one til dey hut um fa true. An dey shrow um off de faam.

13De faam owna say, ‘Wa A gwine do now? A gwine sen me own deah son wa A lob. Could be dey gwine show hona ta me son.’ So e sen e son fa fetch e share ob de haabis.

14Bot wen dem wa cyah fa de faam see de owna son come, dey all taak togeda. Dey say, ‘Dis de owna son. Dis propaty yah gwine be lef ta um. Leh we kill um so dat de propaty gwine come ta we.’

15Den dey shrow de owna son off de faam, an dey kill um. “Now den,” Jedus aks de people say, “Wa dat faam owna gwine do ta de wokman yah?

16E gwine come an kill dem wokman. An e gwine gii e faam ta oda wokman dem.” Wen de people yeh wa Jedus say, dey say, “Fa sho, dat mus dohn happen!”

17Jedus look scraight at um an aks um say, “Well den, oona tell me wa dey mean wen dey write een God Book say, ‘De bery stone wa de builda dem figga ain wot nottin an shrow way, dat been de one dey need de mores ob all fa jine de wall ob de buildin.’

18“Anybody wa faddown on dis stone yah gwine broke op e bone all oba e body. An wen dis stone faddown on anybody, e gwine mash um all op.”

De Queshon Bout Tax

19Now, dem Law teacha an dem priest leada ondastan dat Jedus done tell dat paable ginst dem. So dat same time, dey try fa ketch Jedus an hole um. Bot dey ain ketch um cause dey been scaid ob de people dey.

20So dey da watch Jedus fa try fa ketch um. Dey pay some man dem, sen um ta Jedus. De tell dem man fa mek like dey mean wa dey say fa true, an chaage um fa aks Jedus schemy queshon. Dey plan fa tek de wod wa Jedus ansa fa ketch um, say e taak bad ting. Den dey kin go cuse Jedus an tek um ta de Roman Gobna, wa hab tority an powa fa jedge um.

21De man dem wa dey beena pay fa ketch Jedus come ta um fa aks um schemy queshon. Dey tell Jedus say, “Teacha, we know wa ya da say an laan we be right fa true. We know ya da look on all people de same. Fa true ya beena teach God way.”

22Den dey aks um, “E right fa we fa pay tax ta de Roman rula Caesar? Wa de Jew Law say bout dat?”

23Bot Jedus obareach um. E beena know dey da try fa ketch um een e wod. So e chaage um.

24E tell um say, “Oona show me a silba coin.” Wen dey show um dat money, e aks um, “Who dat hab e face an e name on dis coin yah?” Dey ansa Jedus say, “Dat Caesar face an name dey.”

25Jedus say, “Well den, oona mus gii Caesar dat wa blongst ta Caesar an mus gii God wa blongst ta God.”

26So den wid all de people dey, dem man ain been able fa ketch Jedus een none ob de wod wa e say. Wen Jedus ansa um so, dey been stonish down an dey hush op dey mout.

Dem wa Lib Gin Cyahn Dead No Mo

27Some Sadducee come ta Jedus. De Sadducee dem bleebe dat dead people ain gwine git op fom mongst de dead an lib gin.

28Dey aks Jedus say, “Teacha, Moses write law fa we say, ‘Ef a man dead an lef e wife an ain hab no chullun, de man broda mus marry de wida-ooman. De broda gwine do dat fa hab chullun een de name ob de man wa done pass oba.’

29One time dey been seben broda. De fus one marry an e pass oba. E ain lef no chullun.

30De nex broda marry e broda wida-ooman. An dat broda pass oba an ain lef no chullun fa e dead broda.

31Den de nex broda marry de wida-ooman an e pass oba. De same ting happen ta all de seben broda. Dey all marry dat ooman, one atta de oda. An dey all pass oba an ain hab no chullun.

32Las ob all, de wida-ooman esef pass oba.

33All seben broda done marry dat ooman. So den, tell we, wen de time come wen de dead people gwine git op fom mongst de dead an lib gin, who dat gwine hab dat ooman fa e wife?”

34Jedus ansa de Sadducee dem say, “Yah een dis wol de people keep on da git marry op.

35Bot atta dey pass oba, de people dem wa God see fit fa mek um git op fom mongst de dead an lib gin, dey ain fa be marry.

36Dey gwine be like de angel dem, an dey cyahn dead no mo. Dey God chullun, cause dey done been dead bot now dey done git op fom mongst de dead an lib gin.

37Moses eben show dat dem wa done dead git op fom de grabe an lib gin. E show dat dey een God Book, weh e write down bout de small bush dat beena bun. Dey dey e call de Lawd ‘de God ob Abraham, de God ob Isaac, an de God ob Jacob.’

38E de God ob people wa da lib. E ain no God ob dead people. Cause ta God all people da lib.”

39Some de Law teacha tell Jedus say, “Teacha, dat a good ansa!”

40Atta dat, de people been scaid fa aks Jedus oda queshon.

Who de Messiah Da?

41Jedus aks um say, “Hoccome people say dat de Messiah gwine be de chile ob David chullun chullun?

42Cause David done write down een de book ob Psalms say, ‘De Lawd say ta me Lawd: Seddown yah ta me right han, weh A da hona ya.

43Seddown til A broke op ya enemy dem. Mek um like a footstool ondaneet ya foot.’

44David call de Messiah ‘Lawd.’ So den, hoccome de Messiah kin be de chile ob David chullun chullun?”

Jedus Waan Ginst de Law Teacha Dem

45Wiles all de people beena listenin, Jedus taak ta e ciple dem.

46E say, “Oona mus be on de watch fa de Law teacha dem. Dey like fa waak roun een dey long robe fa mek people say dey be big leada. An dey lob fa go ta de maakut place weh plenty people geda, so dat de people kin gim hona. Wen dey go ta de Jew meetin house, dey lob fa seddown een de bes seat fa sho dat people da hona dem. An wen dey go ta de feas, dey lob fa seddown een de place weh de big leada dem seddown.

47Dem Law teacha yah tek oba wida-ooman propaty an tief all dey got. An den dey stan op da pray long time so dat people kin say dey good people fa true! God gwine punish dem de mores, mo den e gwine punish oda people.”



 <<  Lukas 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel