Alkitab Mobile SABDA
[VER] : [GULLAH]     [PL]  [PB] 
 <<  Yakobus 1 >> 

1Dis letta yah fom James, wa da wok fa God an fa we Lawd Jedus Christ. A James da greet all ob oona ob de tweb tribe, wa da lib scatta all oba de wol way fom dey own country.

Mus Trus God Wid All Oona Haat

2Me Christian bredren, wen all kind ob ting come wa mek oona suffa, mus ondastan dat oona oughta be full op wid joy.

3Cause oona know dat dem ting dey come fa test oona fait. An dat mek oona mo able fa beah all ting wa come oona way.

4Mus keep on da beah op onda mo an mo, so dat den oona gwine be jes wa God wahn oona fa be een all way, an oona ain gwine be nottin less den God wahn oona fa be.

5Ef one ob oona hab need fa mo sense bout sompin, leh um aks God, an God gwine gim. Cause God da gii wid open han ta all people, an e heppy fa do dat. E ain gwine find no fault wid um.

6Bot wen one ob oona aks God fa sompin, dat one haffa bleebe dat God gwine gim wa e aks fa. E mus dohn doubt none tall. Cause de one wa da doubt, e jes like de swellin wata wen de wind da blow an toss um all roun. Dat one wa da doubt ain steady eben a leetle bit.

7An dat poson dey oughta know dat de Lawd ain gwine gim nottin tall.

8Cause e jes a hypicrik, an e keep on da change e mind een all de way e da gwine.

Dem Christian wa Ain Got Nottin an Dem wa Got Plenty Ting

9De Christian wa ain got nottin mus be heppy wen God mek um mo high op.

10An de Christian wa got plenty ting, e oughta be heppy wen God bring um low. Cause e ain gwine las, jes like a fine wile flowa wa ain las long tall.

11De hot sun kin come an bun de plant. Den de plant wida an de flowa faddown, an dey ain no fine flowa no mo. Same way so, de one wa got plenty ting, e gwine pass oba wiles e da go bout e bidness.

Mus Dohn Stop fa Trus Wen Trial Come Oona Way

12De poson wa ain stop fa trus God wen trial come ta um an wa able fa beah um, e bless fa true. Cause wen e still stan op scronga fa God atta dat trial, God gwine gim de true life wa ain neba end. Dat de life wa God promise dem wa lob um.

13Wen trial come ta somebody an dat one wahn fa sin, e mus dohn say, “God da sen dis trial fa try fa mek me do dis sin yah.” Cause God ain neba wahn fa do nottin ebil, an e ain neba do nottin fa mek nobody wahn fa sin.

14De ebil ting dat somebody study pon an wahn een e own haat, dat wa ketch um an mek um wahn fa sin.

15Den wen e gii een an mek op e mind fa do dat ebil ting wa e wahn een e haat, e do dat sin yah. An wen e keep on da sin, den dat sin gwine mek um dead faeba.

16Me deah Christian bredren, mus dohn leh nobody fool oona.

17God de one dat gii we all dem ting wa good fa true an wa betta mo den all. Dem ting wa good fa true come fom we Fada God ob all light, wa mek de sun, de moon, an de staa dem. God ain neba change, an e ain neba gwine ton way fom we an lef we een de daak atta e done mek e light shine pon we.

18God esef plan fa mek e wod wa true gii we dis nyew life, so dat we kin be a kinda fus fruit ob all wa e mek.

Mus Do wa God Wod Say

19Me deah Christian bredren, mus dohn fagit dis! All ob oona oughta be ready fa yeh, bot oona oughta tek time fo oona taak. An mus dohn git bex right way.

20Cause wen somebody git bex, dat ain gwine bring bout wa scraight een God eye.

21So den, mus shrow way all de bad ting oona da do an all de ebil outta oona life. Pit oonasef onda God fa do wa e wahn. An leh de wod wa God plant een oona haat lib een oona, cause e wod got powa fa sabe oona.

22Mus do wa God wod say. Ef ya jes yeh God wod bot ain do wa e tell oona fa do, ya da fool yasef.

23De one wa yeh God wod an ain do wa God tell um, e same like somebody wa look at esef een a lookin glass an see wa e look like.

24Bot wen e done look at esef een de lookin glass, e go pon e way an right way fagit how e look.

25Bot God wod, dat de law wa right fa all people an wa mek we free. Ef we study pon um an pit all we haat pon wa e da laan we, an ef we ain jes yeh um an den fagit wa we yeh, ef we keep on da do wa dat law say, den God gwine bless we een wa we da do.

26Ef one ob oona tink e da do all wa God wahn um fa do an stillyet e onrabble e mout, e da fool esef. Wa dat one da do fa God ain wot nottin.

27De one wa da do wa God wahn, e da hep de chullun wa ain got no modda needa no fada. E da hep de wida-ooman dem wen dey da suffa. De one wa da do dat, e da do wa good fa true an ain got nottin bad een um een we Fada God eye.



 <<  Yakobus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran