Alkitab Mobile SABDA
[VER] : [MAKASAR]     [PL]  [PB] 
 <<  1 Raja-raja 15 >> 

1Ri taung makasampulo assagantuju ri pamarentahanna Yerobeam ri Israel, Abiam a’jari karaeng ri Yehuda,

2siagang tallun taungi ammarenta ri Yerusalem. Amma’na iamintu Maakha, ana’na Abisalom.

3Sangkamma manggena, Abiam jai dosa nagaukang. Tena natulusu’ majarre’ pa’mai’na mae ri Karaeng Allata’alana, tasangkammayai siagang Daud, boe-boena.

4Mingka lanri Karaeng Daud, nanisaremo Abiam sitau ana’ ri Batara, Allata’ala nasombaya Daud, untu’ ansambeangi ammarenta ri Yerusalem siagang ampartahangkangi anjo kotaya.

5Kammaminjo Nagaukang Batara lanri nipakasannangi atinNa ri Daud. Tena nale’ba’ Daud ambalang parekangi parenta-parentaNa Batara, pantaranganna ri parkarana Uria, anjo tau battua ri Het.

6A’bundu’ iji Rehabeam siagang Yerobeam, ia appakkaramulaya ri jammanna Rehabeam kajariangiji lalang wattu pamarentahanna Abiam.

7Riwaya’ maraengannaya ri sesena Abiam le’ba’mi nicata’ lalang ri kitta’ Riwaya’na sikamma karaeng Yehuda.

8Mate tommi Abiam na nitarawang ri Kota Daud. Asa ana’na ansambeangi a’jari karaeng.

9Ri taung makaruampulona pamarentahanna Karaeng Yerobeam ri Israel, ri Yehuda Asa a’jari karaeng.

10Patampuloi asse’re taung sallona ammarenta ri Yerusalem. Toana iamintu Maakha, ana’na Abisalom.

11Sangkamma Daud, boe-boena, Asa napakasannangi atinNa Batara.

12Sikontu baine pasundalaka niaka tugasa’ ri tampa’-tampa’ panynyombang rewataya napakabella ngasengi, siagang sikontu barhalaya nibangunga ri karaeng-karaeng ammarentaya riolonganna napattaena ngasengi ri sikontu pa’rasanganga.

13Toana, Maakha, napammari battu ri kadudukanna salaku amma’ karaeng, lanri le’ba’na appare’ patung barhala salaya untu’ Asyera, iamintu rewata baine untu’ kacoppongang lamung-lamung. Narumbangi Asa anjo barhalaya nampa natunu ri Lappara’ Kidron.

14Manna natenapa naancuru’ ngasengi Asa sikontu tampa’ panynyombanna barhalaya, mingka tuli majarreki mae ri Batara lalang tallasa’na.

15Yangaseng bulaeng siagang pera’ le’baka napassareang manggena mae ri Batara, naerangi mae ri Balla’Na Batara, kammayatompa bulaeng siagang pera’ napassareanga kalenna.

16Ri wattu pamarentahanna Karaeng Asa battu ri Yehuda siagang Karaeng Baesa battu ri Israel, sarroi a’bundu’ anjo ruaya karaeng.

17Baesa nabunduki Yehuda nampa nakassakki kota Rama untu’ antongkoki agang assuluka mange ri Yehuda.

18Lanri kammana Karaeng Asa naalle ngasengi sikontu bulaenga siagang peraka ia niaka ija ri Balla’Na Batara siagang ri balla’ kakaraenganga, nampa nakiring mange ri Damsyik, ri Karaeng Benhadad ri Siria, ana’na Tabrimon cucunna Hezion. Anjo barang-baranga nakiringi siagang nasuro erangi ri siapa are pagawena balla’ kakaraenganga, nampa akkiring pasang angkana,

19"Umba kippare’ passari’battangngang sangkamma le’baka nagaukang tau toata. Nia’ kukiring bulaeng siagang pera’ salaku hadia, nampa kupala’ sollanna kitappu’ passisambunganta siagang Baesa karaeng Israel, sollanna napasulu’ ammotere’ pasukanna battu ri daeraku."

20Nasitujuimi Benhadad anjo pappala’na Asa. Nasuromi komandang-komandang tantarana siagang pasukanna ke’nanga mange ambunduki kota-kota Israel. Nabetami ke’nanga Iyon, Dan, Abel-Bet-Maakha, siagang Kinerot ri ampi’na Tamparang Galilea, kammayatompa sikontu daera Naftali.

21Nalangngere’na Baesa anjo kabaraka, ammarimi nakassakki Rama. A’lampami mange ri Tirza tenamo na’bundu’ untu’ sinampekang.

22Le’baki anjo, sikontu tau niaka ri Yerusalem niparentakangi ri Karaeng Asa untu’ angngangka’ batu siagang kayu le’baka napake Baesa ri Rama untu’ angkassakki anjo kotaya. Anjo bahang-bahanga napakemi Asa untu’ angkassakki kota Mizpa siagang Geba, iamintu kota niaka ri daera Benyamin.

23Riwaya’ maraengannaya ri sesena Karaeng Asa, iamintu kabaranianna siagang kota-kota napakassakkia, le’ba’mi nicata’ lalang ri kitta’ Riwaya’na sikamma karaeng Yehuda. Ri wattunna toamo nitabai garring Karaeng Asa, iamintu bangkenna.

24Matei nanitarawang ri jera’na karaeng-karaenga ri Kota Daud. Nampa Yosafat, ana’ bura’nena, ansambeangi a’jari karaeng.

25Ri taung makarua pamarentahanna Karaeng Asa ri Yehuda, Nadab ana’na Yerobeam a’jari karaeng ri Israel nammarenta ruan taung sallona.

26Sangkamma manggena, ammarentayana rioloanganna, ja’dala’ tommi panggaukanna ri dallekanNa Batara, sa’genna dorakamo tu Israel.

27Baesa, ana’na Ahia, battu ri suku Isakhar, assikongkoloki angngewai Nadab, nampa nabuno. Anjo wattua Nadab siagang pasukanna sitabangi nakurung kota Gibeton ri daerana Filistin.

28Ri makatallung taunna a’jari Karaeng Asa ri Yehuda nakajariang anjo passalaka. Kammaminjo na’jari karaemmo Baesa ri Israel ansambeangi Nadab.

29Tasalloai Baesa a’jari karaeng, nabunomi sikontu kaluargana Yerobeam. Situru’ apa le’baka Napau Batara tete ri atanNa, Na’bi Ahia battu ri Silo, nanibuno ngasemmo sikontu kaluargana Yerobeam, manna sitau tania’ lappasa’.

30Dorakai Yerobeam siagang iami passabakkang nadoraka tommo tu Israel. Lanri kammana anjo napakanassumi Yerobeam Batara, Ia nasombaya tu Israel.

31Riwaya’ maraengannaya ri sesena Nadab, le’ba’mi nicata’ lalang ri kitta’ Riwaya’na sikamma karaeng Yehuda.

32Lalang pamarentahanna Karaeng Baesa battu ri Israel, masarroi kajariang pa’bundukanga iamintu Baesa siagang Karaeng Asa battu ri Yehuda.

33Ri makatallung taunna pamarentahanna Karaeng Asa ri Yehuda, Baesa ana’na Ahia a’jari karaeng ri sikontu Israel. Ammarentai ri Tirza ruampulo angngappa’ taung sallona.

34Sangkamma siagang Karaeng Yerobeam ammarentaya rioloanganna, Karaeng Baesa doraka tongi ri Batara siagang a’jari passabakkang nadoraka todong tu Israel.



 <<  1 Raja-raja 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran