Dual Panel1Garisi’-garisi’ pa’baeng-baenna butta nijo’joka untu’ pambageanna jari-jarina Yusuf appakkaramulai battu ri Binanga Yordan ri ampi’na Yerikho, irayanganna sikamma timbuseng je’neka ri Yerikho sa’genna mange ri parang kassika. Battu ri Yerikho, anjo garisika naiki sa’genna mange ri Betel ri daera pa’monconganga.
2Battu ri Betel, anjo garisika a’lampa mangei ri Lus, allalo ri Atarot, iamintu tampa’ pammantanganna tu Arki.
3Battu anjoreng anjo garisika a’lampa kalauki ri daerana golongang Yaflet, sa’genna mange ri Bet-Horon-Hilir, tulusu’ mange ri Gezer, nampa kala’busang ri Tamparang Tangngaya.
4Iaminjo daera nipassareanga mae ri suku Manasye siagang Efraim, jari-jarina Yusuf, untu’ a’jari butta pisakana ke’nanga.
5Iaminne pa’baeng-baenna butta nipassareanga mae ri kaluarga-kaluarga niaka lalang ri suku Efraim. Ri bageang iraya, garisi’ pa’baeng-baenna buttana ke’nanga appakkaramulai battu ri Atarot-Adar sa’genna mange ri Bet-Horon-Hulu,
6nampa tulusu’ mange ri Tamparang Tangngaya. Mikhmetat niaki ri warakkanna. Timboranna, anjo garisi’ pa’baeng-baenga a’lekkoi mange ri Taanat-Silo, nampa allalo battu iraya mange ri Yanoah.
7Battu ri anjo garisika naungi mange ri Atarot siagang Naharat, nampa tulusu’ a’biring ri Yerikho siagang kala’busang ri Binanga Yordan.
8Ri bageang ilau’, anjo garisi’ pa’baeng-baenna Efraim appakkaramula battu ri Tapuah sa’genna ri pangka Binanga Kana, nampa kala’busang ri Tamparang Tangngaya. Iaminjo butta nipassareanga mae ri kaluarga-kaluarga battua ri suku Efraim, untu’ a’jari pisakana ke’nanga,
9kammayatompa siapa are kota ca’di siagang desa niaka lalang ri wilayah Manasye.
10Mingka suku Efraim tena nanabongkai tu Kanaan battu ri daera Gezer. Iaminjo saba’na nasa’genna kamma-kamma anne nia’ iji tu Kanaan ammantang ri Gezer sipammantangngang siagang tu Efraim, mingka nipassai ke’nanga anjama salaku ata mae ri tu Efraim.