Dual PanelI. Hatuaon ni na marsihohot tu Debata 1-7. II. Panurirangon taringot tu haheheon ni Kristus i 8-11
1Ende sieheteheton sian si Daud. (I.) Sai ramoti ma ahu, ale Debata, ai marhaposan tu Ho do ahu.
2Ningku do mandok Jahowa: Ho do Tuhanku, ndang adong hasonanganku dungkon ni Ho.
3Taringot tu nabadia angka na di tano on: Nasida do angka na sangap jala apala hasudungan ni rohangku situtu.
4Godang do sitaonon ni angka na hapogan paimbarhon Debata, ndang olo ahu mangusehon peleannasida sian mudar, jala subang do rohangku mandok angka goarnasida.
5Jahowa do partalianku dohot panginumanki, Ho do pasintong jambarhu.
6Jadi tano na lunak do partalianku, tongon tahe, na uli situtu do jambarhu.
7Papujipujionku ma Jahowa, na marrohaihon ahu, dohot do puangku palumba ahu bornginna i.
8(II.) Tongtong do hubahen Jahowa tu jolongku, ai molo di siamunhu Ibana, ndang tagamon humordit ahu.
9Ala ni las ma rohangku jala marolopolop tondingku, dagingku pe sinok do maringanan dibahen.
10Ai ndang tagamon pasombuonmu tondingku di banua toru, ndang tagamon loasonmu hasianmu marnida habusukon.
11Sai pabotohononmu do tu ahu dalan hangoluan, sun ma las ni roha di adopan ni bohim, angka hasudungan ni roha masa di siamunmu salelenglelengna.