Alkitab Mobile SABDA
[VER] : [ABUN]     [PL]  [PB] 
 <<  Lukas 5 >> 

1Yefun Yesus mubot bur Yudea ne sa, wam dik yo Yefun Yesus ti mo Em Genesaret de. An ti mone saresa, yé mwa ma ete buk yu gat Yefun Yesus. Yé mwa ne iwa jam Yefun Allah bi suktaru gato Yefun Yesus ki ne.

2Yefun Yesus ti mone sa, An me kwem we mo em de. Ye gato sok boge, án bi kwem anane. Án is kadit án bi kwem re, ete án mus án bi mwi mone.

3Sane Yefun Yesus it mo kwem dik yo, An it mo Simon bi kwem ne. Yefun Yesus it mo kwem ne, orete An ki nai Simon do, "Nan dun kwem ko gan kadit em de et." Simon dun kwem ne, orete Yefun Yesus kem mo kwem mit, ete Yefun Yesus duno yé mwa gato ti mo em de ne.

4Yefun Yesus duno yé mwa ne or, An ki nai Simon do, "Men mbros mu mo nat gato kru et, subere nin bare mwi mone wa men but boge."

5Simon ki nai An do, "Yenggras, noru gado sor kom mo nombrak, men bare mwi ware, men yo ku boge yo mo nde. Sarewo yenggras, Nan syogat ji bare mwi o yo, ji bare mwi satu sor."

6Simon si ye gato si an mbros kwem mu mo nat gato kru, ete án bare mwi mone. Án bare mwi mone sa, án but boge mwa yé teker ware, mwi ne karowa toko rok.

7Boge gato án but ne mwa yé re, sane án ef syim nai án bi yesyim mo kwem doyi ne ma ós án su boge mwa ne. Án bi yesyim mbros kwem ne ma or, án sino tik boge si mwi ne ma, án wat boge mwa ne mo kwem we ne mit. Boge ne mwa yé re, sane kwem we ne ses ware, karowa kru rok.

8Simon (gato gum yo o do Petrus) me boge mwa gato án but ne sa, Simon tu an umsu mo Yefun Yesus gwem, orete an ki nai Yefun Yesus do, "Yenggras, Nan mu kadit ji et, we ji gum yo tep wa ji karowa Nan nde, ji ré anato ye gato ben sukibit."

9Simon ki sukdu ne, we Simon si an bi yesyim bok ne sino yeket boge mwa gato án but su mwi gado ne.

10Ye we gato si Simon ben suk sino, Yakobus si Yohanes, gato Zebedeus bi gan we ne, an we yeket boge mwa ne dom. Orge Yefun Yesus ki nai Simon do, "Nan nyu nde. Su ré yo, bere nan but yetu tepsu nan but boge."

11Sane Simon si bi yesyim tik kwem we ne mo nden or, án misyar án bi suk mwa ne kem, orete án si Yefun Yesus mu sino.

12Kam dik yo Yefun Yesus si An bi pakon ben suk mo kota dik yo. Mo kota ne yebris dik yo gato suki borbuk git ne ma ku Yefun Yesus. Yebris ne do me Yefun Yesus sa, an bare nggwa mo Yefun Yesus gwem. An ndek mo Yefun Yesus do, "Yenggras, Nan imo yo, Nan nggiwa Nan ben ji ge kadit suki re, subere ji yo fowa ku ye yi o nde."

13Yefun Yesus bes An syim, ete syimtok ye ne sa, Yefun Yesus ki do, "Ji iwa, nan ge tom!" Yefun Yesus do ki or-i, ye ne ge-i, an kaim ndo satu re.

14Orge Yefun Yesus syokom an do, "Nan mu nan nuk sukdu subot suk gato Ji ben ne nai ye yi daret nde, wo nan mu kadum nan nggwa nai yesu gato ben suk mo Yefun Allah bi nu subere an watbot nan. An watbot nan, ete yesu ne ki do, sangge, nan ge it, sane yo, nan gwat suge sato Musa ki ne ma tepsu suksom. Nan syo nai yesu ne gre mo bot subere ye jam do, nan ge it anare."

15Kapre Yefun Yesus duyawa ye ne kibot suk gato Yefun Yesus ben ne, yé bok yo mu ki sukdu subot Yefun Yesus frekbot peyo-peyo mwa wai o re. Sane yé mwa ma mo Yefun Yesus subere yé syaretwa An bi sukdu-i. Yé mwa ma ku Yefun Yesus subere Yefun ben án ge kadit án bi suki dom.

16Yé mwa ma meret Yefun Yesus, sarewo wam bok yo Yefun Yesus mu mo pe gato nje yo mo nde subere An ki suk su Yefun Allah mone.

17Kam dik yo Yefun Yesus duno nje sa, ye Farisi si ye Yahudi bi yeguru agama ma mone dom. Án ma kadit kampung mwa mo bur Galilea si bur Yudea sino, si kota Yerusalem dom. Án ma kem mo nu mit, ete án syaretwa Yefun Yesus ki bi sukdu-i ne. Yefun Allah syo An bi suktinggi nai Yefun Yesus, subere Yefun Yesus nggiwa ben ye gato i mone ge.

18Yefun Yesus ki sukdu mo nu mit sa, yé bok yo ma mo nu ne. Yé bok ne gwat ye gato gwes út su bi kwatka gato an sem mone ma. Yé ne syeret os wa án gwat ye gato út ré sok mo nu mit, subere án grem ye gato gwes út mo Yefun Yesus gwem. Yé bok ne werwa sok mo nu mit,

19sarewo yé mwa buk wa os teker ware, yé bok ne yo ku os wa án sok mo nu mit nde. Sane yé ne gwat ye gato gwes út ré it mo nu yu, or án krop wan wak kadit nu yu mu bur. Orete án sa ye gato gwes út ré su bi kwatka ket wak mo nu yu ne is mu mo bur mo Yefun Yesus gwem mo yé mwa miten.

20Yefun Yesus me suk gato yé bok ne ben anato An jam do, yé bok ne onyar kem mo An. Sane Yefun Yesus ki nai ye gato gwes út ne do, "Pa nji, sukibit mwa gato nan ben ne or kadit nan it anare. Ji yo nutbot sukibit mwa gato nan ben ne o nde."

21Ye Farisi si ye Yahudi bi yeguru agama gato kem mone, án jam Yefun Yesus bi sukdu, ete án sino nut mo án mit do, "Ye gare dakai bes An nggwa kok, ete An ki suk tepsu Yefun Allah ko re go! Je u anare ne? Je u anato nggiwa an ki do, sukibit gato men yetu ben ne, or wé kadit men ne? Yefun Allah ka dik sor, wo Ye ré bes An nggwa kok tepsu Yefun Allah!"

22Yefun Yesus jam án bi sukjimnut ne, sane Yefun Yesus ki do, "Suma ben anato nin bi sukjimnut waiyu mo nin mit subot suk gato Ji ki ré ne?

23Sato Ji ki nai yebris ré do, 'Sukibit mwa gato nan ben ne, or kadit nan it anare.' Nin nut do Ji yo nggiwa Ji ki suk ne nde bado? Sato Ji ki do, 'Nan sun, nan mu se!' Te, nin nut do Ji yo nggiwa ben suk ne dom nde e? Sane nde, bere nin jam do, Ji nggiwa benbot sukdu kwa we ne sino.

24Sangge, bere Ji ben ye ré ge. Ji ben ye ré ge subere nin jam do, Ji anato nggiwa Ji ki do, sukibit gato yé mwa ne ben or kadit yé mwa ne dom. Ji ben ye ré ge anato nin jam do, Yefun Allah anato bes Yetu bi Pa to Ji ré." Sane Yefun Yesus ki nai ye gato út ne do, "Ji ki sare do, nan sun, nan pam nan bi sun. Nan satu mu mo nan bi nu sor."

25Yefun Yesus do ki sane, sugane it ye ne sun mo yé mwa gwem. An sun, orete an pam an bi sun gato an sem mone, ete an satu mu mo an bi nu. An satu mu mo an bi nu saresa, an un Yefun Allah bot os.

26Sane yé mwa ne sino yeket ndo nde, ete án un Yefun Allah. Yé mwa nyu ndo nde mo suk gato án me Yefun Yesus ben ne, án ki do, "Su kam ré sa, men me suk gato ben men yeket ndo nde go!"

27Orge Yefun Yesus syesyar kadit nu ne mu mo nden. An syesyar sa, An me yetu ge dik yo gato gum do Lewi. Lewi ré an ye gato nai sugum kadit nje wa pemerintah, sane an kem mo nat gato yé syo bi sugum nai an ne. Yefun Yesus ki nai Lewi do, "Nan ma simo Ji et!"

28Sane Lewi ti, an misyar an bi suk mwa ne kem, ete an simo Yefun Yesus.

29Orge Lewi kon pesta wa Yefun Yesus mo Lewi bi nu. Lewi kendo yé mwa gato nai sugum kadit nje wa pemerintah si ye yi yo o ma sisu Yefun Yesus si bi pakon git sugit sino mone.

30Sarewo ye Farisi si yeguru agama bok yo gato sok mo ye Farisi bi det-i, án nut do, suk gato Yefun Yesus ben ne ibit. Sane án ndo mo Yefun Yesus bi pakon do, "Suma ben anato nin si ye gato nai sugum kadit nje wa pemerintah si ye gato gum ibit ré git sugit sino sare ne?"

31Sane Yefun Yesus ki nai án do, "Ye gato yo i nde, bere an yo meret dokter nde, wo ye gato i sa, bere an meret dokter.

32Ji yo ma mo bur ré wa Ji kendo ye gato nut do, an sa, ye gato ben sukndo ne nde. Ji yo ma wa ye ga sane nde, wo Ji ma mo bur ré wa Ji kendo ye gato ben sukibit, yé ne tepsu yé gato i, subere yé ne brek kadit os ibit, ete jammo Ji et."

33Yé ne ki nai Yefun Yesus do, "Yohanes bi pakon si ye Farisi bi pakon, wam bok yo án ki suk su Yefun sor, án mewa án nggwa kadit sugit yei. Sarewo Nan bi pakon ré, kamdik-kamdik án git sugit sor, án yo ben sato Yohanes bi pakon-i si ye Farisi bi pakon-i ne nde."

34Yefun Yesus ki do, "Ye konwa yebris si bi nggon kra yu ne te, bere ye syogat yebris ne bi yesyim bok ne mewa án nggwa kadit sugit mone bado? Mo nde!

35Sarewo bere yé kar yebris gato kra ne wé kadit án orete yo, bere su kam gane án mewa án nggwa kadit sugit."

36Yefun Yesus gwat sukamno dik yo sare do, "Men yo nai san det be, ete men bitwa san rok gato syik nde, we men do mus san ne yo, bere san det be ré nit, yo tepsu san rok nde, sane san be tik san rok ne syik sye o re. Sane bere san det rok ibit wai o re. San det gato be ne yo tepsu san rok nde re.

37Sane dom, men yo sye nau anggur be mo sukbo gato rok nde, we i-su tut mo mit, ete bere sukbo ne pet anato ben sukbo ibit, orete nau ne sye kadit re. Sane bere suk we ne, gato nau si sukbo ne ibit sino re.

38Men ben sane nde, wo men sye nau anggur be mo sukbo be, subere nau si bi sukbo ne sino kem ndo.

39Sane dom, ye gato jam da nau anggur gato rok, bere an bariwa da nau anggur gato be. An ki do, 'Nau anggur gato rok ne ndo wai kadit nau anggur gato be.' "


  Share Facebook  |  Share Twitter

 <<  Lukas 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran