Alkitab Mobile SABDA
[VER] : [BABA]     [PL]  [PB] 
 <<  Wahyu 21 >> 

1Dan sahya tengok satu langit yang bharu dan satu bumi yang bharu: kerna langit yang dhulu dan bumi yang dhulu sudah lnyap; dan laut pun t'ada lagi.

2Dan sahya tengok negri yang kudus itu, Yerusalim yang bharu, turun deri shorga deri-pada Allah dngan s-lngkap-nya, sperti satu kmantin prempuan yang sudah berrias kerna kmantin jantan.

3Dan sahya dngar satu suara yang bsar deri takhta itu, yang kata, "Ingat-lah, Allah punya khemah ada sama-sama manusia, dan dia nanti tinggal sama-sama dia-orang, dan dia-orang nanti jadi dia punya bangsa, dan Allah sndiri nanti ada sama-sama dia-orang, dan jadi Tuhan-nya:

4dan dia nanti sapukan smoa ayer-mata deri mata dia-orang; dan kmatian pun t'ada nanti ada lagi; dan ratap dan mnangis dan sakit pun t'ada nanti ada lagi: sgala perkara yang dhulu sudah lnyap."

5Dan dia yang dudok di atas itu takhta pun kata, "Ingat-lah, sahya ada bharukan smoa perkara." Dan dia kata, "Tulis-lah: kerna ini perkata'an ada kperchaya'an dan btul."

6Dan dia kata sama sahya, "Smoa-nya sudah jadi. Sahya-lah Alfa dan Omega, yang mula-mula dan yang blakang skali. K-pada orang yang haus, sahya nanti kasi minum dngan t'ada bayeran deri-pada mata-ayer yang kasi hidop.

7Dia yang mnang nanti dapat smoa ini perkara jadi psaka-nya; dan sahya nanti jadi dia punya Tuhan, dan dia nanti jadi sahya punya anak.

8Ttapi smoa orang yang pnakot, dan yang t'ada perchaya, dan yang kbnchian, dan smoa pmbunoh, dan orang chabol, dan orang hobatan, dan orang yang smbah datok, dan smoa pmbohong, dia-orang smoa punya bhagian di dalam kolam yang mnyala dngan api dan blerang; ia'itu kmatian yang nombor dua."

9Dan datang pula satu mla'ikat deri antara itu tujoh mla'ikat yang pegang itu tujoh mangkok, dan yang pnoh dngan itu tujoh chlaka yang pnghabisan: dan dia chakap sama sahya, dan kata, "Mari, sahya tunjokkan sama angkau itu kmantin, ia'itu Anak-domba itu punya istri."

10Dan dia bawa sahya dalam Roh di atas satu gunong yang bsar dan tinggi, dan tunjokkan sahya Yerusalim, negri kudus itu, s-tngah ada turun deri shorga deri-pada Allah,

11dan ada Allah punya kmulia'an: dan dia punya trang sperti satu permata yang indah skali, sperti batu yashab, jerneh sperti batu hablur:

12dan itu negri ada satu tembok yang bsar dan tinggi; ada dua-blas pintu-nya, dan di pintu-pintu itu ada dua-blas mla'ikat; dan ada nama-nama tertulis di situ, ia'itu nama dua-blas suku-bangsa anak Isra'el:

13sblah timor tiga pintu, sblah utara tiga pintu, sblah slatan tiga pintu, sblah barat tiga pintu.

14Dan itu negri punya tembok ada dua-blas alasan, dan atas itu alasan ada dua-blas nama, ia'itu nama dua-blas rasul-rasul Anak-domba itu.

15Dan dia yang berchakap sama sahya ada pegang kayu ukoran, ia'itu satu bambu mas, mau ukorkan itu negri, dngan dia punya pintu dan tembok.

16Dan itu negri punya kdudokan ada ampat bersgi, dan panjang-nya sama dngan lebar-nya: dan itu orang ukorkan itu negri dngan itu bambu, dua-blas ribu rlong punya panjang: dia punya panjang dan lebar dan tinggi smoa sama.

17Dan dia ukorkan tembok-nya s-ratus ampat-puloh-ampat hasta, sperti satu manusia punya ukoran, ia'itu sperti mla'ikat punya.

18Dan itu tembok punya bangunan deri batu yashab: dan itu negri deri-pada mas suchi, sperti kacha yang jerneh.

19Itu tembok negri punya alasan berrias dngan macham-macham punya permata. Alasan yang pertama yashab; alasan nombor dua yakut biru; alasan nombor tiga akek yang puteh; alasan nombor ampat zamrud;

20alasan nombor lima batu unam; alasan nombor anam akek merah; alasan nombor tujoh ratna chmpaka; alasan nombor lapan firus; alasan nombor smbilan yakut kuning; alasan nombor s-puloh akek hijau; alasan nombor s-blas batu nilam; alasan nombor dua-blas batu kchubong.

21Dan itu dua-blas pintu jadi dua-blas biji mutiara; masing-masing pintu itu deri-pada s-biji mutiara: dan itu negri punya jalan deri-pada mas suchi, sperti kacha yang orang boleh tengok trus.

22Dan sahya t'ada tengok ka'abah dalam-nya: kerna Allah Tuhan yang maha kuasa dan Anak-domba itu jadi ka'abah-nya.

23Dan sama itu negri matahari atau bulan t'ada berguna mau trangkan dia, kerna Allah punya kmulia'an ada trangkan dia, dan Anak-domba itu jadi dia punya plita.

24Dan sgala bangsa nanti berjalan oleh chahya-nya: dan raja-raja bumi bawa dia-orang punya kmulia'an k-dalam-nya.

25Dan dia punya pintu negri t'ada skali-kali nanti di-tutop tempo siang hari (kerna di sana t'ada nanti ada malam):

26dan orang nanti bawa sgala bangsa punya kmulia'an dan hormat masok dalam-nya:

27dan dalam-nya t'ada skali-kali nanti masok apa-apa yang najis, atau orang yang buat pkerja'an yang kbnchian atau bohong: ttapi chuma sgala orang yang nama-nya sudah tertulis dalam Anak-domba punya kitab hidop.


  Share Facebook  |  Share Twitter

 <<  Wahyu 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran