1Ro Petrus, Yesus Kristus wawan ḇyedi, faro kawasa Kristen ḇefamakmok ro sup Pontus, Galatia, Kapadokia, Asia-Kasun ma Bitinia,
2isoine kawasa skinfir, imnis kuker Allah, Kma koḇedi, aw ḇyedi ma Rurya fyasren kwar, insa sisouser faro Yesus Kristus ma ḇesma fasasren kuker rik ḇyedi. Saswar-fakamaman ma aski-ḇaḇye ro Allah fyarsbawer syadi faro mko kada.
3Sanandik faro Allah ma Kma ro Manseren koḇedi Yesus Kristus, snar ḇaḇye ḇyedi daḇen kaḇer ko kwar snar Yesus Kristus aḇiḇer ḇyedi rofandu ḇemarsya, faro kankenem oso ḇefo kuker saneraro,
4insa kosma rarwas oso nari ḇero ḇa, ḇemamas ḇa ma ḇemaryoi ḇa, ḇekram ro boiyaswa faro mko.
5Isoine mko, Allah fyaduru kuker samambraḇ ḇyedi snar kakyar mkoḇena rofafisu mkowaf koreri ḇefasos kwar fanari ḇyeḇefasnai ro awar ḇepupesya.
6Mkoryaḇ, mboi fafisu ine mko ḇekandera snar mkosma farawrowes nabor.
7Nakam ndarirya fanfasnaḇair kakyar ḇekaku bedi -- ḇeḇemaeja syadi ro brawen nari ḇero, simnasen kakaku ḇyedi kuker for -- isof mkosma sanandik kanawnow ma ḇaḇesyowi ro ras Yesus Kristus fyasnai mankundiya.
8Mko mam ḇeponi ḇaim, ḇape mkoswar i. Knikine mko mam i ḇaimo ḇape mkokyar faro i. Mkoryaḇ kuker raryaḇ ḇeba syadi.
9Snar mkosma bon kwar ro kakyar mkoḇena, isoine koreri faro rur mko ḇesi.
10Koreri iso nabisya skukeḇ kuker aunos, ma sḇardi kwar ro saswar-fakamaman Allah ḇyuk faro mko.
11Ma skukeḇ rariso fafisu rosai koreri nari ryamaya, imnis kakara Kristus Rur ḇyedi ḇekenem ro si. Rofafisu ani Rur ḇyedi ḇyardi faro si ro kandera-kandera Kristus nari ismana ma ro baba ḇyedi nari ḇeyom ro ḇarpurya.
12Fasasnaya isya kwar faro si, mboi suffarmyan mankunsi ḇardi ḇa, ḇape suffarmyan mko kuker roi ḇeḇor kam baboine sḇaryas kwar faro mko rofandu si, kuker Rur Ḇesren, ḇewanker boiyaswa, faḇeḇaryas Ankankinem Ḇeḇye faro mko, ma malaikatsya simarisen fasifawi rosai sḇaryas ani kako.
13Eḇedari wepen aw, ma waswaruser naḇye insa rwir saneraro ḇena kam faro saswar-fakamaman nari ssḇuk faro aw rofyor Yesus Kristus kyaḇerma werya.
14Mko kenem imnis romawa ḇeḇeuser ma mkoso awer rmomen nafsu ro ḇeponiwara rofyor ḇaḇefawawi ḇa mkoḇena,
15ḇape kankenem mkoḇena kam nasren imnis raris Yesus Kristus saranden ḇyedi, ḇeyor mko kwar ani kada,
16snar sfas ro Refo radine: Mkosren snar aya ine yasren.
17Ma rofyor mkap Allah ḇe-Kma, isoine Allah ḇemamkaryer ḇa mboi ḇeḇemankara faro snonkaku kam imnis fararur ḇyena inja mkokenem kuker araryof rofyor mkoisya ro supswan ine.
18Snar mkofawi, mko ḇeḇeḇak namuk kwar ro kankenem ḇeḇefromo kpu mkoḇesi sḇefa ḇeḇewaris faro mko. Ḇaḇyak ani roi oso nari ḇeroḇa imnis sarak roḇa brawen,
19mboi kuker Kristus rik ḇyedi, ḇekakur kaku, ḇemnis raris rik domba mkun ḇemamas ḇa ma ḇefarorew ḇa.
20Allah kyinfir Kristus kwar rofyor supswan ine ḇyeḇefrur ḇaimya, ma rofyor awar ḇepupes ine, ryama ḇesupswan ine insa ḇyuk koreri faro mko.
21Kuker i mkokyar faro Allah ḇeḇawes i kwar rofandu ḇemarsya ma ḇeḇuk baba faro i isof kakyar ma saneraro mkoḇena faro Allah.
22Snar mkofasren mankun mko kwar kuker ḇaḇeuser faro napnapesya, isof mkoswar faro naek srar mkoḇesi kuker napnapes, inja kaku ḇeri mkoswaryae mko kuker sne ḇesiper.
23Snar mko ḇeḇeyaḇen kaḇer kwar famkobabo kuker Allah wos ḇekenem ma ḇekain fyoro ḇyedi mboi mko ḇeḇeyaḇen ro ḇaḇesnonkaku ḇa, mboi ro Kma ḇekain fyoroya.
24Snar ro Refo sfas radine: "Snonkakusya kam simnis aḇris, ma baba sena kam namnis aḇris pampen. Aḇrisya myaryoi, ma pampenya kako kyapaf,
25ḇape Manseren wos ḇyedi kyain faswef isof fyoro-fyoro." Ine kada Ankankinem Ḇeḇye ḇyuk faro mko.