1Ro Paulus, Silwanus ma Timotius, faro kawasa jemaat Tesalonika ro Allah Kma koḇedi ma Manseren Yesus Kristus.
2Saswar-fakamaman ma aski-ḇaḇenaḇye ro Allah, Kma koḇedi, ma ro Manseren Yesus Kristus ryowus mko kada.
3Naek srar, ro ras nakam nkokofen kasumasa faro Allah snar mko. Ma nkofrur rarirya, snar kakyar mkoḇena nfamfon syadi ma saswaryae mkoḇena nsambraḇ syadi rofandu mko,
4isof ro Allah jemaat ḇyena mankun nkomsik snar mko snar ḇaḇefarmku mkoḇena ma kakyar mkoḇena ro kandera ma wayam ḇeḇor mkosmana:
5fasasna oso ro napnapes ro Allah ḇaḇemankara ḇyedi, ḇekofen mboi mkosyus famkosun ro Allah Ḇaḇesasoser ḇyedi, snar rofafisu ine mkoḇekandera kuker Ḇaḇesasoser ani.
6Snar ḇeḇenapnapes Allah nari myunsu ḇaḇewayam mkoḇena faro ḇeḇewayam mkosya.
7Ma ḇyuk ḇaḇemkei faro sewayam mkoya, ma faro nko kako, rofafisu Manseren Yesus Kristus fyasna mankundi fnoḇek malaikat ḇyesi ro boiyaswa kuker papoik ḇyedi,
8rofor ḇesak-ḇesber ma myunsu faro si ḇefawi Allah ḇasya ma ḇeḇeuser Ankankinem Ḇeḇye ro Yesus, Manseren koḇedi ḇa.
9Sikada nari sisma samamyai raro fyoro-fyoroya, sḇinkwanbur Manseren ḇarpon ḇyedi ma ro papoik samambraḇ ḇyedi,
10rofyor ryama ro ras ani kawasa ḇesren ḇyesya nari sisandik baba ḇyedi ma snonkaku ḇekyarsya sikandori, snar ḇaḇesaksi nkun faro mkona mkokyarna kwar.
11Rarirya nkoḇenadiwarek mko ḇesyakwar kako, insa Allah koḇedi kyara mkosyus faro fararyor ḇyedi ma kuker samambraḇ ḇyedi ifrur mnis marisen mkoḇena famkofrur roi ḇeḇye ma ḇyeimnis fararur kakyar ḇeḇor mkoḇena kam,
12isof snonsnon Yesus, Manseren koḇedi, isma baba snar mko ma mkosma baba snar i, imnis Allah koḇedi saswar-fakamaman ḇyedi ma Manseren Yesus Kristus.