1Gayus, naek yedi yaswar kaku! Aya, manfarkin jemaat, yaswar kaku ḇeri naek aw.
2Yaḇenadiwarek insa nakam naḇye kuker aw ma wasma pararei imnis raris rur bedi iḇye kako.
3Yaryaḇ kaku rofyor naek Kristen ono srama ma sikofen ḇadir ma beya ḇaḇeuser bedi ro ḇaryas ḇenapes ro Allah, snar wakenem ma wasouser ḇaryas ḇenapes ani.
4Roi oso ḇa ḇefrur fayaryaḇ syadi ro yamnaf romawa yesi sikenem imnis ḇaryas ro Allah.
5Naek yedi! Sasoasuser naek bedi komam fyasna ro rosai naek wafrurya faro naek Kristensya; ma naek wafawi ḇaimsya kako wuffarmyan si.
6Sikofen ḇadir kwar faro jemaat ro dine ro saswar bedi. Wafnoḇek si insa simbran pdef ro mararan sedi. Wafrur rarirya imnis raris Allah marisen ḇyedi,
7snar naek ansi mararan seja suffarmyan faro Kristus. Sifararur ma sisma fafnoḇek rosai ḇa kako ro kawasa ḇekyar faro Kristus ḇa.
8Rarirya kawasa Kristen ko kofnoḇek min Kristen koḇesi imnis raris sine, insa koso si ro ḇaḇesewar sedi fakoḇaryas ḇemoḇ nakam ro Allah ḇekakuya wos ḇenapes ḇyedi.
9Yafas kwar syap ḇeknampu faro jemaat, ḇape Diotrefes ḇemarisen ḇeḇe manfarkin ro jemaat, imewer iso aya.
10Nari rofyor yarafa, yawos ro rosai ifrur kwar, isoine ro roi ḇarḇor ma sararer ikofen ro inkoya! Ḇape nakam namnis ḇaim faroi. Rofyor naek Kristen koḇesi srama faro i, imewer isrow si. Isyadi wer myunwarek kawasa ḇemarisen ḇesrow naek srar ansi, ma iwan fasisasyarbur jemaat!
11Naek ayedi yaswar kaku, waso awer rosai ḇeḇye ḇa. Mboi waso rosai ḇeḇye. Mansei ḇefrur roi ḇeḇye, ḇyeknam ro Allah. Ma mansei ḇefrur roi ḇarḇor, isoine isrow Allah ḇaim.
12Kawasa kam sisandik Demetrius. Ma ro ḇaryas ḇekaku ro Allah kako, sisandik i. Inko kako inkosandik i, ma mkofawi sanandik inkoḇena nkaku.
13Roi nabor ḇeḇefandun yaḇe yakofen faro mko, ḇape yaḇaḇir iḇye syadi kuker syap awer.
14Yakyar fyoro ḇa nari yasrow mko wer, ma nari kowawos ro ḇarpon kuker ḇarpon. (1-15) Aski faro aw! Min koḇesi ro dine sfarem aroo faro naek aw. Wakofen ḇadir aroo yena faro min kobansi kam.