Alkitab Mobile SABDA
[VER] : [BIAK]     [PL]  [PB] 
 <<  Ibrani 3 >> 

1Inja, naek srar Allah kawasa ḇesren ḇyesi, ḇesma rarwas ma fararyor ro boiyaswa, mkomam faro Manwawan ma Imam Ḇeba kokarem ani, isoine Yesus,

2Yesus iso ḇeḇeuser Allah ḇekinfir i kwar, imnis Moses kako ḇeponya ḇeḇeuser ḇefrur mnis rum ḇesiper ḇyedi.

3Yesus isma ḇaḇesyowi ḇeba syadi ro Moses, imnis snon ḇefawinananem ḇaḇawes rum ḇyesyowi syadi i ro rum sḇawesya.

4Snar snon oso ḇefawinananem ḇaḇawes rum ḇape snon ḇefawinananem ḇaḇawes roi ḇeborkam isoine Allah.

5Moses ikada ḇyeuser Allah rum ḇyedi ḇesiper imnis manfamyan ḇaḇesaksi roi kam Allah fyasna faroi nari ḇerama na.

6Ḇape Kristus ikada ḇyeuser imnis Rumkun nari ḇeḇeḇru ro Allah rum ḇyedi; ma Allah rum ḇyedi isoine koine, rofyor koisya ro papupesya kuf nako ro kakyar ma saneraro ro rosai komsik kukerya.

7Snar rarirya, imnis raris Allah Rur ḇyedi ikofen: "Ro ras ine, rofyor Allah mkaren ḇyedi,

8mkosnemna npakrek awer imnis kpu mkoḇesi spakrek, rofafisu sisma fafrowes ro sup ḇeursba.

9Rodiwa kpu mkoḇesi smam fararur ayena kwar, ro wampasi wambarek samfur rifiak, ḇape sifrowes sas aya kuker nyan simnasen aya.

10Rarirya yamsor si, ma yakofen: 'Sikada indo sankarkar, ma ssmambaḇir nyan ayena ḇa.'

11Isof yamsorḇo yafores: 'Nari saksun ro moḇ mananai ayedi ḇa.' "

12Naek srar, mkepen mko, insa rofandu mko snon oso iḇarḇor awer ma ikyarḇa awer ma isusubur Allah ḇekenemya.

13Inja rasras mkofarkor yae mko, rofafisu sapḇe "Ras Ine," imnis ono rofandu mko sisnesna npakrek, snar ankarkar sararer ro sasarya.

14Snar kosma kwar rarwas ro Kristus, inja kuf nadworen ro kakyar ḇepon koḇena isof ras ḇepupesya.

15Ine kada sfasi ro Refo: "Ro ras ine rofyor mkorower Allah mkaren ḇyedi, mkosnemna npakrek awer, imnis kpu mkoḇesi spakrek rofafisu sisampum Allah."

16Inja, snonkaku mansesiso ḇerower Allah mkaren ḇyedi raimnai ḇesampum i? Sikada kawasa kam Moses dun faḇesasyarbur sup Masir inke?

17Manseren Allah imsor ro wampasi wambarek samfur rifiak? Faro si ḇefrur sasar ma ḇesapi ḇemar ro sup ḇeursḇa?

18Mansesiso Allah fyoreswas nari ḇeyaksun ḇa romoḇ mananai ḇyedi? Mansesiso Allah ikofen wersya? Sikada snonkaku besampum Allah inke?

19Rarirya komam kada, mboi sima saksun ḇa snar ḇaḇekakyar ḇa sena.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Ibrani 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel