Dual Panel1Raimnai malaikat ḇeḇerimya iwuf kḇur ḇyedi, ma yamam kum oso isapi ro nanki ḇesupna. Ssḇuk faro kum ani asyopder mun aiḇui.
2Ma kum ani syeḇen mun aiḇui; ma paw nasasyar roi imnis paw ro apen ḇeba. Ori ma sansoren ḇoka pyampan, snar paw ro mun aiḇui.
3Raimnai kampam sisasyar ro paw ani sisabu ḇesupna. Ssḇuk papoik faro kampam ansi imnis raris ssḇuk faro manora (aiwan ḇeyarek sayaryur).
4Sidwarek si fasan awer aḇris roḇa ai knam, roḇa rokaker ḇesena. Mboi smun monda snonkaku ḇesma kakop aḇyair ro Allah ḇa ro andar sena.
5Kampam ansi sidwarek si insa smun awer snonkaku ansi, mboi sifrur kandera monda si paik ririm. Sayaryur ani imnis kandera manora, ḇeyarek, rofyor darek snonkaku.
6Paik ririm ani, snonkaku ssḇesasewar insa simar, ḇape nari simar ḇa; simarisen simar mura, ḇape marmarya ḇyinkwanbur si.
7Kampam ansi komam simnis kuda-kuda ḇefasos faḇeḇe embroḇ. Ro ḇrusena roi oso komam imnis wower brawen. Ḇarpon sena namnis snonkaku.
8Snonburyam sena namnis snonburyam bine, ma nakor sena namnis singa nakor. (Aiwan ḇeyan ḇepek.)
9Sisosefwarek sianderna kuker adai sansun mankarmomen. Prer sena ndok imnis rakrok dandonek kuda kareta ḇeḇeḇeyoper ḇe embroḇ.
10Sḇepurai ma sarek sayaryur imnis manora. Ma ropurai sena sisma samambraḇ fasifrur kandera snonkaku isof paik ririm.
11Sisma wairek ḇesasoser si, wairek ani isoine malaikat ḇekarem ro munaiḇui. Snonsnon ḇyedi ro wos Ibrani Abadon; ma ro wos Yunani Apolion (isoine "Ḇefrur makakok").
12Raro ḇeponya isyonde kwar. Posa kwar nari raro risuru surama wer.
13Ḇarpurya malaikat ḇeḇewonemya iwuf kḇur ḇyedi. Ma yarower mkaren oso ryok ro dopir rifiak ro rokef farsarser brawen ro Allah ḇarpon ḇyedi.
14Mkaren ani ikofen faro malaikat ḇeḇewonem ani, "Per malaikat rifiak siyaḇek fanam war Efratsya!"
15Raimnai sper malaikat ansya, snar sfasos si kwar faḇe oras, ras, paik, ma wampasi wambarek anna fasmun mun rikior ro kawasa kam.
16Sikofen maro aya mboi dandonek sarar ḇeyek kudasya sesyaran-risyaran utin risuru.
17Ma ro mamam, yamam kuda ansi ma ḇeyeksisya ssun sansun mankarmomen ḇefanandik ḇesak, ḇerumek imnis batu nilam, (karui ḇemnis for ḇerumek) ma nnanyar ḇebelerang (roi ḇesak ḇesam kaku ḇenanyar). Kudasya siḇrusna namnis singa (aiwan ḇeyan ḇepek) siḇrusna, ma ro sisḇasna nasasyar for, paw, ma belerang.
18For, paw, ma belerang ḇesasyar ro kuda ansi sisḇasna nmun kawasa mun rikior kuker kandera rikior anna.
19Samambraḇ kudasya neknam ro sisḇasna ma purai sena kako. Purai sena nbe ikak ḇru. Kuker purai sena, kuda ansi ssḇuk kandera faro snonkaku.
20Ḇape kawasa ḇese ḇemar ḇa ro kandera anna kako, simbror ḇa ro roi mankunsi sifrurna. Simnai ḇa ro sisyom Ibiris, ma amfyanir brawen, sarak, kansai, karui ma ai, ḇemamḇa, roḇa ḇerower ma ḇembran ḇa.
21Ma simbror ḇa ro smamun, sifrur fawawi rawan, sifrur farḇuk ma skaraw.