Alkitab Mobile SABDA
[VER] : [BIAK]     [PL]  [PB] 
 <<  Yakobus 2 >> 

1Naek srar ayesi, imnis snonkaku ḇekyar faro Yesus Kristus, Manseren koḇedi ḇepoksyadi, kakyar ani mkofrur i kuker mkomam karyer awer.

2Snar, rofyor snon oso syun ro fananjur mkoḇedi kuker iwur kawin brawen ma syansun sansun ḇepyum ma snon ḇesaḇarar oso kako ryama daksun kuker sansun ḇepyum ba,

3ma nari mkoḇesyowi snonkaku ḇesansun-sansun ḇepyum ani ma mkokofen faroi: "Tuan kwain ro moḇ ḇeḇye ine!" -- mboi faro snonkaku ḇesaḇarar ani mkokofen: "Wores rodiwa!" roḇa: "Kwain rosop fanam wemin ayesi!"

4Mkofawiḇake mkofrur kwar ḇaḇemambaḇir ro mkosnemna ma mkofrur imnis mankara kuker kakara ḇeḇarḇor?

5Mkomnaf naḇye, ne naek srar yaswar kaku! Mkofawiḇake Allah kyinfir snonkaku supswan ine skaraḇe ḇesaḇarar fasekayan ro kakyar ma sepusaka ro ḇaḇesasoser Allah ḇyeasas kwar faro mansei ḇeswarisya?

6Ḇape mkokoryae snonkaku ḇesabararsya kwar. Mkofawiḇake snonkaku ḇeḇekayan siso ḇeḇewayam mko ma ḇesmer mko ḇekankain karkara ḇenapes?

7Mkofawiḇake siso ḇeyonef snonsnon ḇesma syowi syadi, eḇedari Allah nya mko?

8Ḇape, rofyor mkofruruser sasoser ḇepon sfas ro Refo: "Waswar snonkaku min besi imnis waswar mankundaw."

9Ḇape, mkomam karyer ido, mkofrur sasar, ma mkoḇeyuk Allah sasoser ḇyena.

10Snar mansei ḇeḇeuser sasoser ḇeḇor anna kam, ḇape ḇyeuser mnuk osoḇa rona, ḇyesasar farona kam.

11Snar ḇekofen ḇo ḇeyoḇo: "Wafrur farbuk awer," Ikofen kako: "Mamun awer." Inja mkofrur farbuk ḇa ḇape mkomamun, rarirya mkoḇeyuk sasoserna kako.

12Mkawos ma mkofrur imnis snonkaku nari ḇesun ro ḇaḇemankara kuker sasoser ḇeḇuk makakei faro snonkaku.

13Snar ḇaḇemankara ḇena saswari isyaḇa nari ryarirya faro ḇesaswar ḇasya. Ḇape saswari nari ḇyuk fainda faro mankaraya.

14Fainda rosai, naek srar ayesi, rofyor oso ikofen, ikada nya kakyarya, ḇape fyasna ro rari fararur ḇyena ḇa? Nari kakyar berarirya ḇyuk koreri faroike?

15Rofyor naek oso roḇa srar oso isma sansun ḇa ma dananjar roḇean ro ras-ras,

16ma snonkaku oso rofandu mko ikofen: "Parperoo, swabusum maramuk ma wanan rao warbor!" -- ḇape ḇyuk rosai ḇeḇefandun faroiḇa, fainda rosai ro wos anna?

17Rarirya kako kuker kakyarya: Kakyarya ifnoḇek farararur ḇa, kakyar ani imar.

18Ḇape nari snonkaku ono sisya sikofen: "Faro aw kakyarya isya ma faro aya fararurya isya," nari yakarem faroi: "Fasna maro aya kakyar bedi fnoḇek fararur ḇa, ma nari yafasna faro aw kakyar ayedi kuker fararurna."

19Wakyare, snar Allah oser monda isya. Ḇape rodursya kako sikyar rarirya ma sradai.

20Ne, snonkaku ḇefawiroyoḇa, wamarisen fakwarem ro knikine, mboi kakyar kuker fararur ḇa irya kakyar ḇeḇefainda ḇa?

21Mkofawiḇake Abraham kma koḇedi, ssḇuk napnapes faroi snar fararur ḇyena, rofyor ḇyuk romawa ḇyedi Ishak ḇefarsarser, ro rokef farsarserya?

22Mkomam, mboi kakyarya fyasna ifararur kayam kuker fararurya rarirya kakyar ani imnis.

23Rarirya mnuk ro Refo ḇekofen: "Abraham ikyar faro Allah, ma Allah kyori ḇeḇenapes." Eḇedari Abraham sapiḇe: "Allah bati ḇyedi."

24Inja mkomam, mboi snonkakusya sisma napnapesya snar fararur sena ma snar kakyar monda ḇa.

25Mkofawiḇake Rakhab, bin befrur farbuk ani kako, isma napnapes snar fararur ḇyena, rofyor iyokef manpaf Israel ro rum ḇyedi, raimnai fyaspar si ro nyan oso ḇese?

26Snar imnis baken ḇena rur ḇa irya kakyar ḇemar rirya, rarirya kako kakyar fnoḇek fararur ḇa irya kakyar ḇemar rirya kako.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Yakobus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel