Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 10 >> 

Peter an Cornelius

1One man been dey een Caesarea name Cornelius. E been a offisa fa de group ob sodja fom Rome wa de people call de “Italy Sodja Dem.”

2Cornelius an all e fambly beena woshup an feah God. E been gii heapa good ting fa hep dem wa ain hab nottin. An e beena pray ta God all de time.

3One day bout shree o'clock, God show Cornelius one bision, real plain. E see God angel come een an tell um say, “Cornelius!”

4Cornelius scaid fa true, an e look haad at de angel an say, “Wa ya wahn, Lawd?” De angel tell um say, “God yeh ya pray wa ya beena pray. E see de good ting ya beena gii ta dem wa ain hab nottin. E heppy wid wa ya da do an e da ansa ya.

5Sen some man dem now ta Joppa fa bring back one man dey, name Simon, wa dey call Peter.

6E da stay dey wid noda man name Simon, wa da wok wid lezza. E da lib een a house close ta de seasho.”

7Den God angel dat beena taak ta Cornelius gone way. Cornelius call two ob e house saabant an one sodja wa been e right han man an woshup God.

8Cornelius tell um all wa done happen an e sen um ta Joppa.

9Bout noon de nex day, wiles dem man yah beena gwine long de road an dey beena git close ta Joppa, Simon Peter gone ontop de flat roof ob de house weh e da stay, fa pray.

10Peter hongry an e wahn sompin fa nyam. Wiles de people een de house beena fix some food, God show Peter one bision.

11E see heaben open op. Sompin dat look like a big bed sheet da come down. Dat sheet beena leddown fom heaben by e fo cona til e git ta de groun.

12All kind ob critta, animal an reptile wa crawl pon de groun an wile bod been dey pon de bed sheet.

13Peter yeh a boice da tell um say, “Peter, git op. Kill some dem an nyam um!”

14Bot Peter say, “No, Lawd! A ain neba nyam nottin dat we Jew Law say ain fit fa nyam.”

15De boice tell Peter gin say, “Wasoneba God done mek good fa nyam, ya mus dohn say e ain fit fa nyam.”

16Dat happen shree time an den all ob a sudden dat ting like a bed sheet gone back op eenta heaben.

17Dat bision wa Peter see mek e wonda, an e beena wahn fa ondastan wa dat bision mean. Same time, de man dem dat Cornelius sen been find out weh Simon house been. Dey done come an beena stan op een front ob de gyate.

18Dey holla say, “A man name ob Simon Peter da stay yah?”

19Peter still beena try fa ondastan wa God done show um een dat bision, wen God Sperit tell um say, “Look! Shree man dey yah, da look fa ya.

20Mus git op an go down fa meet um. Mus dohn be scaid fa go wid um, cause A done sen um ta ya.”

21Peter git op an gone down fa meet um. E tell dem man say, “A de man oona da look fa. Hoccome oona come?”

22Dey tell um say, “De Roman offisa Cornelius sen we ta ya. E a man wa da waak scraight wid God an da feah um. An all de Jew people spec um fa true. God done sen e angel ta Cornelius. E tell um fa sen fa ya fa go ta e house so dat e kin yeh wa ya gwine tell um.”

23So Peter vite dem man fa go eenside de house fa sleep dey dat night. De nex day, Peter wid de shree man lef fa go ta Cornelius een Caesarea. An some de bredren fom Joppa wa bleebe pon Jedus, dey gone long wid um.

24De day atta dat, dey come ta Caesarea. Cornelius beena wait fa um. E done call e kin people an e true fren dem togeda.

25Wen Peter gone eenside de house, Cornelius come meet um an git down pon de groun front ob e foot fa woshup um.

26Peter mek Cornelius git op. E tell um say, “Git op, A jes a man like ya.”

27Wiles Peter beena taak ta Cornelius, dey beena gwine eenside de house. Dey, Peter see heapa people all geda togeda.

28Peter tell de people say, “Oona know we Jew Law tell we dat we ain oughta sociate wid people dat ain Jew. We ain spose fa wisit um. Bot God done show me dat A mus dohn tink dat dey ain nobody wa ain fit fa sociate wid we.

29Cause ob dat, Cornelius, wen ya sen fa me, A ain say no tall. A done come. So den, tell me hoccome ya sen fa me?”

30Cornelius tell um say, “Fo day done pass, wen A beena pray een me house bout dis same time. E been shree o'clock. All ob a sudden, one man wa weah cloes wa da shine come stan op fo me.

31De man say, ‘Cornelius, God yeh wa ya beena pray. E see de good ting ya gii fa hep dem wa ain hab nottin. An e da ansa ya.

32Sen some man dem ta Joppa fa bring back one man wa name Simon, wa dey call Peter. Simon Peter da stay wid noda man name Simon, who wok wid lezza. E da lib een a house close ta de seasho.’

33So den A sen fa ya real quick, an ya been good fa come. Now den, we all yah fa yeh ebryting de Lawd tell ya fa tell we. An God dey yah wid we.”

Peter Tell bout Jedus

34Peter say, “Now A know fa true, dat God treat all people de same way.

35Ebrybody fom ebry nation, ebrybody wa fea God an do wa right, God cep um.

36Oona know dat dis de wod God been sen ta de Jew people een Israel. E tell um de Good Nyews dat dey kin hab peace wid God shru Jedus Christ, who Lawd oba all people.

37Oona know how de wod spread all oba Judea. Dat staat een Galilee atta John beena tell de people fa stop dey sin an come leh um bactize um.

38Oona know dat God pick Jedus, who come fom Nazareth, an mek de Holy Sperit come eenta um an gim powa. Jedus gone all oba, da do good ta people, an da mek all dem wa been onda de powa ob de Debil git well. Jedus been able fa do all dem ting yah cause God dey wid um.

39We see all de ting dat Jedus done een de country ob de Jew people an een Jerusalem, too. An dey done kill Jedus, nail um ta de cross.

40Bot God mek Jedus git op fom mongst de dead people an lib gin atta shree day, an e leh um appeah ta we.

41Jedus ain appeah ta all de people. E jes appeah ta we, de people God done been pick fa shim. Atta Jedus git op fom mongst de dead people an lib gin, we been nyam an drink wid um.

42E chaage we say we mus tell people ebryweh de Good Nyews. E tell we dat we mus tell um how God done pick Jedus fa jedge all de people wa done dead an all dem wa ain pass oba yet.

43All de prophet taak bout Jedus, say ebrybody wa bleebe pon um, God gwine paadon dey sin, by de powa wa dey een Jedus name.”

De Holy Sperit Come pon de People Dat Ain Jew

44Peter still beena taak wen de Holy Sperit come down pon all de people wa beena listen ta de wod.

45De Jew people wa come fom Joppa wid Peter, dem wa done been circumcise an wa been bleebe pon Jedus, dey been stonish down, cause dey see God gii eben de people dat ain Jew de Holy Sperit.

46Dey yeh dem people dat ain Jew da taak diffunt language dem an da praise God. Den Peter say,

47“God gii dese people yah de Holy Sperit same like e gii ta we. So den, ain nobody gwine say we ain oughta bactize um wid wata, ainty?”

48So Peter chaage um fa bactize dem people een de name ob Jedus Christ. Den dey aks Peter fa stay wid um fa some time.


  Share Facebook  |  Share Twitter

 <<  Kisah Para Rasul 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran