Dual PanelMalekat TUHAN i Bokim
1Malekat TUHAN lawes i Gilgal nari ku Bokim janah nina man bangsa Israel, "Nggo Kubuat kam i Mesir nari jenari Kubaba kam ku negeri si Kupadanken man nini-ninindu. Ningku, 'La pernah la Kusehi padanngKu ras kam.
2Arus maka la ibahanndu perpadanen kai pe ras bangsa si ngingani negeri enda. Arus maka iruntuhkenndu batar-batar ingan persembahenna.' Tapi la ilakokenndu kai si Kukataken man bandu! Kebalikenna nge si idahikenndu!
3Emaka Kukataken man bandu genduari maka la Kupelawes bangsa-bangsa e tupung iasakndu ia. Ia jadi musuh-musuhndu janah kam kena siding alu nembah man dibata-dibatana."
4Kenca nggo dung malekat ndai ngerana, tangis kerina bangsa Israel,
5janah eme sabapna maka ingan e igelari Bokim. I je ipersembahken persembahen man TUHAN.
Josua mate
6Isuruh Josua bangsa Israel berkat, janah tep-tep kalak lawes muat negeri si jadi baginna.
7Bangsa Israel nembah man TUHAN kidekah Josua nggeluh. Kenca kematenna pe tetap denga nge bage perbahan kalak e kidekah geluh peminpin-peminpin si nggo ngidah perbahanen TUHAN si mbelin man bangsa Israel.
8Josua anak Nun, suruh-suruhen TUHAN, mate i bas umur seratus sepuluh tahun.
9Ia ikuburken i negeri si jadi baginna jine i Timnat Serah i deleng-deleng Eperaim i Utara Deleng Gas.
10Kenca kerina sundut si e mate, emaka sundut si reh kenca si e ngelupaken TUHAN ras kai si IbahanNa man Israel.
Israel lanai nembah man TUHAN
11Kenca bage nggo erdosa bangsa Israel man TUHAN janah mulai ia nembah man Baal.
12Ngadi ia nembeh man TUHAN, Dibata nini-ninina, Dibata si nggo maba ia ndarat i Mesir nari, janah mulai ia nembah man dibata-dibata si deban, dibata-dibata si isembah bangsa-bangsa sekelewetna. Bangsa Israel nembah ku dibata-dibata e, janah nembeh ate TUHAN ibahanna.
13Lanai ia nembah TUHAN tapi nembah man Baal ras Astarte.
14Emaka reh rawa TUHAN man Israel. Erkiteken si e IpelepasNa perampok nggempangi ras ngerampokisa. Ipelepas TUHAN kerina musuh si lit i sekelewet bangsa Israel naluken bangsa e. Emaka bangsa Israel lanai ngasup ngkawali dirina.
15Tep-tep kali Israel erperang, ilawan TUHAN ia, sue ras si nggo IkatakenNa. Emaka Israel tetap i bas kebiaren.
16Kenca bage maka ibereken TUHAN man bangsa Israel peminpin si mulahi ia i bas perampok e nari.
17Tapi peminpin e pe la diate bangsa Israel. Israel la setia man TUHAN tapi nembah man dibata-dibata si deban. Nini-ninina ngikutken perentah-perentah TUHAN, tapi sinursur si mbaru enda minter ngadi ngikutken perentah-perentah e.
18Tep-tep TUHAN mereken peminpin man bangsa Israel, isampati TUHAN peminpin e, janah ipulahina bangsa e i bas musuh-musuhna nari, kidekah peminpin ndai nggeluh. Mekuah ate TUHAN man bangsa e, erkiteken nderkuh ia i teruh kiniseran ras penindih kalak.
19Tapi kenca peminpin e mate, mulihken ka bangsa e ku dalan si ndekah, janah jahaten lagu-langkahna asang sundut si lebena. Itami-tami ras isembahna dibata-dibata si deban, janah la ia nggit pengadisa lagu-langkahna si jahat e.
20Kenca bage merawa kal TUHAN man Israel nina, "Bangsa enda nggo ngelanggar perpadanen si Kuperentahken si man cikepen nini-ninina. Erkiteken la ngikutken Aku,
21lanai ateKu pelawes bangsa-bangsa si tading denga tupung Josua mate.
22AteKu make bangsa-bangsa e guna ncubai Israel. Ntah kin ikutkenna dalanKu, bagi si idalanken nini-ninina ntah lang."
23Emaka ipelepas TUHAN bangsa-bangsa e tetap ringan i negeri e. Ibahan Tuhan maka Josua la ngasup nalukenca. Kenca Josua mate pe, la minter Tuhan melawes bangsa-bangsa e.