Alkitab Mobile SABDA
[VER] : [KARO]     [PL]  [PB] 
 <<  Yehezkiel 34 >> 

1Kata TUHAN seh man bangku nina,

2"O manusia si ermasap-masap, momokenlah kesalahan peminpin-peminpin Israel. Ernubuatlah kam man bana, janah pesehlah man bana katangKu, Aku TUHAN si Erdolat, bagenda: 'Cilaka me kam, o permakan-permakan Israel! Dirindu saja ngenca ipekena-kenandu.

3Susuna inemndu, uisndu mbulu biri-biri, apai biri-biri si mburna igelehndu man panganndu. Tapi biri-biri e la pernah ipekena-kenandu.

4Biri-biri si kote la iarak-arakndu, si sakit la itambarindu, janah si luka la ibalutindu, si papak la iembarindu, janah si bene la idaramindu. Tapi kejam kal perbahanenndu man biri-biri e.

5Erkiteken biri-biri e la lit permakanna, merap ia kerina, janah rubia-rubia si merawa njerngemsa manca.

6Emaka biri-biringKu papak ku uruk-uruk si meganjang ras deleng-deleng. Merap ia kerina i belang-belang doni enda, janah la lit si ndaramisa tah pe si nulu-nulusa.

7Dage genduari, o permakan-permakan, dengkehken katangKu bandu, Aku TUHAN si Erdolat.

8Asa tuhu Aku enggeluh, perdiatekenlah katangKu enda. Biri-biringKu nggo ijerngem rubia-rubia si merawa janah ipanganina erkite-kiteken la lit permakanna. Permakan-permakanku la diatena pe ndarami biri-biri e. Dirina nge si ipekena-kenana, labo biri-biri e.

9Dage, dengkehkenlah aku, o permakan-permakan.

10Aku TUHAN si Erdolat ngatakenca maka Aku kap imbangndu. Kubuat biri-biringKu e i bas kam nari, janah ndigan pe lanai Kubere kam jadi permakanna; ndigan pe la nai Kubere kam pekena-kena dirindu saja, Kupulahi biri-biringKu i bas kam nari, janah la Kupelepas ia jadi panganndu.'"

Permakan si mehuli

11Nina TUHAN si Erdolat, "Aku jine kap si ndarami biri-biringKu ras si ngasuhisa,

12bali ras sekalak permakan ndarami ras pepulung biri-birina si nggo merap, jenari ngasuhisa. I bas wari si gelap dingen cilaka e, biri-biringKu nggo merap; emaka genduari Kupepulung ia mulihi kerina.

13Kubaba ia ndarat i bas negeri si ndauh nari, jenari Kupepulung dingen Kubaba mulih ku negerina jine. Kutaruhken ia mulihken ku deleng-deleng ras lau Israel, janah Kupermakani ia i bas mbalmbal si meratah.

14Kubere ia nggagat alu teneng i bas dukut si mbur i deleng-deleng ras baluren-baluren ras i bas kerina mbalmbal si meratah si lit i taneh Israel.

15Aku jine kap si mpermakani biri-biringKu, janah Kubahan ingan pengadi-ngadinna. Enda me katangKu, Aku TUHAN si Erdolat.

16Kudarami biri-biri si bene, si papak Kutaruhken mulihi, si luka Kubaluti, janah si sakit Kutambari. Tapi si mbur dingen megegeh Kubunuh, sabap Aku kap permakan si ngelakoken si bujur.

17Dage genduari o biri-biringKu, begikenlah! Aku, TUHAN si Erdolat ngatakenca man bandu maka Kuadili me kam sada-sadai. Si mehuli Kusirangken i bas si jahat, bage pe biri-biri i bas kambing nari.

18Lit i bas kam si la akapndu puas terjeng nggagati dukut si mburna saja, tapi iperjakindu pe dukut si la terkerikenndu. Lau si meciho inemndu, tapi igemburindu pe lau si la inemndu.

19Erkiteken si e biri-biringKu si deban terpaksa nggagati dukut si nggo iperjakindu, janah minem lau si nggo igemburindu.

20Emaka Aku, TUHAN si Erdolat ngatakenca man bandu aku jine kap jadi hakim i tengah-tengah biri-biri si megegeh ras si la megegeh.

21Ijembakenndu biri-biri si sakit ku duru jenari iegasndu maka ndarat ia i bas rarasen e nari.

22Tapi Kukelini kap biri-biringKu, janah lanai Kubere ia ipesega-sega. Kuadili biri-biringKu e sada-sadai, jenari Kupeserap si mehuli i bas si jahat nari.

23Kubereken man bana sekalak raja si mpermakanisa bali ras Daud jadi permakanna, emaka ipekena-kenana me ia.

24Aku, TUHAN jadi Dibatana, janah sekalak raja si bali ras suruh-suruhenKu Daud nai, jadi rajana. Enda me katangKu.

25Kubahan sada perpadanen ras ia si jadi jaminen kerna keselamatenna. Kupelawes kerina rubia-rubia si merawa i bas taneh e nari, gelah biri-biringKu banci ringan alu teneng i bas mbal-mbal, janah medem i bas kerangen.

26Kupasu-pasu ia, janah Kubere ringan i sekelewet delengKu si badia. I je Kupasu-pasu alu udan katawari ia perlu.

27Batang kayu erbuah, janah mereken ulihna, janah kerina kalak nggeluh alu teneng i bas tanehna. Kenca kuretapken rante si ngiket bangsangKu, janah Kupulahi i bas kalak si mperbudak ia nari, kenca bage ietehna me maka Aku kap TUHAN.

28Bangsa-bangsa perbegu lanai ngerampasi ia, janah rubia-rubia si merawa lanai munuh ras manganisa. Nggeluh me ia alu teneng, janah la lit ise pe si pebiar-biar ia.

29Kubereken man bana juma si mehumur janah lanai lit kelihen i bas negeri e. Bangsa-bangsa si deban lanai megombang man bana.

30Iteh kalak me pagi kerina maka Kukawali kap Israel, janah bangsangKu kap ia. Enda me katangKu, Aku TUHAN si Erdolat.

31O kam biri-biringKu, rarasen si Kuasuhi; kam kap bangsangKu, janah Aku kap Dibatandu." bage nina TUHAN si Erdolat.


  Share Facebook  |  Share Twitter

 <<  Yehezkiel 34 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran